40. यीशु लै क्रूसा दी चढ़ाऊवो

यीशुये ठाठ्ठै मुखौल करने बाद, सिपाईये स क्रूसा दी चढावंणें लै निंयो। तिन्नै स क्रूस तैवु कै ही चौकणां लै देनो। ज़ौआ दी तैवु लै मोरनो त।

तिन्ना सिपाईये यीशु तैया ज़ागा दी आणों ज़ौआ लै “खोपड़े” बोला तै अज़ौ तैवुये हाथा अज़ौ टांगा दी परैगा लायेय क्रूसा दी चढ़ाऊवो। पर यीशुये बोलो, “औ बाप्पुआ, इन्ना लै माफ कर, किल्हैकि ज़ै ना ज़ाणां कि ज़ैं खै करदे लागे दै आ।” तिन्ने तैवुये मुंड़ा मैंथे क्रुसा दी एक ताख्तै बी टांगे। तेथा दी लिखो द त, “यहूदियो राज़ो।” पिलातुसे तिन्ना लै ऐणों लिखणां लै बोलो द त।

तेखो सिपाईये यीशुये ज़ुड़कै लै चिठ्ठी पायी। ज़ैबी तिन्नै ऐणों कियो तिन्नै तेया पवित्र शास्त्रा दी लिखी दी भविष्यवाणीं लै पूरो कियो ज़ौआ दी बोलो द त, “तिन्नै मेरे ज़ुड़कै आप्पू मांझी बांटे, अज़ौ मेरे जुड़कै लै चिठ्ठी पाई।”

तिदै दी डाकू बी तै, ज़ौआ लै सिपाईये तैवु वक्ता दी क्रूसा दी चढ़ाऊव द त। यहूदिये तिन्ना लै यीशुये औरशी पौरशी क्रूसा दी चढ़ाऊवे। तिन्ना मांझी एकी डाकुये यीशुयो ठाठ्ठो कियो, पर दुज़ै बोलो, “खै तू ना डरा कि परमेश्वर तौईं लै सज़ा देया? हामा ता सारै नैड़े कामा करेय दोशी बणैं दै आ, पर ज़ौ आदमे निर्दोश आ।” फेर तैवे यीशु लै बोलो, “ज़ैवी तू आपणैं राज़ा दी आ तेवी मेहरवाने करेय मुलै याद थौये।” यीशुये ज़वाब देनो, “आज़ै तू मुंई सीथी स्वर्ग लोका दी होणों।”

तेवी यहूदी अगुवे अज़ौ भीड़े दुज़ै लोग यीशुओ ठाठ्ठै करदै लागे, तिन्नै तैवु लै बोलो, “ज़ै तू परमेश्वरो भाऊ आ तै क्रूसा कै हून्दी ऊतरेय आ अज़ौ आप्पू लै बचाव! तैईं हामा तोईं मैंथे विश्वास करी।”

तेखो तैवु देशो सरग पूरो काड़ो हुओ, बैशक स मांझ दुसको वक्त त। ज़ौ दुसके वक्त दी काड़ो हुअ द त अज़ौ चोना घांटे सेके ऐणों ही रोहो त।

तेखो यीशुये हाक्का मारेय बोलो, “पूरो हुओ! औ बाप्पुआ, मूँ आपणीं आत्मा तेरे हाथा दी दैऊं।” तेखो तैवुये आपणों मूँड़ ऊटो पाओ अज़ौ आपणैं प्राण छाड़े। ज़ैवी स मरो तै एक ज़ाजरो हुओ। स बड़ो पर्दो ज़ुंण परमेश्वरे हाज़िरी कै लोगा लै अलग करा त, तेथे मैंथे कै तोढ़ा सेके चिरूवे दी टुकड़े बोणें।

आपणैं मौता कै, यीशुये लोगा लै परमेश्वरे बिलै भागणेय पैढ़ो खोलो। ज़ैबी यीशुये निगराणें करने वाड़े एकी सिपाईये ज़ौ सब कुछ शाऔ तेखो तैवे बोलो,“पाक्कै दी, ज़ौ आदमे निर्दोश त। ज़ौ परमेश्वरो भाऊ त।”

तेखो यूसुफ अज़ौ निकुदेमुस नांवे दी यहूदी अगुवे आये। सें विश्वास करा तै कि यीशु मसीह आ। तिन्नै पिलातुसा कै यीशुओ शरीर मांगो। तिन्नै यीशुये शरीरा लै ज़ुड़कै मांझी लपेटो। तेखो तिन्नै तैवु लै एकी ढोड़ा कै काटेय बणांऊवे दै कब्रा दी निंयो अज़ौ तेथा भितरे थोओ। तेखो तिन्नै तेया कब्रे दुवारा लै बंद करना लै एक बड़े ढ़ोड़ खिसकाऊवेय लाऔ।