11. फसेह तैवार

परमेश्वरे मूसा अज़ौ हारून लै फिरौना बिलै ऐणं बोलणां लै भेज़ो कि इस्राएली लोगा लै आज़ाद कर। तिन्नै तैवु लै चेताबनी देनी कि ज़ै स तिन्ना आज़ाद ना करा, तै परमेश्वरे मिस्री लोगे अज़ौ तिन्नै ज़ानबरे बढ़े भाऊ लै मारा। फिरौने ऐवु शुंणींओ बी परमेश्वरे मैंथे विश्वास करने कै मना कीयो अज़ौ तैवुये बात मानणें कै मुखरूओ।

परमेश्वरे तैवु मैंथे विश्वास थोणें वाड़ै हर एक बड़े भाऊ लै बचाऊंणें तैईं एक तरकीब बणांऊवे। सोवी टबरा लै एक निर्दोश च़ैलटूये बले करने तै।

परमेश्वरे इस्राएली लोगा लै तैवु च़ैलटूओ खून आपणैं घरे दवारा दी लाणां लै बोलो। तिन्ना लै तैवु च़ैलटुओ मांस भुनण त अज़ौ फिर तैवु मांसू लै बिना सज़ैड़े रोटी सीथी फटा फटा खांण त। तैवुये तिन्ना रोटी खांणें बाद तिन्ना लै फटा-फट मिस्र देशा लै छाढ़णां लै तैयार रणां लै बोलो।

ज़ेंणों करना लै परमेश्वरे इस्राएली लोगा लै हुकम दैनो द त तिन्नै सब कुछ तैंणों ही कीयो। आधी राची, परमेश्वरे हर एक बढ़े भाऊ लै मारदे मिस्र देशा मांझी कै हांढ़ो।

इस्राएलीये सबे घरे दुवारा दै खूंन लागद त, तैईं परमेश्वरे तिन्नैं घर छाढ़े, तिन्ना भितरै सब लोग बचै। सें साब च़ैलटुये खून्नुये बज़ा कै बचै।

पर मिस्री लोग परमेश्वर मैथे विश्वास ना करा तै अज़ौ तैवुये हुकम ना माना तै। तैईं परमेश्वरे तिन्ने एकिये बी घर ना छाढ़े। परमेश्वरे मिस्री लोगे सोवीये बढ़े भाऊ मारे।

कैदखाने कैदी कै, फिरौने बढ़ै भाऊ सेके, साबीये बढ़ै भाऊ मरे। आपणीं बढ़ी भारी तखलीफे बज़ा कै मिस्री लोग रोंदे तै लागे दै अज़ौ पश्ताव करा तै।

तेया ही राची, फिरौने मूसा अज़ौ हारुन बेदै अज़ौ तिन्ना लै बोलो,“इस्राएली लोगा लै पाइयो ऐबी कै एबी मिस्र देशा कै निखड़ो!” मिस्री लोगे बी इस्राएली कै फटा फट भागणैं बिनते कीये।