13. इस्राएली लोगा सीथी परमेश्वरे वाचा

ज़ैबी परमेश्वरे इस्राएली लोगा लै लाल समुदरा कै पारशी बिलै निंणें कै बाद, परमेश्वरे सें ज़ांगला मांझी कै हएय सीनै नांवे पर्वता बिलै निंये। ज़ौ स ही पर्वत त ज़िदे मुसे ज़ड़दो झाखड़ शाओ त। तिन्नै लोगे तैवु पर्वता पाढ़ आपणैं तम्बू लाये।

परमेश्वरे मूसा लै अज़ौ सबी इस्राएली लोगा लै बोलो, “ज़ै तुम्हां मेरो हुकम माना, अज़ौ मेरी वाचा माना, तैई सोवी लोगा मांझी तुम्हां ई मेरे आपणैं खास लोग हंणैं,अज़ौ तुम्है मेरी नज़रा दी पुरोहिरो समाज अज़ौ पवित्र ज़ाते हंणैं।”

चन्ना दिना सेके लोगे आपणीं तैयारे कीये ताकि परमेश्वर तिन्ना बिड़ै आई सका। तेखो परमेश्वर सीनै पर्वते टीरा मैंथे धोन्नी ऊतरो। ज़ैबी स आऔ तेबी ज़ाजरो हुओ, सरगा दी बिज़ड़ी चमकै, धुंअ ऊठो अज़ौ ज़ोरा कै करनाईये आवाज़ आई। तेखो मूसा आप्पू ही पर्वता मैंथे चढ़ो।

तेबी परमेश्वरे लोगा सीथी वाचा बाने। तिन्ना लै बोलो, “मूंऐ आ थारो परमेश्वर, यहोवा। स मूंऐ आ ज़ोरे तुम्हां लै मिस्री देशे गुलामी कै आज़ाद कियो। कोये ओरे देबते अराधना ना करने।”

“मूर्ते ना बणांऊणीं अज़ौ तेथे अराधना ना करनी, किल्हैकि मूंऐ थारो एके परमेश्वर आ। मेरो नांवो फालतू ना लैणों। सब्ते दिना लै पवित्र मानणो चैईं मेरो नांव याद थौण। दुज़ै शब्दा दी, छआ दिना दी आपणैं सारै काम करने, सातुवे दिन तुम्हां लै आराम करनेय दिन अज़ौ मेरी अराधना करनेयो दिन आ।”

“आपणैं आम्मा अज़ौ बाप्पूओ आदर करनो। हत्या ना करनी। व्यभिचार ना करनो। चोरी ना करनी,झूठो ना बोलणों। आपणीं पड़ोसीये लाड़े, तेवे घरो या तैवे कोही बी चिज़ो लैंणें आशा ना थोणें।”

सब लोग तिन्ना नियम मानणां लै तैयार हुये, ज़ुंण बी परमेश्वर तिन्ना लै बड़ाऊवे दै तै। सें सिर्फ परमेश्वरे लोग होणां लै अज़ौ सिर्फ तैवुये अराधना करना लै राज़ी हुये।

परमेश्वरे तिन्ना इस्राएली लोगा लै एक ताकड़ो मिलाप-तम्बू बड़ाऊणां लै बोलो। तैवुये तिन्ना लै ठीक ठीक बोलो की ज़ौ तम्बू लै कैणों बढ़ावणो, अज़ौ तेता भितरै कै-कै चिज़ा थौणीं। तैवुये तिन्ना तैवु बड़े तम्बू लै दिया कमरे दी बांटणां लै एक बढ़ो पर्दे बड़ाऊंणैं लै बी बोलो। परमैश्वर तैवु पर्दे कै पिछै बढ़े कमरे दी आएय अज़ौ तिदे रोआ। ज़िदै परमेश्वर रआ त तैवु कमरे दी भागड़े इज़ाजत सिर्फ माहा पुरोहिता लै तै।

