15. सोह कियो द देश

आखरीकार, स वक्त आये गेय त कि सोह किये दै देश, कनान देशा लै भागणेंय। तैवु देशा दी यरीहो नांव एक नगर त। तैवुये रक्षा लै चारी बिलै मज़बूत दिवार ती। यहोशूये तैवु नगरा दी जासूस भेज़ै। तैवु नगरा दी राहाब नांवें एक वैश्या बी रआ तै। तेये सें जासूस चौरे अज़ौ बाद कै तिन्ना लै तैवु नगरा कै बैहरे बचेय निकड़ना लै मदद बी किये। ऐणो तैईं कियो किल्हैकि स परमेश्वर मैंथे विश्वास थोआ तै। ज़ैबी इस्राएली लोग यरीहो नाश करा, तैबी ज़ासूसे राहाब अज़ौ तेये टबरे मदद करने सोह कीये।

इस्राएली लोगा लै सोह कीये दै देशा दी भागणां लै यरदन दरियाव पार करना लै परमेश्वरे यहोशू लै बोलो, “पुरोहिता लै पेहले भागणें दै।” ज़ैबी पुरोहित यरदन दरियावा दी आपणें कदम थोआ तेबी पाणींये धार बहणें बन्द हआ, ज़ैण कै इस्राएली लोग शुक्की धरती मैंथे होय दरियावे दुज़ी बीलै भागे सका।

तिन्ना लोगे यरदन दरियाव पार कीयो तेखो परमेश्वरे यहोशू लै बोलो कि यरीहो दी हामलो करना लै तैयार रोणों, बैशक स बढ़ो मज़बूत नगर त परमेश्वरे तिन्ने पुरोहित अज़ौ सिपाई लै छआ दिना सेकै तैवु नगरे चारी बिलै चकर लाणां लै बोलो। पुरोहित अज़ौ सिपाईये तेणों ही कियो।

परमेश्वरे ऐणों बी बोलो कि सातवे दिन यरीहो नगरे चारी बिलै सात बैरे चकर लाणों ज़ा। तेखो पुरोहिते आपणीं करनाड़ै फुंकरा, अज़ौ सब लोग ज़ोरे-ज़ोरे जय जयकार करा। तेखो तिन्नै तेंणों ही कीयो।

तेखो यरीहो नगरी चारी दीवारा ढोड़ी! ज़ैणों परमेश्वरे हुकम देनो द त कि इस्राएलीये नगरे हर एक च़ीज़ो नाश कियो। तिन्नै सिर्फ राहाब अज़ौ तेये टबरा लै छाढ़ो, ज़ुंण इस्राएलीय हीसो गेये तै बणें। ज़ैबी कनान देशा दी रोणें वाड़े लोगे शुंणों की इस्राएलीये यरीहो नाश कीयो, तेखो सें डरे कि इस्राएली लोग तिन्ना मैथे बी हामलो करे सका।

परमेश्वरे इस्राएली लोगा लै हुकम देनो कि तिन्ना लै कनान देशा दी रोणें वाड़ी ज़ाति सीथी शांतिये वाचा ना थोणें। पर गिबोनिओ नांवे एक कनान ज़ातिये यहोशू कै झूठ बोलो की सें कनान देशा के दूर एक जागह दी रोणों वाड़े आ। तिन्नै यहोशू सीथी शांतिये वाचा थोणें विनते किये। यहोशू अज़ौ दुज़ै इस्राएली अगुवे परमेश्वरा कै बिना पुछै कि तिन्ना लै खै करना चैईं। एथी बज़ाय तिन्नै, गिबोनि सीथी शांतिये वाचा किये।

चना दिना बाद, इस्राएली लोगा लै पत्तो चालो कि गिबोनी कनान देशा दी ही रआ तै। सें गुस्सै हुये किल्हैकि गिबोनी लोगे तिन्ना लै धोखो देनो। पर तिन्नै तिन्ना सीथी किये दै शांतिये वाचा बड़ावेय थोये किल्हैकि सैं परमेश्वरा आगे किये दै तै कुछ वक्ता बाद कनान दी रोणें वाड़े एक दुज़े ज़ाते, एमोरीये राज़े शुंणों की गिबोनिये इस्राएली सीथी शान्तिये वाचा किये दै आ, तैईं तिन्ने आपणीं आपणीं सेना लै एक करेय एक बड़े सेना बढाऊवे अज़ौ गिबोनी मैथे हामलो कियो। गोबोनी लोगे तिन्नै मदद करना लै यहोशू आगे संदेशो भेज़ौ।

तेखो यहोशूये इस्राएली सेना कठ्ठै किये अज़ौ गिवोनी आगे पहुंचणां लै सारी राची हांढै। दोती तिन्नै एमोरीये सेना लै हैरान कियो अज़ौ तिन्ना मैंथे हामलो कीयो।

तैवु दिन, परमेश्वर इस्राएलीय तैंईं लड़ो। तैवुये एमोरी डराऊवै अज़ौ बढ़े-बढ़े शोरू भेज़ेयो खास्से एमोरी मारे।

परमेश्वरे सुरज़ बी सरगा दी एकी ज़ागे रोको ताकी इस्राएली लै पूरो वक्त मिला कि एमोरी लै हरावड़ा लै। तैवु दिन परमेश्वरे इस्राएली लै एक बढ़ी ज़ीत देने।

परमेश्वरे एमोरिये सेना लै हरावणें बाद, सारे कनानी ज़ातिये लोग इस्राएली मैंथे हामलो करना लै कठ्ठे हुये। पर यहोशू अज़ौ इस्राएलीये हामलो करेय तिन्नो सर्वनाश कियो।

इन्ना लड़ाई बाद, परमेश्वर इस्राएलीये हर एक गोत्रा लै सोह कीये दै देशा दी तिन्ना लै हिस्सो देनो। तेखो परमेश्वरे इस्राएली लै तिन्नी सारी सीमा दी शान्ति देने।

ज़ैबी यहोशू बूढअ हुओ तै तैवुये इस्राएलीये सब लोग एकी सीथी कठ्ठे किये। तेखो यहोशू तिन्ना लै याद दिलाऊवो, कि तिन्नै तेया वाचा मानणां लै सोह किये दै तै, ज़ुंण परमेश्वरे तिन्ना सीथी सीनै पर्वता दी बाने तै। तिन्ना लोगे परमेश्वरे तैईं विश्वास योग्य रोणें अज़ौ परमेश्वरे कानून मानणो बाईदौ कियो।