48. यीशु ही सोह कियो द मसीह आ

ज़ैबी परमेश्वरे संसार बड़ाऊव तैवी सब कुछ बढ़िया त। कोई पाप नेईं त। आदम अज़ौ हव्वा एकी दुज़ै कै प्यार करा तै, अज़ौ सें परमेश्वरा कै प्यार करा तै। कोये बिमारे या मौत नेईं तै। परमेश्वर एणों ही संसारा लै चा त।

शैताने सांपे द्वारे बगीचे दी हव्वा कै बात किये, किल्हैकि स तैया लै धोखो दैणों चाहा त। तेखो हव्वा अज़ौ आदमे परमेश्वरे खलाफ पाप कियो। किल्हैकि तिन्नै पाप कियो त तैईं धरती दी रोणैं वाड़े सब ज़ंण मरा।

क्किल्हैकि आदम अज़ौ हव्वे पाप कियो, तैईं कुछ अज़ौ बी बुरो हुओ। सें परमेश्वरे दुश्मण बणैं। ज़ैथी बज़ा कै, तेवी कै सबी ज़ंणें पाप कियो । हर एक ज़ण ज़न्मा कै ही परमेश्वरो दुश्मण आ। परमेश्वर अज़ौ लोगा मांझी शांतै नेई तै। पर परमेश्वर शांतै बणांऊव चा त।

परमेश्वरे सोह खाये कि हव्वो एक वंश शैताने मुंड़ा लै फैचा। तैवुये ऐणों बी बोलो कि शैतान तैवे फैने लै ढ़ामा। दुज़ै शब्दा दी शैतान मसीहा लै मारा, पर परमेश्वर तैवु लै दवारा कै ज़िंवंदो करा। ऐथा बाद, मसीह शैताने शक्ति लै सदा लै खत्म करा। केई बर्षा बाद, परमेश्वरे प्रकट कियो कि स मसीह, यीशु आ।

परमेश्वरे नूहा लै एक किश्ती बणांऊणा लै बोलो ताकि स तैया बाढ़ा कै आपणैं टबरा लै बचाऊवे सका ज़ोआ लै परमेश्वर भेज़णें वाड़ त। ऐणें करे, परमेश्वरे तिन्ना लोगा लै बचाऊवा, ज़ुंण तैवु मैंथे विश्वास करा तै। ऐणें करे, सब के सब परमेश्वरे दवारा ज़ानै मारने काबील तै किल्हैकि सबीये पाप कियो त। पर परमेश्वरे तिन्ना सबी लै बचावणां लै यीशु लै भेज़ौ ज़ुंण तैवु मैंथे विश्वास करा।

केई शौ बर्षा सेके, पुरोहित परमेश्वरा लै बली चढ़ाऊदे रोहे। ऐणें करे पतो चाला, कि लोगे पाप कियो, अज़ौ ज़ौ बी कि सें परमेश्वरा कै सज़ा पाणें काबील तै। पर सें बलिदान तिन्नै पापा लै माफ ना करे सका तै। यीशु सोबी कै बड़ो महा पुरोहित आ। तैवुये स कियो ज़ौ कोई पुरोहित ना करे सका तै। तैवुये स सिर्फ एक बलिदान हंणां लै आप्पु लै देनो ज़ुंण हर कोये पापा लै मिटावे सका। स मानो परमेश्वर कै सोबीये पापे सज़ा लैणां लै। ऐथी बज़ा कै, यीशु सिद्ध महा पुरोहित त।

परमेश्वरे अब्राहमा कै बोलो कि, “मूँ तौईं कै संसारे सब कुला कै बर्गत दैऊं।” यीशु ऐबु अब्राहमो वंशज़ त। परमेश्वरे अब्राहमे द्वारा सबी कुला लै बर्गत देया। किल्हैकि ज़ुंण यीशु मैंथे विश्वास थौआ परमेश्वर तिन्ना सोबी लै पापा कै बचावा। ज़ैबी ज़ैं लोग यीशु मैंथे विश्वास करा, तेखो परमेश्वर तिन्ना लै अब्राहमो वंशज़ बड़ावा।