तिन्ना कै तैवु मिलाफ वाड़े तम्बू आगे एक बेदे बढ़ावणें ज़ा। कोये बी ज़ुंण परमेश्वरे नियमा लै चोड़ा, स तेया बेदी दी एक ज़ानबर आणां। तेखो पुरोहित तैथा लै बले करा अज़ौ तैता लै बलीये रूपा दी ढ़ोआ। परमेश्वरे बोलो कि तैवु ज़ानबरो खुन तैवु आदमीये पाप लै ढका। ऐया रिती कै परमेश्वर ऐबै तैवु पापा लै ना शाआ। स आदमे परमेश्वरे नज़रा दी “शुद्ध” हंणो। परमेश्वरे मूसे भाये हारूना लै अज़ौ हारूनै वंशा लै पुरोहित होणां लै छांटो।

तेखो परमेश्वरे इन्ना दसा हुकमा लै ढोड़ी दिया पाटी मैथे लिखिओ मुसा लै देनी। परमेश्वरे तिन्ना लै मानणां लै अज़ौ बी सारै नियम दैने। परमेश्वरे सोह किये कि ज़ै सें नियमा लै माना तै परमेश्वर तिन्ना लै बर्गत देया अज़ौ तिन्ना लै बी वचावे थोआ। पर तैवुये बोलो कि ज़ै सें हुकम ना माना तै स तिन्ना लै सज़ा देया।

केई दिना सेके,मुसा सिनै पर्वते टीरा मैथे ही रणों। स परमेश्वरा सीथी चपड़दो त लागो द। पर लोग तैवुये बापस आणैं लै पौखे पौखैय थक्कै। तैई सें हारुना बीलै सुन्नै पाएय आये अज़ौ तैवु लै मुर्ते बड़ाऊणां लै बोलो, ताकि सें परमेश्वरे ज़ागा दी तैया मुर्तीये पूज़ा पाठ करे सका। एणैं करे तिन्नै भयंकर रूपा कै परमेश्वरे खलाफ पाप कीयो।

हारूने भाशटू ऐ शक्ले एक सुन्ने मुर्ते बढ़ाऊवी। तिन्ना लोगे तेया मूर्तिये पूज़ा पाठ करने शुरु कीये अज़ौ तैया लै बले बी चढ़ाऊवे ! तिन्नै पापे बज़ा कै परमेश्वरे तिन्ना कै बढ़अ गुस्स हुआ त। स तिन्ना लै नाश करन चाहा त। पर मुसे तिन्ना लै ना मारने विनते किये। परमेश्वरे तैवुये प्रार्थना शुंणीं अज़ौ तिन्ना लै नाश ना किय।

आखरीकार मूसा सिनै पर्वता कै ऊंदी ऊतरो। स तिन्ना ढोड़ी पाटी पाएये त ज़ैया दी परमेश्वरे दस हुकम तै लिखै दै, तेखो फैर ज़ेबी मुसे मुर्ते शाये, तेखो स एतरो गुस्सो हुओ, कि तैवुये तिन्ना ढोड़ी पाटीओ चुरमो बड़ाऊवो।

तेखो मुसे स मुर्ते ढोये, अज़ौ तैता लै पसीये तेथो बुरादो बड़ाऊव, अज़ौ तैवु बुरादै लै पाणीं मांझी मिलेवेय तिन्ना लोगा लै स पाणीं झुजटणां लै देनो। तिन्नै पापे बज़ा कै, परमेश्वरे तिन्ना मेथैं एक आफत भेज़ै अज़ौ तिन्ना मांझी खास्से लोग मुंये।

ज़ुंण पाटी मुसे चोड़ी गेये ती, तेथे ज़ागा लैणें लै तैवुये दसा हुकमे नोवी पाटी बढ़ाऊवी। ज़ैबी स पर्वता मैथे चढ़ो अज़ौ प्रार्थना कीये कि परमेश्वर तिन्ना लोगे पाप माफ करा। परमेश्वरे मूसे प्रार्थना शुंणें अज़ो तिन्नै पाप माफ किये, नोवी पाटी दी दस हुकम पाएय मुसा पर्वता कै हुन्दी आवो। तेखो परमेश्वरे सीनै पर्वता कै तेया सोह किये दै देशा सेके तिन्नै अगवाये किये।