38. यीशु पकड़ाऊवो

हर वर्ष, यहूदी लोग फसहो तैवार बड़ावा तै। ज़ौ एथे बारै दी तैवार त कि केणें करे केई शौ वर्ष पैहले परमेश्वरे तिन्नै पुरखा लै मिस्री देशे गुलामी कै छुड़ाऊव त। यीशुये पैहली बैरे सार्वजनिक रूपा दी प्रचार करनो अज़ौ शकैऊणों शुरू कियो लगभग चना बर्षा बाद। यीशुये आपणैं चैले लै बोलो कि स ऐवु फसहे लै तिन्ना सीथी यरूशलेमा नगरा दी बड़ाऊणं चा, अज़ौ ज़ौ बी कि तैवु लै तिदै ज़ानै मारा।

यीशुये चैले मांझी एक यहूदा नांवो एक आदमे त। यहूदा इस्सकरोती लै प्रेरिते पैसे थोले थौणें ज़िम्मेवारै तै देने दे, पर ज़्यादातर स तैया थोली कै पैसे चोरा त। यीशु अज़ौ चैले यरूशलेम नगरा दी पहुंचणें बाद, यहूदा इस्सकरोती यहूदी अगुवे आगे भागो। तैवे पैसे बदड़े अधिकारी लै यीशुये पेछांण बोलेय तैवु लै तिन्नै हाथा दी पकड़ावणेय विचार थोओ। स ज़ांणां त कि यहूदी अगुवे ऐवु ना माना कि यीशु मसीह त। स ज़ांणां त कि सें तैऊ लै मारनो चा तै।

महा पुरोहिते बोलणें दी अगुवे यीशु लै पकड़ावणां लै यहुदा इस्सकरोती लै तीस चांदीये सिक्कै दैने। ज़ौ ऐणों ही हुओ ज़ैणों कि परमेश्वरे ज़ांणकारे बोलो द त कि ऐणों होआ। यहूदा इस्सकरोती मानो अज़ौ पैसे पाईयो भागो स यीशु लै कैद खाने दी पाणां लै तिन्नै मदद करना लै मौको शांदो लागो।

यरूशलेम नगरी दी यीशुये आपणैं चैले सीथी फसहे तैवार बड़ावो। फसहे रोटी बैरे, यीशुये रोटे पाकड़ेय चोड़े। तैवुये बोलो, “एया रोटी खाओ। ज़ौ मेरो शरीर आ ज़ौ मूँ तुमा लै दैऊं। एथा लै मेरी यादा दी ऐणों ही करनो।” ऐणों करे, यीशुये बोलो कि स तिन्ना तैईं मरा, मतलब स तिन्ना तैईं आपणैं शरीरे बली देया।

तेखो यीशुये अंगुरो रसो गलास च़ुंगो अज़ौ बोलो,“ऐथा लै ज़ुटो। ज़ौ नोंवे वाचा मेरो खुन आ ज़ुंण मूँ बहाऊं, ताकी परमेश्वर थारै पापा लै माफ करा। थारै बी ज़ौई करनो ज़ुंण मूँ ऐबी करद लागो द आ, ताकी हर बैरे ज़ैबी तुमा ऐऊ ज़ुठा तै तुमै मुलै याद करा।”

तेखो यीशुये आपणैं चैले लै बोलो, “तुमा मांझी एक ज़ण मुलै पकड़ावा।” चैले हैरान हुये, अज़ौ पुछदै लागै कि कुंण ऐणों काम करा। यीशुये बोलो, “मेरो पकड़वाणें वाड़ो आदमै सये आ ज़ौआ लै मूँ ऐया रोटीये टुकड़ दैऊं।” तेखो तैवे स रोटीय टुकड़ो यदूदा इस्करोती लै देनो।

