47. फिलिप्पी दी पौलुस अज़ौ सीलास

ज़ैबी शाऊले रोम सम्राज़े दी सफर कियो तेखो तैवुये आपणों रोमी नांव “पौलुस” इस्तेमाल करनो शुरू कियो। एक दिन, पौलुस अज़ौ तैऊवो दोस्त सिलास फिलिप्पीये नगरा दी यीशुये बारै दी शुभ संदेश शुंणांऊदे भागे। सें नगरा बैहरे दरियावा आगे एकी ज़ागा दी भागे ज़िदै लोग प्रार्थना करना लै कठ्ठे तै। तिदै सें लुदिया नांवी एकी छैऊड़ी कै मिलै ज़ुंण एक लैणं दैण करने वाड़ै तै। स परमेश्वरा कै प्यार करा तै अज़ौ तैवुये अराधना करा तै।

परमेश्वरे लुदिया लै यीशुये बारै दी संदेशे मैंथे विश्वास करने काबिल बणांऊवे। पौलुस अज़ौ सिलासे तैया लै अज़ौ तेये टबरा लै बपतिस्मा देयो। तेये पौलुस अज़ौ सीलासा लै आपणैं घरा दी रूकणां लै नैवतो देनो, तैईं सें तिदै रूके।

पौलुस और सीलास लोगा कै ज्यादातर तैवु ज़ागा दी मिला तै। ज़िदै यहूदी लोग प्रार्थना करा तै। हर रोज़ ज़ैबी सें भागा तै एक गुलाम छौटे ज़ौआ दी भूत प्रेतो कबज़ौ त स तिन्नो पिछो करा तै। ऐऊ भूत प्रेता द्वारा कै स लोगो भविष्य बोला तै, तैईं स भविष्य बोलणें वाड़े रूपा दी आपणैं मालिका लै खास्सै पैसे कमावा तै।

तिन्नै भागदी बैरी स गुलाम छौटे चचैईया तै, “ज़ै मर्द परम प्रधान परमेश्वरे सेवक आ। ज़ै तुमां लै मुक्तिये पाणैंय पैंढ़ो बोलदे लागे दै आ!” हर रोज़ स ऐणों ई करा तै तैथा कै पौलुस परेशान हुओ।

तेखो एक दिन तैया गुलाम छौटीये चचैऊणों शुरू कियो, तेखो पौलुसे तैया बिलै मुड़िय तैया भितरे भुत प्रेता लै बोलो, “यीशुये नांवा कै ऐया भितरे कै बैहरे निकड़।” तैवु वक्ता दी तैवु भूत प्रैते स छाड़े।

तैया गुलाम छोटिये मालिक बढ़े गुसे हुये। तिन्ना लै पतो चालो कि बिना तैया भूत प्रैता कै स छौटे लोगो भविष्य ना बोले सका तै। तेथो मतलब त कि लोग ऐवे तेये मालका लै पैसे ना देया कि स तिन्ना लै भविष्य बोला कि तिन्ना सीथी खै होवा।

तेये गुलाम छौटिये मालके पौलुस अज़ौ सिलासा लै रोमी मुलाज़मा बिलै निंयो। तिन्नै पौलुस अज़ौ सिलास मारे, अज़ौ तेखो सें कैदखाने दी डाले।

तिन्नै पौलुस अज़ौ सिलास लै कैदखाने ऐणीं ज़ागा दी थौओ ज़िदै सबी कै ज़्यादै सिपाई तै। इदै सेके कि सिपाईये तिन्नै टांगा लै झ़ुकड़ै बड़े टुकड़े कै ज़ोड़ो। पर पौलुस अज़ौ सीलास आधी राचीये वक्ता दी, परमेश्वरे स्तुतीये गीत गैंदे तै लागै दै।

एकी दमा कै एक बढो ज़ाजरौ पड़ो! कैदखाने सारै दवार खुलै, अज़ौ सारै कैदीये शांगड़े खुलेय छुटी।

तेखो दरोगा ज़ागो। तैवे शाऔ कि कैद खाने दवार खुलै दै तै। तैवे सोचो की सारै कैदी बचैय भागी गेये। स डरो कि तिन्नै भागणें बज़ा कै रोमी मुलाज़म तैवु लै ज़ाने मारा, तेखो स आत्म हत्या करना लै तैयार हुओ! पर पौलुस तैवु लै शायेय चिंज़ुवो, “रूक! आप्पू लै नुकसान ना पौचावे। हामा इदै ई आ।”

तेखो स दरोगा कामब्दे कामब्दे पौलुस अज़ौ सीलासा बिलै आऔ अज़ौ तिन्ना कै पुछदो लागो, “मुक्ते पाणां लै मूँ खै करूँ? पौलुसे ज़बाब देनो, “प्रभु यीशु मैंथे विश्वास कर, तैईं तौले अज़ौ तेरे टबरा लै मुक्ते मिला।” तेखो तैवु दरोगे पौलुस अज़ौ सीलासा लै आपणैं घरा लै निंयो अज़ौ तिन्नै घाव धोये। पौलुसे तैवुये घरे सब लोगा लै यीशु के बारे में शुभ संदेश सुनावो।

दरोगा अज़ौ तैवुये टबरे यीशु मैंथे विश्वास कियो, तैईं पौलुस अज़ौ सीलासे तिन्ना लै बपतिस्मो देनो। तेखो दरोगे पौलुस अज़ौ सीलासा लै रोटी खिलाऊवी, अज़ौ सें सब एकी सीथी बढ़े खुश हुये।

दुज़ै दिन नगरे अगुवे पौलुस अज़ौ सीलास लै कैदखाने कै आज़ाद कियो अज़ौ फिलिप्पी कै भागणां लै बोलो। पौलुस अज़ौ सीलास लुदिया अज़ौ कुछ दुज़ै दोस्ता कै मिले, अज़ौ तेथा बाद नगरा कै बेरे निकड़े। यीशुये बारै दी शुभ संदेशो फैलदो ही रोहो , मड़ले विश्वासी कै बढ़दे लागे।

पौलुस अज़ौ दुज़ै मसीह अगुवे खास्से नगरो सफर कियो। तिन्नै लोगा लै यीशुये बारै दी शुभ संदेशो सुनावो। तिन्नै मड़लीये विश्वासीये विश्वास बढावणां लै अज़ौ शखैऊणां लै केई चिठ्ठी बी लिखी। तिन्ना मांझी कुछ चिठ्ठी बाइबले कताबा बी बोणें।