36. रूप बदलनो

एक दिन यीशुये आपणैं चोन चैले पतरस,याकूब अज़ौ यहून्ना लै आप्पू सीथी निंयो। (ज़ौ यहून्ना नांवो चैलो स आदमी नेईया ज़ौरे यीशु लै बपतिस्मा देनो।) सें प्रार्थना करना लै एक ऊशटै धारा दी भागे।

ज़ैबी यीशु प्रार्थना त करदो लागो द तेवी तैऊवो मुँह सूरज़ा साही चमको। तैवे जुड़कै प्रैशे साही शुकलै बणैं, ज़ेणों धरती दी कोये बी करे सका तेथा बी कै ज्यादै शुकलै।

तेबी मूसा अज़ौ एलिय्याह परमेश्वरे ज़ांणकार प्रकट हुये। ज़ै मर्द एया धरती दी ऐवु वक्ता कै केई शौ वर्ष पैहले रोहा तै। तिन्नै यीशु कै तैवी मौता बारै दी बात कीये, किल्हैकि स स्तावी यरूशलेम नगरा दी मरा।

ज़ैबी मूसा अज़ौ एलिय्याह यीशु सीथी चपड़दे तै लागे दै तेवी पतरसे यीशु लै बोलो, ‘हामा लै ईंदै होणों भलो आ। हामा चोन मंडप लै बड़ाऊवी, एक तोंई लै, एक मूसा लै, अज़ौ एक एलिय्याह लै।” पर पतरस ना ज़ाणां त कि स खै बोलदो लागो द आ।

ज़ैबी पतरस बोलदो त लागो द, तेवी एक चमकीलो बादड़ हुंदी आयेय तिन्ना मैंथे छाऔ। तेखो तिन्नै बादड़ा कै एक आवाज़ आंदी बैरे शुंणें। तैवे बोलो, “ज़ौ मेरो प्यारो भाऊ आ ज़ौआ कै मूँ प्यार करूं। मूँ ऐवु कै खुश आ। ऐवी शुणों।” सें चोने चैले ड़रै अज़ौ माट्टै मैथे लाम्बे पोढ़े।

तेखो यीशुये सें छुंये अज़ौ बोलो, “डरो ना। खड़े ऊठो।” ज़ैबी तिन्नै चारी बिलै शाऔ, तैबी यीशु लै छाढेय आप्पू सीथी अज़ौ कोये दुज़ौ ना शाऔ।

यीशु अज़ौ सें चोने चैले तैऊ पर्वता कै ऊंदी ऊतरे। तेखो यीशुये तिन्ना लै बोलो, “ऐबी ज़ौ ईंदै हुओ तेथे बारै दी कोई लै ना बोलणों मूँ स्तावी मरूं अज़ौ दुवारा कै ज़िंऊंदो होऊ। ऐता बाद, तुमा लोगा लै बोले सका।”