तेया रोटी लैणें बाद, यहूदा इस्करोती दी शैतान लागो। यहूदा निकड़ेय यीशु लै कैदखाने दी पाणां लै यहूदी अगुवे मदद करना लै भागौ। ज़ौ राच को वक्त त।

रोटी खाणें बाद, यीशु अज़ौ तैवे चैले ज़ैतून धारा लै भागे। यीशुये बोलो, “तुमा सब आज़ राची मुलै छाढ़ा। ज़ौ शास्त्रा दी लिखो द आ, ‘मूँ फुवाला लै मारू अज़ौ सारी भेड़ा औरे - पौरे बिखरा।’”

पतरसे ज़वाब देनो, “बेशक ही बाकी सब तौले छाढ़ा, पर मूँ ना छाढ़ू!” तेखो यीशुये पतरसा लै बोलो,“ शैतान तुमा सबी लै निंणों चा, पर औ पतरस, मेरे तौईं लै प्रार्थना किये दै आ की तू विश्वास ना खोआ। तेखो बी, आज़ राची , मुर्गे बाषणें कै पैहले तू चोना बेरे मेरो इन्कार करा। कि तू मुलै ज़ांणा बी ना।”

पतरसे यीशु लै बोलो, “चाए मूँ मरूं बी, मूँ केबी बी तेरो इन्कार ना करूँ!” बाकी सबी चैले बी ऐणों ही बोलो।

तेखो यीशु आपणैं चैले सीथी गतसमनी नांवे ज़ागा दी भागो। यीशुये आपणैं चैले लै प्रार्थना करना लै बोलो ताकी शैतान तिन्नै लै ना परखा। तेखो यीशु आप्पु बी प्रार्थना करदो भागो।

यीशुये चोना बैरे प्रार्थना किये, “औ मेरे बाप्पुआ, ज़ै होये सका तै मेहरवाने करेय ज़ौ दुखो गलास ज़ुटणां लै मुलै ना दै। पर ज़ै लोगे पाप माफ करना लै कोये दूज़ौ पैंढो नेईंया तै तेरे इच्छा पूरे चैईं हुये।” यीशु खास्सो ही बेचेन त अज़ौ तैवु लै शक्ति देणें लै परमेश्वरे एक स्वर्गदूता लै भेज़ौ।

हर बेरै यीशु प्रार्थना कै बाद, आपणैं चैले बिलै बापस आओ, पर सें सुत्तै गेये तै। ज़ैबी यीशु चोनवी बैरे तिन्ना बिलै बापस आऔ तेखो यीशुये बोलो, “खड़े ऊठो! मेरे पकड़ावणें वाड़ो इदै आ।”

तेबी यहूदी अगुवो, सिपाई, अज़ौ एक बढ़ै भीड़ा सीथी यहूदा इस्करोती आओ। तिन्नै तलवारै अज़ौ ड़ांण्ड़े च़ुंगे दै तै। यहूदा इस्करोतीये यीशु आगे आयेय तैवु लै बोलो, “औ गुरू, नमस्ते,” अज़ौ तैवु लै पोपे देने। तैवुये कैदखाने दी पाणें वाड़े आदमी लै यहूदी अगुवे लै खोज़णा तैई ऐणो कियो त। तेखो यीशुये बोलो, “औ यहूदा इस्करोती, खै तू एकी पोपी कै मुलै पकणांवदो लागो द आ?”

ज़ैबी सें सिपाई यीशु लै पाकड़दै तै लागै दै, तेखो पतरसे आपणैं तलवार गाढ़े अज़ौ महा पुरोहिते एकी नौकरो कान काटो। यीशुये बोलो, “तलवार लै दूर थौ। मूँ आपणैं बाप्पू कै मेरो बचाव करना लै, स्वर्ग दूते एक सेना लै विनते करे सकूँ। पर मूँई लै मेरे बाप्पूये बात मानणें जा।” तेखो यीशुये तैवु आदमीय काना लै ठीक कीयो। तेखो तिदा कै सारै चैले भागे।