12. इस्राएली लोगो मिस्रा देशा कै बेरे निकड़नो

इस्राएली लोग मिस्रा देशा कै निखड़ैया बड़े खुश तै। सें एबै गुलाम नेईं तै, अज़ौ सें सोह किये दै देशा लै भागदै तै लागे दै! ज़ौ बी इस्राएलिये मांगो, मिस्रीये तिन्ना लै सब कुछ देनो, इदा सेकै कि सुन्नअ-चांदे अज़ौ दुज़ी कीमती चिज़ा बी। दुज़ै देशा कै कुछ बी लोगे परमेश्वरे मैथे विश्वास कीयो अज़ौ ज़ैबी इस्राएली लोग मिस्रा देशा कै निखड़े तेबी सें बी तिन्ना सीथी हुये।

बादड़ो एक बढ़ो खाम्बो दीना दी तिन्ना आगे आगे हांढां त। अज़ौ राची की बैरे ज़ौ ई खाम्बो आग बणां त। परमेश्वरे ज़ुंण तैवु बादड़े खाम्बे अज़ौ तैवु आगिये खाम्बे दी त स सदा तिन्ना सीथी त अज़ौ सफर करदा बैरी तिन्नै अगवाये करा त। तिन्ना लै सिर्फ तेती करन त तैवु पिछै हांढदै रणों त।

दक्क दिना बाद, फिरौन अज़ौ तैवुये लोगे आपणं मन बदलो। सें इस्राएली लोगा दुज़ी बैरे आपण गुलाम बणांऊण चाहा तै। तैईं तिन्नै इस्राएली लोगो पिछो कीयो। स परमेश्वर ई त ज़ोरे तिन्नो मन बदलो। तैवुये ऐणों तैई कीयो किल्हैकि स चाहा त कि हर कोई ज़ाणां कि फिरौन कै अज़ौ मिस्रीये सबी देबते कै, यहोवा ज्यादा ताकतवर आ।

ज़ैबी इस्राएली लोगे मिस्री सेना आन्दी बैरा शाये तेबी तिन्ना लै ठैऊ लागो कि सें मिस्री सेना अज़ौ लाल समुंदरा मांझी फसै गेये तै। सें बढ़े भारी डरेय अज़ौ रोंदै लागे, “म्हारे मिस्र देश किल्ले छाढ़ो? हामै मरने वाड़ै आ!”

मूसे इस्राएली लोगा लै बोलो, “डरो ना! परमेश्वर आज़ थारी तैईं लड़ीया अज़ौ तुम्हां बचाऊवा।” तैबी परमेश्वरे मूसा लै बोलो, “इन्ना लोगा लै लाल समुंदरा बिड़ै बागणां लै बोल।”

तेबी बादड़ो खाम्ब इस्राएली अज़ौ मिस्री सेना माझी आओ, अज़ौ राची आगीओ खाम्ब बणां। मिस्री सेना पूरी राची इस्राएली बिढे बी ना आई सके।

परमेश्वरे मूसा लै समुंदरा मैंथे आपणों हाथ आगे बड़ाऊणां लै बोलो। फैर परमेश्वरे हावा कै समुंदरो पाणीं लै दाईं अज़ौ बाईं बिलै धकेलो, ज़ैण करे समुंदरा माझी पैंड़ो बणों।

इस्राएली लोग आपणैं दिगी बिलै पाणींये भीती सीथी शुक्कै माट्टै मेथै समुंदरा दी आगे हांढे।

तेखो परमेश्वरे तिन्नै पैंढें कै बादड़ अज़ौ आगीय खाम्बो उठाओ। तेखो मिस्री सेने इस्राएली लोग बचीओ भागदी बैरे शाये। मिस्रिये सेने तिन्ना लै पाकणने लै तैई दुज़ी बैरे तिन्नौ पिछो करनो शुरू कीयो।

तेई तिन्नै सुंमुदरा पैड़े कै हऐअ इस्राएली लोगो पिछो कीयो। पर परमेश्वरे मिस्री लोग डराऊये अज़ौ तिन्नै रथ अटकाऊये। सें हाक्का मारदै लागे, “भागो! इस्राएली बिला कै परमेश्वर लड़दो लागद आ!”

सब इस्राएली समुंदरे दुज़ी बिला पहुंचै। तेखो परमेश्वरे मुसा लै बोलो कि दुज्जी बेरे पाणीं मैथे हाथ आगे बड़ाव। तेखो मुसे तैणं ई कीयो,तेखो पाणीं मिस्री सेना मैथे आओ अज़ौ आपणीं पेहले ज़ैंय हुअ। सब मिस्री सेना पाणीं मांझी डुबे।

ज़ैबी इस्राएली लोगे शाऔ कि मिस्री मरी गेये तेखो तिन्नै परमेश्वरे मैथे विश्वास कीयो। तिन्नै विश्वास कीयो कि मूसा परमेश्वरे बिलै कै परमेश्वरो ज़ांणकार आ।

इस्राएली लोग ऐथा तैईं बी खुश तै किल्हैकि परमेश्वरे सें मरने अज़ौ गुलाम हंणै कै बचाऊवे दे तै। ऐबे सें परमेश्वरे भगती करना लै अज़ौ परमेश्वरे हुकम मानणां लै आज़ाद तै। इस्राएलीये आपणीं आज़ादीओ त्यौहार बणांऊणें तैईं अज़ौ परमेश्वरे तारीफ करने तैईं केई सारे भज़न गेये किल्हैकि तैवुये मिस्री सेना कै बचाव त।

परमेश्वरे इस्राएला लै हर बर्ष एक त्यौहार बणांऊणां लै आदेश देनो, एऊ याद थोणां लै कि परमेश्वरे कैणें करे मिस्री सेना लै हराऊ त अज़ौ तिन्ना लै गुलाम हंणें कै आज़ाद कीयो त। ऐथा लै फसेह त्यौहार बोला। ऐऊ तैवारा बणांऊणें तैईं तिन्ना लै एक एक बढीया च़ैलटू बली करनो त, स आगी दी भुनणो त, अज़ौ तैवु लै बिना सज़ैडे रोटी सी खांणों त।