41. परमेश्वरे यीशु मुर्दे मांझी कै ज़िंवदो कियो

सिपाईये यीशु लै क्रूसा दी चढ़ावणें बाद, यहूदी अगुवे पिलातुसा लै बोलो, “तैवु झुठै, यीशुये बोलो द त कि स चोना दिना बाद मुर्दे मांझी कै ज़िवदो होआ। कोई लै एऊ पाक्कै करने तैईं कब्रे निगराणें करने ज़ा ताकि तैवु चैले तैवे शरीरा लै चोरेय नां निंया। ज़ै सें एणों करा तेखो सें बोला कि स मुर्दे मांझी कै ज़िंवदो हुओ द आ।”

पिलातुसे बोलो, “कुछ सिपाई लै निंओ, अज़ौ ज़ेणों तुमा करे सका तैणीं ई कब्रे निगराणें करो।” तैई तिन्नै तेया कब्रा भितरै भागणें दवारा दी एक मोहर लाये। तिन्नै ऐऊ पाक्कै करने तैईं तिदै सिपाई बी बशै कि कोये तेवुये शरीरा लै चोरे ना सका।

यीशुये मरने बादा कै दिन सब्तो दिन त। कोये बी सब्ते दिन काम ना करी सका त, तैईं यीशुये कोये बी दोस्त कब्रा दी नां आओ। पर सब्ते बादा वाड़े दिन, दोती साना खुलीये, कुछ छैऊड़ी यीशुये कब्रा दी भागणैं लै तैयारूवी। सें तैवुये शरीरा दी अज़ौ बी खुशबुदार तेल लाणों चाहा ती।

तिन्ना छैऊड़ीये पहुंचणें कै पैहले, कब्रा दी एक बड़ो ज़ाज़रो हुओ। स्वर्गा कै स्वर्ग दूत आये तैवु ढोड़ा लै खिसकाऊवो, जुंण कब्रा भितरे भागणें दवारा दी लाओ द त अज़ौ तेथा मैंथे बैठो। स स्वर्गदूत दुस्स ज़ैयों चमकदो त लागो द। कब्रा दी ज़ुंण सिपाई तै तिन्नै स शाऔ। सें एतरे डरे कि सें मुर्दे साही माट्टै मैंथे पोढ़े।

ज़ैबी सें छैऊड़ी कब्रा दी पहुंची तेखो तैवु स्वर्गदूते तिन्ना लै बोलो, “डरो ना। यीशु ईंदै नेईंया। स मरे दै मांझी कै ज़िंवदो हुओ द आ, ज़ेणों कि तैऊवे बोलो द त कि स ज़िवदो होआ! कब्रा दी लोढ़ो अज़ौ शाऔ।” से छैऊड़ी कब्रा भीतरै भागी अज़ौ ज़िदै यीशुयो शरीर थोऔ द त, तिदै लोढ़ो अज़ौ शाऔ कि तैवुवो शरीर तिदै नेईं त!

तेखो तैवु स्वर्ग दूते तिन्ना छैऊड़ी लै बोलो,“ भागेय तैवुये चैले लै बोलो, ‘यीशु मरेदे मांझी कै ज़िवदो हुओ द आ अज़ौ स तुमा कै पैहले गलील लाक्कै लै भागा।’”

सें छैऊड़ी हैरान हुई अज़ौ सें बड़ी भारी खुश हुई। सें चैले लै एऊ खुशीये समाचार सुनावणां लै दौड़ी।

ज़ैबी सें छैऊड़ी चैले लै एऊ शुभ संदेशे बोलणां लै आपणैं पैढ़े दी ती, तेवी यीशु तिन्ना आगे प्रकट हुओ। सें तैवी टांगा मैंथे पड़ी । तेखो यीशुये बोलो,“ डरो ना। भागेय मेरे चैले कै गलील लाक्कै लै भागणां लै बोलो । सें तिदै मुलै शा।”