परमेश्वरे अब्राहमा लै बोलो कि स आपणैं एकै भाऊ, तैवु लै बलिदान कर। पर तेथा बाद परमेश्वरे इसहाक बदले बली चढ़ावणां लै च़ेलटू देनो। हामा सब आपणैं पापा बज़ा कै ज़ान्ने मारने काबिल तै! पर परमेश्वरे म्हारै ज़ागा दी मारना लै यीशु लै बलिदान रूपे दी देनो। एथी बज़ा कै हामै यीशु लै परमेश्वरो च़ैलटू बोली।

ज़ैबी परमेश्वरे मिस्र देशा दी आखरी आफत भेज़े तैवी परमेश्वरे हर एक इस्राएली टबरा लै बोलो कि तिन्ने एकी च़ैलटू लै बली देणें ज़ा। तैवु च़ैलटू दी कोये दोश ना हंणों चैईं। तेखौ आपणैं दवारे चौखटा मैंथे अज़ौ औरशी-पौरशी तिन्ना लै तैवुओ खुन लाणों त। ज़ैबी परमेश्वरे तैवु खुना लै शाऔ तेखौ स तिन्नै घरा कै आगे बढ़ो अज़ौ तिन्नै बड़े भाऊ लै ना मारो। ज़ैबी ऐणों हुअ तेथा लै परमेश्वरे फसहो तैवार बोलो।

यीशु फसहे तैवारे ऐक चैलटू ज़ैं आ। तैवुये केवी पाप ना कियो, तैईं तैवु दी कुछ बी गलत नेईं त। स फसहे तैवारे वक्ता दी मरो। ज़ैबी कोये यीशु मैंथे विश्वास करा, तेवी यीशुओ खुन तैवु आदमीये पापे कीमत चुकावा। ज़ौ ऐणों आ ज़ेणों परमेश्‍वर तैवु आदमी आगे कै आगे बढ़ो,किल्हैकि स तैवु लै सज़ा ना देया।

परमैश्वरे इस्राएली लोगा सीथी एक वाचा बांने, किल्हैकि सें ऐणें लोग तै ज़ौआ लै परमेश्वरे आपणों होंणां लै छंटो द त। पर ऐवे परमेश्वरे एक ऐणें वाचा बाने ज़ुंण कि सोबी लै आ। ज़ै कोये बी ज़ातीये, कोई बी आदमै ऐया नोवी वाचा लै माना , तेखो स परमेश्वरे लोगा दी गिंणिंया। स ऐणों तैईं करा किल्हैकि स यीशु मैंथे विश्वास करा।

मूसा ऐणों परमेश्वरो ज़ांणकर त ज़ौरे परमेश्वरे वचना लै बड़ी शक्ति सीथी प्रचार कियो त। पर यीशु सोबी परमेश्वरे ज़ांणकारा मांझी कै सोबी कै बढ़ो आ। स परमेश्वर आ तैईं ज़ौ कुछ बी तैवुये कियो अज़ौ बोलो सें परमेश्वरे काम अज़ौ वचन तै। तैईं पवित्र-शास्त्र यीशु लै परमेश्वरो वचन बोलो।

परमेश्वरे राज़े दाऊदा कै सोह खाये कि राज़े रूपा दी तैवो एक वंशज़ परमेश्वरे लोगा मैंथे सदा लै राज़ करा। यीशु परमेश्वरो भाऊ अज़ौ मसीह आ, तैईं स राज़ो दाऊदो सोये वंशज़ ,आ ज़ुंण सदा लै राज़ करे सका।

दाऊद ता इस्राएलो राज़ो त, पर यीशु सारे संसारो राज़ो आ! स दवारा कै आ अज़ौ सदा लै न्याय अज़ौ शांतै सीथी आपणैं राज़ा मैंथे राज़ करा।