37. यीशु लाज़र लै मरे दै मांझी कै ज़िंवदो करा

लाज़र नांवों एक आदमी त। तैवी दी बैंहणीं ती ज़ौरे नांव मार्था अज़ौ मरियम तै। सें सब यिशुये पाक्कै दोस्त तै। एक दिन, कोईये यीशु लै बोलो कि लाज़र बढ़ो बीमार त। ज़ैबी यीशुये ज़ौ शुंणों तेवी तैवे बोलो, “ज़ौ बीमारी मरना लै नेईं आ पर परमेश्वरे महिमा लै आ, ताकि लोग परमेश्वरो आदर करा।”

यीशु आपणैं दोस्ता कै प्यार करा त, पर ज़िदै स त तिदै स दि दिना सेके पोखय रोणों कि। तिन्ना दिया दिना बाद, तैवे आपणैं चैले लै बोलो, “आऔ वापस यहूदिये नगरा लै भागणों।” चैले ज़वाव देनो, “पर औ गुरू,एवी कुछ दिन पैहले तिदै लोग तोले मारनो चा तै!” यीशुये बोलो, “म्हारो दोस्त लाज़र सुत्ती गेयो, अज़ौ मेरे स झ़ैवणों आ।”

चैले यीशु लै ज़वाब देनो, “औ प्रभु, ज़ै लाज़र सुत्तो द आ, तै स ठीक होआ।” तेखो यीशुये तिन्ना लै साफ बोलो, “लाज़र मरी गेय। मूँ खुश आ कि मूँ तिदै नेईं त, ताकि तुमा मुंई मैंथे विश्वास करे सका।”

ज़ैबी यीशु लाज़रे ग्रावां दी पहुंचो, तेबी लाज़रा लै मरेय पैहले ही चार दिन गेये तै होये। मार्था यीशु कै मिलदै बैहरे आये अज़ौ बोले, “औ प्रभु, ज़ै तू ईंदै होआ त, तै मारो भाए ना मरा त। पर मूँ विश्वास करूँ कि ज़ौ कुछ बी तू परमेश्वरा कै मांगा स तोलै देया।”

यीशुये ज़वाब देनो, “दवारा कै ऊठणों अज़ौ ज़िंदगे मूँ आ। ज़ुंण बी मुंई मैथे विश्वास करा ज़ै स मरा बी ते बी ज़िंवदो होआ। ज़ुंण बी मुंईं मैंथे विश्वास करा स केवी ना मरा। खै तू एथा दी विश्वास करा?” मार्थे ज़वाव दैनो, “औ प्रभु, मूँ विश्वास करूँ कि तू परमेश्वरो भाऊ मसीह आ।”

तेखो मरियम आई। तेये यीशुई टांगा मैथे पढ़ीये बोलो, “औ प्रभु ज़ै तू ईंदै होआ त, तै मेरो भाए ना मरा त।” यीशु तिन्ना कै पुछो,“ थारै लाज़र किदै थोऔ द आ?” तिन्नै तैवु लै बोलो, “कब्रा दी। आ अज़ौ शा।” तेवी यीशु रोंदो लागो।

स कब्र एक ड़वार तै तेथे दुवारा दी एक ढोड़ खिस्कावे त लाओ द। ज़ैबी यीशु कब्रा दी पहुंचो तेखो तैवे बोलो, “ढोड़ा लै पौरे करो।” पर मार्थे बोलो तैवु लै मरीय चार दिन गेये हुये। तैवु कै बास आ हंणें।”

यीशुये ज़वाब देनो, “खै मेरे तुमा लै ना बोलो कि ज़ै तुमा मुंईं मैथे विश्वास करा तै परमेश्वरी शक्ती लै शा?” तैई तिन्नै ढ़ोड़ पौरे गाढ़ो।

तेखो यीशुये ऊवी सरगा बिलै शाईय बोलो, “औ बाप्पुआ, मेरी शुंणना लै मूँ तेरो शुकर करूँ । मूँ ज़ाणूँ कि तू सदा मेरी शुंणां, पर मेरे ज़ौ ईंदै खड़े सबी लोगे मदद करना लै बोलो ताकि, ज़ैं विश्वास करा कि तेरे मूँ भेज़ौ द आ।” तेखो यीशुये आवाज़ मारे, “औ लाज़र, निकड़ेय बैहरे आ!”

तेखो लाज़र बैहरे निकड़ो! स ऐवी बी कफना दी लिपटअ द त। यीशुये बोलो, “एऊ कफना लै गाढ़णां लै ऐवुये मदद करा अज़ौ ऐवु लै अज़ाद करो।” एऊ चमत्कारे बज़ै कै सारै यहुदीये यीशु मैंथे विश्वास कियो।

पर यहूदिये धर्मी अगुवे यीशु कै ज़ड़दै लागे, तैईं सें तरकीबा बणांऊदे एकी ज़ागा कठ्ठै हुये कि केणें करे यीशु अज़ौ लाज़रा लै मारे सकी।