43. मंड़लीये शुरूआत हुये

यीशुये स्वर्गा लै भागणैं बाद, चैले यरूशलेम नगरी दी ई रूके ज़ैणो की यीशुये तिन्ना लै करनेय हुकम देनो द त। तिदै विश्वासी लोग लागातार एकी सीथी प्रार्थना करना लै कठ्ठे होआ तै।

हर साल, फसहे तैवारे पचास दिना बाद, यहूदी लोग पिन्तेकुस्त नांवे एक खास्स दिन लै मनावा तै। पिन्तेकुस्त स वक्त त ज़ैबी यहूदी लोग गिंहूये कटाई लै बड़ावा तै। सारै संसारा कै यहूदी लोग पिन्तेकुस्ते दिना लै एकी, सीथी मनावड़े लै यरूशलेमा दी आये दै तै। ऐया वर्षा, पिन्तेकुस्त बड़ावड़ेय वक्त यीशुये स्वर्गा लै भागणें लगभग एकी हप्ते वाद आऔ त।

ज़ैऊ वक्ता सारै विश्वासी एकी सीथी कठ्ठै तै, ज़ौआ घरा दी सें तै एकी दमा कै स तेज़ हावी अवाज़ा कै भरूवो। तेवी आगीये लपटे ज़ैंओ दिखणें वाडो कुछ सब विश्वासीये मुंड़ा मैंथे प्रकट हुऔ। सें सब पवित्र आत्मा कै भरूवे अज़ौ सें दुज़ी भाषा दी परमेश्वरी सतुती करदै लागे। सें इन्ना भाषा लै ना ज़ांणां तै। ज़ै सें भाषा ती ज़ौआ लै बोलणा लै तिन्ना लै पवित्र आत्मे काबिल बड़ावो।

ज़ैबी यरूशलेमा दी रोणें वाड़े लोगे स शौर शुणों, तेखो सें भीड़ा दी देखणा लै एकी सीथी काठ्ठै हुये कि खै होन्दो लागो द आ। तिन्नै विश्वासी कै परमेश्वरै किये दै बढ़े-बढ़े कामे घोषणां करदी बैरे शुणों। सें सब हैरान तै किल्हैकि बेशक सें केई अलग अलग देशा कै तै अज़ौ केई अलग अलग भाषा बोला तै, फैर बी सें तिन्ना कामा लै आपणीं भाषा दी शुंणां तै। चैले इस्राएला दी तै अज़ौ अरामी, इब्रानी, यूनानी भाषा बोला तै, पर लोग आपणीं मातृभाषा दी शुणदै तै लागे दै कि परमेश्वरे खै खै कियो द आ।

इन्ना मांझी कुछ लोगे बोलो कि सें चैले नशे दी आ। पर पतरस खड़े हुऔ अज़ौ तिन्ना लै बोलो, “मेरी बाते शुंणो! ज़ै लोग नशे दी नेईया! एथे ज़ागा दी, ज़ौ तुमा शा ज़ौ सोये आ ज़ुंण योएल परमेश्वरे ज़ांणंकारे बोलो द त कि होआ : परमेश्वरे बोलो, ‘कि अंते दिना दी, मूँ आपणैं आत्मा उड़ेलूँ।’”

“औ इस्राएली मर्दो, यीशु एक ऐणों आदमे त ज़ौरे ऐणों दिखावणां लै कि स कुंण त बढ़े भारी अनोखो काम किये तै। तैवुये परमेश्वरी शकिती कै बढ़े भारी अनोखे कामा लै कियो त। तुमा ऐवु जाणां किल्हैकि थारै इन्ना काम लै शाऔ द आ। पर थारै तैवु लै क्रुसा दी चढाऊवो!”

“यीशु मरो पर परमेश्वरे तैवु लै मरेदै मांझी कै ज़िंवदो कियो। ऐथे ऐआ बाता लै पुरो कियो ज़ौआ लै एकी परमेश्वरे जांणकारे लिखो द त: ‘तू आपणैं पवित्र ज़ंणां लै कब्रा दी सड़ने ना देया।’ हामे गवाह आ की परमेश्वरे यीशु लै दवारा कै ज़िंवदो कियो।”

“परमेश्वर बाप्पुये ऐवे यीशु लै आपणीं सुलटी बिलै बेशैय ऐबे आदर देनो द आ। अज़ौ यीशुये हामा लै पवित्र आत्मा भेज़ौ द आ ज़ैणों कि तैवुये सोह किये दै तै कि स भेज़ा। पवित्र आत्मा ही इन्ना सवी कामा लै होणें देदो लागो द आ ज़ौआ लै तुमा शा अज़ौ शुंणदे लागे दै आ।”

“थारै स आदमे, यीशु लै क्रुसा दी चढ़ाऊवो। पर बाक्कै करे शुणों कि परमेश्वरे यीशु लै सबी चीज़ा मैंथे प्रभु अज़ौ मसीह दीगै ठेराऊवो द आ!”

पतरसा लै शुंणने वाड़े लोग तैवे बोली दी बाते शुंणेय भीतरे सेके हिलै गये तै, तैई तिन्नै पतरस अज़ौ चैले कै पुछो, “औ भाईयो, म्हारे खै करनो चैईं?”

पतरसे तिन्ना लै ज़वाब देनो, “तुमा मांझी कै हर एक ज़ंण आपणैं पापा लै पश्चाप करो, ताकि परमेश्वर थारै पापा लै माफ करा अज़ौ यीशु मसीहे नांवा कै बपतिस्मा लेऔ । तैई तुमा लै स पवित्र आत्मा वरदने रूपा दी देया।”

पतरसे ज़ौ बोलो तैवु वक्त लगभग चन हज़ार लोगे विश्वास कियो अज़ौ यीशुये चैले बणें। तिन्नै बपतिस्मा लैयो अज़ौ यरूशलेमा दी मंड़लीयो हिस्से बंणैं।

ज़ैबी प्रेरित तिन्ना लै शखैऊवा तै विश्वासीये लागातार शुणों। सें ज्यादातर मिला तै अज़ौ एकी सीथी रोटी खा तै, अज़ौ सें ज्यादातर एकी दुज़ै लै प्रार्थना करा तै। सें मिलेय परमेश्वरे ज़य ज़यकार करा तै अज़ौ ज़ौ कुछ बी तिन्ना आगे त सें एकी दुज़ै कै बांटा तै। नगरो हर एक आदमे तिन्नै बारै दी बढ़िया सोच थौआ त। हर रोज़, ज्यादै खै ज्यादै लोग विश्वासे बणंदे लागे।