46. पौलुस मसीह विश्वासे बोणां

शाऊल नांवो एक आदमे त ज़ौरे यीशु मैंथे विश्वास नेईं त कियो द। ज़ैबी स जबान त तैवी तैवे स्तिफनुसा लै मारने वाड़े लोगे ज़ुडकै निगराणें किये तै। बादा कै, तैवे विश्वासी सतावे तै। तैवे यरूशलेमे घरा-घरा दी भागेय मर्द अज़ौ छैऊड़ी दीगी लै पाकड़ेय कैदखाने दी पाये तै। तेखो महा पुरोहितै शाऊल लै दमिश्क नगर लै बागणैं इज़ाजत देने। तेवे तिदै बी मसीही लोगा लै पाकडना लै अज़ौ तिन्ना लै बापस यरूशलेमा दी आणना लै शाऊला लै बोलो।

तेखो शाऊले दमिश्क बागणेय सफर शुरू कियो। तैवु नगरा दी पौचणें के थक ज़ैओ पैहले, तैवी चारी बिलै सरगा दी चमकणें वाड़ो प्रैशो हुओ, अज़ौ तेखो स माट्टै मैंथे लोट्टै। शाऊलै कोई लै बोलदी बैरे शुणो, “औ शाऊल! औ शाऊल! तू मुलै किलै सतावदों लागो द आ?” शाऊले पुछो, “औ प्रभु, तू कुंण आ?” यीशुये ज़वाब देनो, “मूँ यीशु आ। तू मुलै सताय करदो लागो द आ!”

शाऊल ऊठो तेखो स शाये ना सको। तैवे दोस्ते स दमिश्क लै निंयो। शाऊले चोने दिना सेके कुछ बी ना खाओ-पियो।

दमिश्क नगरी दी हनन्याह नांवो एक चैलो त। परमेश्वरे तैवु लै बोलो, “तैवु घरा लै भाग ज़िदै शाऊल रूको द आ। आपणैं हाथा लै तैवु मैंथे थौ ताकि स दवारा कै शांदो लागा।” पर हनन्याहे बोलो, “औ प्रभु, मेरे शुंणों द आ कि एऊ आदमीये विश्वासी लै केणों सतावोद आ।” परमेश्वरे तैवु लै ज़वाब देनो, “भाग! मेरे तैवु लै यहूदी मांझी लै अज़ौ दुज़ी ज़ातीये लोगा मांझी लै मेरे नांवे घोषणां करना लै छांटो द आ। स मेरे नांवा तैईं खास्से दुख सेहा।

तेखो हनन्याहे शाऊला बिलै भागो, आपणैं हाथ तैवु मैंथे थोये, अज़ौ बोलो,“ यीशुये, ज़ुंण आंदी बैरे तेरे पैंढ़े दी तोंईं मैंथे प्रकट हुओ त, मुंई लै तौईं आगे भेज़ो द आ ताकी तू दवारा कै शांदो लागा, अज़ौ पवित्र आत्मा तोईं लै भरा।” एकीदमा कै शाऊल दवारा कै शांणें काबिल बंणों अज़ौ हनन्याहे तैवु लै बपतिस्मा देनो। तेखो शाऊले रोटी खाई अज़ौ दवारा कै ताकतवर बंणों।

तैबी कै शाऊले दमिश्क नगरी दी रोणे वाड़े यहूदी मांझी प्रचार करनो शुरू कियो। तैवुये बोलो, “यीशु ही परमेश्वरो भाऊ आ!” यहूदी लोग हैरान तै, किल्हैकि शाऊले विश्वासी लै मार डालने कोशिश कीये दे तै, पर ऐवे स यीशु दी विश्वास करा त। शाऊले यहूदी सीथी बैहस बाज़े किये। तैवुये दिखाऊवो कि यीशु ही मसीह त।

खास्से दिना बाद यहूदीये शाऊला लै मारने तरकीब बणांऊवे। तिन्नै तैवु लै मारना लै नगरे दवारा दी लोगा लै भेज़ौ। कि तैवुये निगराणें करा। पर शाऊले तैया तरकीबा बारै दी शुंणों, अज़ौ तैवुये दोस्ते बचिय निकड़ना लै तैवुये मदद किये। एकी राची तिन्नै तैवु लै टोकरी दी बेठेय नगरी दीवाला कै ऊन्दी ऊतारो। दमिश्क कै बचिय निकड़ने बाद शाऊले यीशु बारै दी प्रचार करनो ज़ारी थौओ।

शाऊल प्रेरिता कै मिलदो यरूशलेम नगरा लै भागो, पर सें तैवु कै डरा तै। तेखो बरनबास नांवे एक विश्वासीये शाऊला लै प्रेरिता बिलै निंयो। तैवुये तिन्ना लै बोलो कि शाऊले केणीं भादुरी कै दमिश्का दी प्रचार किय त। तेथा बाद, प्रेरिते शाऊल लै स्वीकारो।

कुछ विश्वासी ज़ुंण यरूशलमे सतावा कै भागी गेये तै सें दूर अंताकिया नगरा दी भागे दै तै, सें यीशुये बारै दी प्रचार करा तै। अंताकिया दी रोणें वाड़े ज्यादातर लोग यहूदी नेईं तै। पर पैहले बैरे, ज़ुंण लोग यहूदी नेईं तै विश्वासी बंणें। बरनबास अज़ौ शाऊले इन्ना नोवे विश्वासी लै यीशुये बारै दी अज़ौ बी ज्यादो शिखैऊंणां लै तिदै भागे अज़ौ मड़ले मज़बूत किये। यीशु मैंथे विश्वास थौणें वाड़े पैहली बैरे अंताकिया दी “मसीही” कहलाऊवे।

एक दिन अंताकीये मसीह लोग व्रत थौऐ प्रार्थना करदे तै लागे दै। पवित्र आत्मे तिन्ना लै बोलो, “मूंई तैईं बरनबास अज़ौ शाऊला लै तैवु काम करना लै अलग करो, ज़ौआ लै करना लै मेरे तिन्ना लै बेदो द आ।” तैईं अंताकिये मड़लीये बरनबास अज़ौ शाऊला लै प्रार्थना किये अज़ौ तिन्ना मैंथे आपणैं हाथ थौये। तेखौ तिन्नै, तिन्ना लै दुज़ी खास्सी ज़ागा दी यीशुये बारै दी शुभ संदेश प्रचार करना लै भेज़ौ । बरनबास अज़ौ शाऊले अलग अलग ज़ातिये लोगा शखैऊवे, अज़ौ खास्से लोगे यीशु मैंथे विश्वास कियो।