44. पतरस अज़ौ यूहन्ना एक भिखारी लै ठीक करा

एक दिन,पतरस अज़ौ यूहन्ना मांदरा लै भागे। एक आपंग आदमे भीख मांगणां लै दवारा दी बेठो द त।

पतरसे तैवु लांगड़े आदमी बिलै शाऔ अज़ौ बोलो, “मूंई आगे तोईं लै देणां लै पैसे ता नेईंया। पर ज़ौ मुंई आगे आ तैवु तौले दैऊं। यीशुये नांवा कै खड़ो ऊठ अज़ौ औरे-पौरे हांढ!”

तेवीये परमेश्वरे तैवु लांगड़े आदमी लै ठीक कीयो। तेवे औरे-पौरे हांढणों अज़ौ कूदणों अज़ौ परमेश्वरे ज़य ज़यकार करने शुरू किये। मांदरे आगंना दी आये दै लोग तैवु चमत्कार शायेय हैरान तै।

स्ताबी लोगे एक भीड़ तैवु आदमी लै शांदे आये ज़ुंण ठीक गेयो त होये। पतरसे तैवु लै बोलो, “ज़ौ आदमे ठीक गेयो होये पर ऐया बाता दी हैरा ना होणों। म्हारे ऐवु लै आपणीं शक्ती कै ठीक ना कियो, या तैईं ना कि हामे परमेश्वरो आदर कोरी। बल्कि, स यीशु आ ज़ौरे ऐवु आदमी लै आपणीं शक्ति कै ठीक कीयो, किल्हैकि हामा यीशु मैंथे भरोसो थौईं।”

“तुमा सोए आ ज़ौरे तैवु रोमी राज्पाला लै यीशु लै मारना लै बोलो त। थारै स मारो ज़ुंण सबी लै ज़िंन्दगे दैया। पर परमेश्वरे तैवु लै मरे दै मांझी कै ज़िवंदो कियो। थारै ना समझो कि तुमा खै करदै लागे दै तै। पर ज़ैबी तुमा तिन्ना कामा लै करदै तै लागे दै, तैबी ज़ौ परमेश्वरे ज़ांणकारे बोलदो त स पूरो कीयो। तिन्नै बोलो द त कि मसीह दुख सेहा अज़ौ मोरा। परमेश्वरे ऐया लै ऐवु तरीके कै होणें देनो। तैईं ऐवे, पश्चातव करो अज़ौ परमेश्वरा बिलै फीरो, ताकी स थारै पापा लै धोएय साफ करा।”

ज़ैवी मांदरे अगुवे पतरस अज़ौ यूहन्ना लै शुणों, तेखो सें बढ़े भारी डरै। तैईं तिन्नै तिन्ना लै पतरस अज़ौ यहून्ना लै पाकड़ेय कैदखाने दी पाऔ। पर ज़ौ पतरसे बोलो त तैथा मैंथे खास्से लोगे विश्वास कियो। यीशु मैथे विश्वास करने वाड़े लोगे तायदाद तकरीवन पांज़ हज़ार हुये।

आगले दिन, तिन्ना यहूदी अगुवे, पतरस अज़ौ यूहन्ना लै महा पुरोहित अज़ौ दुज़ै धर्मी अगुवे आगे आणें। तिन्नै तैवु आदमी लै बी आणों ज़ुंण अपंग त। तिन्नै पतरस अज़ौ यूहन्ना कै पुछो,“ कोआ हक्का कै थारै ज़ौ आपंग आदमे ठीक कियो?”

पतरसे ज़वाब देनो, “ज़ौ आदमी ज़ुंण तुमा आगै खड़ो आ ऐवु लै यीशु मसीहये शक्ति कै ठीक कीयो द आ। थारै यीशु लै क्रुसा दी चढ़ाऊवो, पर परमेश्वरे तैवु लै मरेदे मांझी कै ज़िंवदो कियो! थारे तेववो अस्वीकार कियो, पर यीशुए शक्ति कै अलावा मुक्ते पाणां लै कोये दुज़ौ पैढ़ो नेईंया!”

सें अगुवे हैरान तै कि पतरस अज़ौ यूहन्ने बढ़े दम्मा कै बात किये दै तै। तिन्नै शाऔ की ज़ै आम आदमै तै ज़ुंण की अनपढ़ तै। पर फैर तिन्ना लै याद आऔ की ज़ै मर्द यीशू सी रोहे दै तै। तैई तिन्नै तैवु लै बोलो, “हामा तुमा लै खास्से सज़ा देई, ज़ै तुमा ऐवु आदमी यीशुए बारै दी लोगा लै कोये दुज़ौ संदेश देया।” ऐणीं खास्सी बाते बोलणें बाद, तिन्नै पतरस अज़ौ यूहन्ना लै भागणें देनो।