42. यीशु स्वर्गा लै भागौ

ज़ौआ दिन परमेश्वरे यीशु लै मुर्दे मांझी कै ज़िवंदो कियो त, तैवे दी चैले बीढ़े वाड़े ग्रांवा दी भागदै तै लागे दै। हांढदी बैरे सें यीशु सीथी ज़ौ हुओ द त, तैथे बारै दी चोपड़दे तै लागे दै, तिन्ना लै आशा तै कि सोये मसीह आ, पर तेखो बी स मारे गेयो त। ऐबे सें छैऊड़ी बोलदी ती लागी दी कि स द्वारा कै ज़िवंदो हुओ द आ। सें ना ज़ाणां तै की कुंण ज़ैई बातो विश्वास करनो आ।

यीशुये तिन्ना आगे भागेय तिन्ना सीथी हांढ़णौं शुरू कियो, पर सें पछेणें ना सके। तैवुये पुछो की सें कियु बारै दी चोपड़दे लागे दै आ। तिन्नै तैवु लै पिछले दिना दी यीशु सीथी घटै दै पुरै घटना बारै बोलो। तिन्नै सोचो की सें कोये परदेशी सीथी चोपड़दै लागे दै आ ज़ुंण ना ज़ाणां त की यरूशलेमा दी खै हुओ द आ।

तेखो यीशुये तिन्ना लै समझाऊवो की परमेश्वरे वचन मसीहे बारै दी खै बोला। खास्से पैहले, परमेश्वरे ज़ांणकारे बोलो कि नैढ़े लोग मसीह लै दुख देया अज़ौ ज़ानै कै मारा। पर परमेश्वरे ज़ांणकारे ऐणों बी बोलो त कि स चोनवे दिन ज़िवंदो होआ।

ज़ैबी सें तैवु नगरा दी पौचें ज़िदै सें दी ज़ंण रूकणो चाहा तै, तेवी तकरीबन बैड़ गेये तै होये। तिन्नै यीशु लै तिन्ना सीथी रूकणां लै नैवतो देनो, तेखो स तिन्ना सीथी एकी घरा दी भागौ। सें आपणीं बैड़की रोटी खांदे बैठे। यीशुये एक रोटे चुंगेय तैथा लै परमेश्वरो शुकर कियो, अज़ौ फैर स चोड़े। एकी दमा कै, तिन्नै ज़ांणो कि स यीशु त। पर तैवी वक्ता दी, स तिन्नै आखी आगे कै गायव हुओ।

तिन्ना दिगी ज़ंणें एकी दुज़ै कै बोलो, “स यीशु त! तैईं ज़ैबी तैऊवे हामा लै परमेश्वरो वचन समझाऊवो त तेबी हामा बढ़े खुशी तै!” तैबी सें निकड़ेय वापस यरूसलेम नगरा लै भागे। ज़ैवी सें पौंचे तेखो तिन्नै चैले लै बोलो, “यीशु ज़िवंद आ! म्हारे स शाऔ द आ!”

ज़ैबी चैले चपड़दै तै लागे दै, यीशु एकीदमा कै तैवु कमरे दी तिन्ना मांझ प्रकट हुओ। तैवे बोलो, “तुमा लै शांते मिलणें चैईं!” चैले सोचो की स कोये भूत त, पर यीशुये बोलो, “तुमा कियु लै डरा? तुमा ऐवु किल्है ना सोचा की सच्ची लै मूँ, यीशु आ? मेरे हाथ अज़ौ टांगा लै शाऔ। दुष्‍टात्‍मा आगे ऐणो शरीर ना होआ ज़ैणों मुईं आगे आ।” ऐणों दिखाऊणा लै की स कोए भूत नेईं त, तैवुये खांणा लै कुछ मांगो। तिन्नै तैवु लै माच्छलीय एक टुकड़ो देनो अज़ौ तैवुये स खाऔ।

यीशुये बोलो, “मेरे बारै दी परमेश्वरो वचन ज़ौ बी बोला स पूरो होआ। मेरे तुमा लै बोले गेयो त कि ऐणों होणो ज़रूरे आ।” तेखो यीशुये तिन्ना लै परमेश्वरो वचना बांकै करे समझाऊवो। तेवे बोलो, “खास्से पैहले परमेश्वरे ज़ांणकारे लिखो द त कि मूँ,मसीह लै दुख सेहंणं जा, मरनो जा अज़ौ चोनवे दिना मरे दै मांझी कै ज़िवंदो होणों जा।”

“तिन्ना परमेश्वरे ज़ांणकारै ऐणों बी लिखो द त कि मेरे चैले परमेश्वरे वचने घोषणां करा। सें हर एका लै पश्चताव करना लै बोला। ज़ै सें ऐणों करा तै परमेश्वरे तिन्नै पापा लै माफ करा। मेरे चैले ऐवु संदेशेय प्रचार करनो यरूशलेमा कै शुरू करा। तेखो सें सबी ज़ागा सवी जाति मांझी भागा। तुमा लोग मेरे हर एक बाते अज़ौ कामे गवाह आ ज़ुंण मेरे बोलो अज़ौ कियो त, अज़ौ तैवु सब बी ज़ौ मुईं सीथी हुओ।”

आगले चाड़ी दिना सेके, यीशु आपणैं चैले आगे केई बैरे प्रकट हुओ। ऐकी बैरे ता स एकी वक्ता दी पांज़ शौ कै ज़ादै लोगा मांझी प्रकट हुओ! तैवुये आपणैं चैले लै केई तरीके कै साबित कियो की स ज़िवंदो त, अज़ौ तैवुये तिन्न लै परमेश्वरे राज़ा बारै दी शखैऊवो।

यीशुये आपणैं चैले लै बोलो, “परमेश्वरे मुईं लै स्वर्गा अज़ौ धरती दी हर एक ज़णां मैथे राज़ करनेय हकअ देनो दआ। तैई ऐवे मूँ तुमा लै बोलू भागेय सवी जातिये लोगा लै चैले बढाओ। ऐणों करना लै तुमा लै, तिन्ना लै बाप्पु, भाऊ, अज़ौ पवित्र आत्मै नांवा कै बपतिस्मा देणों जा। ज़ौ बी मेरे तुमा लै हुकम देनो द आ, तिन्ना सब बाता मानणीं बी थारै सिखाऊणें जा। याद थोऔ, कि मूँ सदा तुमा सीथी रोहूँ।”

यीशुये मरेदे मांझी कै ज़िवंदे होणे चाड़ी दिना बाद तैवुये आपणैं चैले लै बोलो, “ज़ैबी सेके मेरो बाप्पु तुमा लै सामर्थ ना देया, तेवी सेके यरूशलेमा दी रूकेय रहो। स तुमा मैंथे पवित्र आत्मा भेजय ऐणों करा।” तेखो यीशु स्वर्गा लै भागो, अज़ो एकी बादड़ै तैवु लै तिन्नै आखी कै चोरो। स्वर्गा दी यीशु सबी चीज़ा मैंथे राज़ करद परमेश्वरे सुल्टी बिलै बैठो।