45. स्तिफनुस और फिलिप्पुस

पैहले मसीह अगुवे मांझी स्तिफनुस नांव एक मर्द त। सब लोग तेवो आदर करा तै। पवित्र आत्मे तैवु लै खास्से समझ अज़ौ शक्ते देने दै तै। स्तिफनुसे खास्से चमत्कार किये दै तै। ज़ैबी तिन्नै यीशु मैंथे विश्वास थौणें बारै तिन्ना लै शकैऊवो तेवी खास्से लोगे तैवु मैंथे विश्वास कियो।

एकी दिन, स्तिफनुस यीशुये बारै दी शखैऊदो त लागो द अज़ौ कुछ ऐणे यहूदी आये ज़ौरे यीशु मैंथे विश्वास नेईं त कियो द अज़ौ तैवु सीथी बेहस- बाज़ै करने शुरू किये। सें बड़े भारी गुस्से हुये, तेईं सें धर्मी अगुवे आगे भागे अज़ौ तेवुये बारै दी झुठो बोलो। तिन्नै बोलो, “कि म्हारे स्तिफनुसा लै मुसा अज़ौ परमेश्वरा बारै दी नेढ़ी बातै बोलदी बैरे शुणों!” तैईं धर्मी अगुवे स्तिफनुस लै पाकड़ो अज़ौ तैवु लै महा पुरोहिता अज़ौ यहूदिये दुज़ै अगुवे आगे आणों। अज़ौ बी झूठे गवाह आये अज़ौ तिन्नै स्तिफनुस बारै दी झूठ बोलो।

माहा पुरोहिते स्तिफनुसा कै पुछो, “खै ज़ै लोग तेरे बारै दी सच्‍ची बोलदै लागे दै आ?” स्तिफनुसे महा पुरोहिता लै ज़वाब देणा लै खास्सी बाते बोलणीं शुरू की। तैवे बोलो कि अब्राहमे वक्ता कै यीशुये वक्ता तैईं परमेश्वरे इस्राएला दी खास्से नोखै काम किये दै आ। पर लोगे सदा ई परमेश्वरे बात ना शुणी। स्तिफनुस बोलो,“ तुमा लोग परमेश्वरे खलाफ हठी अज़ौ परमेश्वरो विरोध करने वाड़े आ। थारै सदा लै पवित्र आत्मा अस्वीकार किये, ज़ैणों की म्हारे पुर्खे सदा ई पवित्र आत्मा ना स्वीकारै अजौ सदा ई तैवे परमेश्वरे ज़ांणकारा लै ज़ानै मारा तै। पर ज़ौ बी तिन्नै कियो त तैथी तुलना दी थारै अज़ौ बी बुरौ कियो द आ! थारै मसीहा लै मारो!”

ज़ैबी धर्मी अगुवे ज़ौ शुंणो, तेखो सें एतरे गुस्सो हुये कि तिन्नै आपणें कान बंद किये अज़ौ ऊषटी आवाज़ा दी चचैवे। तिन्ना स्तिफनुस घसीटेये नगरा कै बैहरे निंयो अज़ौ तैवु लै मारना लै तैवु दी ढोड़ मारै।

ज़ैबी स्तिफनुस मरदो त लागो द, तैवे ज़ौरे कै बोलो, “औ यीशु, मेरी आत्मा लै ग्रहण कर!” तेखो स आपणैं ज़ानूं मैंथे पड़ो अज़ौ द्वारा कै ज़ौरा कै बोलो,“ औ प्रभु, ऐवु पापा इन्ना मैंथे ना लायै।” तेखो स मरो।

तैवु दिन कै यरूशलेम नगरी दी रोणें वाड़े खास्से लोगे यीशु लै मानड़ै बाड़े लै सताव शुरू कियो, तैईं विश्वासी लोग दूज़ी ज़ागा लै भागे। पर ऐथे बाबज़ूद, बी ज़िदै बी सें भागे तिन्नै यीशुये बारै दी प्रचार कीयो।

फिलिप्पुस नांवो यीशुओ एक विश्वासे त। ज़ैणों कि दुज़ै खास विश्वासीये कियो द त, स बी यरूशलेमा नगरी कै भागो। स सामरिया लाक्‍कै दी तिदै तैवे लोगा मांझी यीशुये बारै दी प्रचार कीयो। खास्से लोगे तैवु मैंथे विश्वास कियो अज़ौ मुक्तै पाये। एकी दिन फिलिप्पुसा आगे परमेश्वरी बिलै कै एक स्वर्गदूत आऔ अज़ौ तैवु लै ज़ांगला दी भागणां लै अज़ौ एकी सड़की दी हांण्ढणां लै बोलो। फिलिप्पुस तिदै भागौ। ज़ैबी स तैया सड़की दी हांण्ढदो त लागो द, तेखो तिन्नै एकी आदमी लै आपणैं रथा दी भागदी बैरे शाऔ। ज़ौ आदमी कुश देशो एक खास मुलाज़म त। पवित्र आत्मा फिलिप्पुसा लै बोलो कि भागेय तैवु आदमी कै बात कर।

तेखो फिलिप्पुस रथा बिलै भागो। तैवे शुणों कि स कुशे परमेश्वरे वचना लै पढदो त लागो द। जुणं यशायाह परमेश्वरे जाणंनकारे लिखदअ स पढ़दो त लागो द की, “तैवु लै काटणां वाड़ी भेड़ा साई नियों, अज़ौ ज़ैणों एक चैड़टू शान्त रोहा, तैवुये बी एक शब्द बी ना बोलो। तिन्नै तैवु सीथी बढ़ बुरो बर्ताव कीयो अज़ौ तेवो आदर ना कियो। तिन्नै तैवे प्राण गाढ़ै।”

फिलिप्पुसे तैवु कुशी कै पुछो, “ज़ौ तु पढ़दो लागो द आ खै तू ऐथा लै समझा बी?” तैवु कुशीए ज़वाब देनो, “ना। ज़ैबी सेके कोए मुलै ना समझावा, तैवी सेके मूँ ऐथा लै ना समझे सकूँ। मेहरवाने करेय मुंई आगे आयेय बैठ। खै यशायाह ऐवु आपणैं बारै दी लिखदो त लागो द या औरीये बारै दी?”

फीलिप्पुस रथा मैंथे चोढ़ेय बैठो। तेखो तैवे तैवु कुशी आदमी लै, स बोलो ज़ौ यशायाहे यीशुये बारै दी लिखो द त। फिलिप्पुस परमेश्वरे वचने खासे दुज़ै पाठे चर्चा किये। ऐणो करे तैवे तैवु आदमी लै यीशु बारै दी शुभ संदेशो सुनाऊवो।

फिलिप्पुस अज़ौ स कुशे सफरा करदी बैरे पाणीं आगे आये। तैवु कुशीये बोलो, “शा! इदै पाणीं आ! खै मूँ वपतिस्मा लैये सकूँ ?” अज़ौ तैवुये सारथी लै रथ रोकणा लै बोलो।

तेखो सें पाणीं दी भागे, अज़ौ फिलिप्पुसे तैवु कुशी लै बपतिस्मा देनो। ज़ैबी सें पाणीं कै बैरे निकड़ै तेखो पवित्र आत्मे एकीदमा कै फिलिप्पुस लै चुंगेय कोए दुजी ज़ागा लै नियो। तिदै फिलिप्पुसे लोगा लै यीशुये बारै दी बोले लाओ।

स कूशे आपणैं घरे सफरा दी आगे बढ़ो। स बढ़ो खुश त कि स ऐबे यीशु लै ज़ाणां त।