39. यीशुय मुकदमो चालो

एबै ज़ौ आधी राचीय वक्त त। तिन्ना सिपाईये यीशु लै महा पुरोहिते घरै आणों, किल्हैकि स यीशु कै सवाल करनो चा त। पतरस दूरा कै तिन्नौ पिछो करदो त लागो द। ज़ैबी सिपाईये यीशु घरा भितरा लै निंयो, तेबी पतरस बैहरे रूकेय आगी सेकदो लागो।

घरा भितरै यहूदी अगुवे यीशु मैंथे मुकदमो चलावो। सें तैवुये खलाफ झुठी बाते बोलना लै सारै झुठे गवाह पायेय आये। हालाँकि, तिन्नै ब्यान एकी दुज़ै सीथी ना मिला तै। तैईं यहूदी अगुवे ऐवु साबित ना करै सके कि स कोई बातो दोशे त। यीशुये कुछ ना बोलो।

आखरीकार, माहा पुरोहिते सीधे ही यीशु बिलै शायेय बोलो, “हामा लै बोल की खै तुएई ज़िंवदै परमेश्वरो भाऊ मसीह आ?”

यीशुये बोलो, “हाँ, मूँ आ, अज़ौ तुमा मुंईं लै परमेश्वरे सीथी बेठो द अज़ौ स्वर्गा कै आन्दी बैरे बी शा।” महा पुरोहिते आपणैं ज़ुड़ेकै चिरै किल्हैकि ज़ौ यीशुये बोलो तेया बाता मैंथे स बढ़ो गुस्सो त। तैवुये दुज़ै अगुवे लै हाक्कै लाई, “हामा लै ऐवु बोलणां लै अज़ौ कोये गवाहे ज़रूरत नेईंया कि ऐवु आदमीये खै कियो द आ! थारै आप्पुये ऐवुले ऐणों बोदलौ बैरे शुणीं गेयो कि स परमेश्वरो भाऊ आ। ऐवुये बारै दी थारो खै बचार आ?”

सबी यहूदी अगुवे महा पुरोहिता लै ज़वाब देनो, “ज़ौ मरने काबिल आ!” तेखो तिन्नै यीशुई आखी दी पाट्टे बांने, तैवु दी थुको, स मारो, अज़ौ तैवु सिथी ठाठ्ठै मखौल कियो।

अज़ौ पतरस, ज़ैबी स घरै बैहरे रूकैय त रोओ द। तेवी एकी, नोकराणी छौटिये स शाऔ। तेये तैवु लै बोलो, “तू बी यीशु सीथी त!” पतरसे मना कियो। बादा कै, कोये दूज़ी छौटिये ऐया बाता लै पुछो, अज़ौ पतरसे द्वारा कै मना कियो। आखरी बैरे, कुछ दुज़ै लोगे बोलो, “हामे ज़ाणी की तु यीशु सीथी त किल्हैकि तुमा दीगे गलीले लाक्कै कै आ।”

तेबी पतरसे बोलो, “ज़ै मूँ ऐवु आदमी लै ज़ांणूँ तै परमेश्वर मुलै शराप देया!” तैबीये पतरसे ऐणों सौह खाणें बाद, एक मुर्गो भाषौ। यीशुये पिछे मुड़ेय पतरसा बिलै शाऔ।

पतरस तिदै कै भागौ अज़ौ फुटे फूटेय रोओ। तैवु वक्त, यीशु लै पकडावणें वाड़े यहूदा इस्करोतीये शाऔ कि यहूदी अगुवे यीशु लै मौते सज़ा देने। यहूदा खास्सो दुखी हुओ अज़ौ बागेय आपणैं आत्म हत्या किये।

एवै तैऊ देशो राजपाल पितालुस त। स रोमी सरकारा लै काम करा त। यहूदी अगुवे यीशु पितालुसा बिलै आणों। से चाहा तै कि पितालुस तैवु लै मौते सज़ा देया अज़ौ तैवु लै ज़ानै मारा। तेखो पितालुसे यीशु कै पुछौ, “खै तू यहूदियो राज़ो आ?”

यीशुये ज़वाब दैनो, “तेरे सच बोलो। पर मेरो राज़ ऐया धरतीय नेईंया। ज़ै होआ त मेरे नौकर मेरी तैईं लड़ा तै। मूँ धरती दी परमेश्वरे बारै दी सच बोलदो आऔ द आ। हर एक ज़ंण ज़ुंण सच्चा के प्यार करा स मेरी शुंणां।” पिलातुसे बोलो,“कि सच्च खैया?”

यीशु सीथी बाते करने बाद, पिलातुसे बैहरे भीड़ा आगे भागेय बोलो, “मेरे ऐणें कोये बज़ा ना शाये कि ज़ौ आदमी मरने कबिल आ।” पर यहूदी अगुवे अज़ौ भीड़े चचैवे-चचैवेय बोलो, “तैवु लै क्रूसा दी चढ़ावो!” पितालुसे ज़वाब देनो, “स कुछ बी गलत करनेय दोशे नेईंया।” पर सें अज़ौ बी ऊष्टी अवाज़ा कै चचैवंदे लागे। तेखो पिलातुसे चोनुवी बैरे बोलो, “स दोशी नेईंया!”

पिलातुस डरो कि स भीड़ लाड़ाई झगड़ो शुरू करा, तैईं स आपणैं सिपाई कै यीशु लै क्रूसा लै चढ़ाऊणा लै मानो। रोमी सिपाईये यीशु दी कोड़े मारे। अज़ौ तैवु दी राज़े ज़ुड़कै भड़ैऊवे, अज़ौ तैवे मुंड़ा दी कांड़ेओ बणोंदो ताज़ थोऔ। तेखो ऐणों बोलिय तैवो ठाठ्ठो मुखौल करदे लागे, “शाऔ, यहूदीयो राज़ौ!”