14. इस्राएली लोगो चाड़ी बर्षा तैईं ज़ांगला दी भटकणों

परमेश्वरे इस्राएली लोगा लै तिन्ना नियमा लै बोलणों खत्म कियो। ज़ुंण बानी दी वाचा बज़ा कै मानड़े तै। तैवुये सिनै पर्वता के आगे तिनै अगवाये कीये। स तिन्ना लै सह किये दै देशा दी निंण चाहा त। तैवु देशा लै कनान बी बोला तै। परमेश्वरे बादड़े खाम्बै दी तिन्ना का आगे-आगे हांढो अज़ौ सें तैवुये पिछै-पिछै हांढे।

परमेश्वरे अब्राहम, इसहाक अज़ौ याकूबा का सोह किये दै देश तिन्नै वंशा लै देया, पर एकी वक्ता तिदै बड़ी सारी ज़ाते रोआ ती, तिन्ना लै कनानी बोला तै । ज़ै कनानी लोग परमेश्वरे भक्ती ना करा तै अज़ौ तैवुओ हुकम ना माना तै। सें झूठे देबते भक्ति करा तै। सें सारै बुरै काम करा तै।

परमेश्वरे इस्राएली लोगा लै बोलो, “ज़ैबी तुम्हां तैवु वाचा बांने दै देशा दी भागा तैबी तिदै सब कनानी कै छुटकार पाणों। तिन्ना सीथी समझौत ना करनो अज़ौ ब्याह ना करनो। तुम्हां लै तिन्ने सब मुर्ती लै नष्ट करनो आ। ज़ै तुमा मेरे हुकम ना माना, तै तुमा मेरी ज़ागा दी तिन्नै देबते पूज़ा करदे लागणें।”

ज़ैबी इस्राएली कनानी सीमा आगे पहुंचै, मुस्से इस्राएलीये हर एक गोत्रा मांझी कै एक एक करेय बारा मर्द छांटे। तैवुये तिन्ना लै तैवु देशा दी भागेय तैवु देशो पत्तो करनेय आदेश देनो, शाणां लै कि स देश कैणं आ। तिन्ना लै तिन्ना कनानीय भेद बी लैणं त ऐणं शांणां लै कि सें ताकतवर आ कि कमज़ोर।

तिन्ना बारा मर्दे पूरै कनान देशा कै भागदी बैरे चाड़ी दिनों सफर कियो, तेखो सें बापस आये। तिन्नै लोगा लै बोलो, “स देश बढ़ो उपज़ाऊ देश आ अज़ौ तिदै फसले बी खास्सी आ!” पर तिन्ना मांझी कै दसा ज़ासुसै बोलो, “स देश खास्स ई मज़बूत आ आज़ौ लोग बी लाम्बै-चोड़े आ! ज़ै हामा तिन्ना मेथै हामलो बी करीं,तै पाक्कै दी सें हामा लै हराऊवा अज़ौ हामां लै मारा।”

तैवी कालेब अज़ौ यहोशू दी ज़ासूस बोले, “ज़ो बात सच आ कि कनान देशा दी लोग लाम्बे अज़ौ ताकतवर आ, पर पाक्कै दी हामा तिन्ना लै हरावे सकी! परमेश्वर मारी तैईं लड़िया!”

पर लोगे कालेब अज़ो यहोशूये ना शुंणीं। सें मूसा अज़ौ हारूने लै गुस्से हुये अज़ौ बोले,“थारै हामा एऊ भयांनक ज़ागा दी किल्ले आणैं? हामा मिस्र देशा दी ई रोणों चाहा तै। ज़ै हामे तैवु देशा दी भागे तै हामा युद्धा दी मरने, अज़ौ कनाने लोग म्हारी लाड़ी लै, अज़ौ छौहटू लै, गुलाम बढ़ावा। सें लोग तिन्ना लै बापस मिस्र देशा लै निंणां लै एक दुज़ो अगुवो बड़ाऊव चाहा तै।

ज़ैबी तिन्नै ऐणों बोलो तेबी परमेश्वर बढ़ो गुस्सो हुअो। से मिलाप वाड़े तम्वू दी आओ अज़ौ बोलो, “थारै मेरे खलाफ पाप कियो, तैई तुम्हां सवी लै एवै ज़ांगला दी भटकणों ज़ा। हर एक आदमे ज़ुंण बीया बर्षो या तेथा कै ज़ादी बर्षो आ स तिदै ही मरा अज़ौ सें केबी बी तैवु देशा दी ना पहुंचा ज़ुंण मुँ तुमा लै दैऊ। सिर्फ कालेब अज़ौ यहोशू सिवाये ना तैवु देशा दी भागे सका त।”

ज़ैबी लोगे परमेश्वरा लै ऐणं बोलदी बैरे शुंणो, तेखो सें दुखी हुये किल्हैकि तिन्नै पाप कियो त, तैई तिन्नै कनान देशा दी हामलो करनेय फैंसलो कियो। मूसे तिन्ना लै ना भागणैं चेतावने देने किल्हैकि परमेश्वर तिन्ना सीथी ना भागा त। पर तिन्नै तेवी ना शुंणीं।

परमेश्वर तैवु युद्धा दी तिन्ना सीथी ना भागो, तैई सें कनानी लोगा कै हारूवे अज़ौ तिन्ना मांझी खास्से आदमी मरे। तेथा बाद इस्राएली कनान देशा कै बापस मुड़ुये। ओर आगले चाड़ी बर्षा सेके, सें ज़ांगला दी औरे-पौरे भटकै।

इस्राएली लोगे चाड़ी बर्ष सेके ज़ांगला दी भटकदी बैरे, परमेश्वरे तिन्नें ज़रूरते पूरी की। तैबी तिन्ना लै “मन्ना” बोलणें वाड़ै रोटे देने। तिन्ना लै बटेरे टोली बी (ज़ुंण कि ठीक ठीक शकलीये पक्षी होआ) तिन्ने रोंणें वाड़ी ज़ागा दी भेज़ै ताकि तिन्ना आगे खांणां लै मांस मिला। तैवु पूरे वक्त दी, परमेश्वर तिन्नै ज़ुड़कै अज़ौ लाटै चिरनें कै बचाऊवे।

इदे सेके कि परमेश्वरे तिन्ना लै ज़ुटणेंय पाणीं चट्टाना कै गाढ़ो। पर इन्ना सवी कै बाद इस्राएली लोगे परमेश्वरे खलाफ अज़ौ मुसे खलाफ शिकायत कीये अज़ौ बकबक करदे लागे। तेखो बी परमेश्वर विश्वासयोग्य रहो। तैवुये ज़ुंण बी सोह खाये तै कि स अब्राहम, इसहाक, अज़ौ याकूबे वंशा लै करा तैवुये स कियो।

एकी बैरे ज़ैबी तिन्ना लोगा आगे पाणीं नेईं त, परमेश्वरे मूसा लै बोलो, “चट्टाना सीथी चपड़, अज़ौ तैता कै पाणीं निखड़ा।” पर मूसे चट्टाना कै ना चपड़ो। बल्कि तैथी ज़ागा तैवुये डांण्ड़े कै चट्टा दी दिया बैरे मारो। एणों करे तैवुये परमेश्वरो अपमान कियो। साबी लै ज़ुटणां लै चट्टाना कै पाणीं निकड़ो, पर परमेश्वर मूसा कै गुस्सो हुओ। तैवुये बोलो, “किल्हैकि तेरे ऐणों कियो,तैई तू सोह कीये दै देशा दी ना भागे सका।”

ज़ैबी इस्राएली लोगा चाड़ी बर्षा सेके ज़ांगला दी भटकी गेये तै, तैबी तिन्नै परमेश्वरे खलाफ पाप किय त, सें सब मरी गेये तै। तेखो परमेश्वरे दवारा कै तिन्ना लै सोह खाये दै देशे सीमा आगे पहुंचावे। एबै मुसा बुढ़ो गेय त हुये। तैई परमेश्वरे लोगे अगवाये करना लै तैवुये मदद करना लै यहोशु लै छांटो । परमेश्वरे मूसा कै सोह किये दै तै कि एक दिन स तिन्ना लोगा बिड़ै मुसा ज़ैंय एक परमेश्वरो ज़ांणकार भेज़ा।

तेखो परमेश्वरे मूसा लै एकी पर्वते चोटी मैथे भागणां लै बोलो ताकि स सोह किये दै देशा लै भागी शाये सका। मूसा सोह कीये दै देश शाओ पर परमेश्वरे तैवु लै तैता दी भागणें इज़ाजत ना देनीं। तेखो मूसा मरो, अज़ौ इस्राएलीये तीस दिना सेके शोक बड़ाऊवो। यहोशू तिन्नो नांऊव अगुवो बणों। यहोशू एक बांक्को अगुवो त किल्हैकि तैवुये परमेश्वरो मैथे विश्वास थोओ अज़ौ तैवुये बातें मानी।