49. परमेश्वरे नोवे वाचा

एक स्वर्गदूते एक ज़वान छैऊड़ी मरियम कै बोलो कि स परमेश्वरे भाऊ लै ज़ंन्म देया। स हाल कुंवारे तै, पर पवित्र आत्मा तैया दी आछा अज़ौ स सकोड़े लागदे हुये। तेये एक भाऊ लै ज़न्म देनो ज़ौरो नांव तैये यीशु थौवो। तैईं , यीशु परमेश्वर अज़ौ आदमे दिगे आ।

यीशुये खास्से चमत्कार किये ज़ौआ कै पतो चाला कि स परमेश्वर आ। स पाणीं मैंथे हांढ़ो अज़ौ तैवे आंधी लै शांत कियो। तैवे सारे बमार आदमी लै ठीक कियो अज़ौ सारै आदमैं कै दुष्‍टात्‍मा गाढ़ै। अज़ौ तेवे मरे दै आदमी लै ज़िंवदो कियो, अज़ौ तैवे पांज़ रोटी अज़ौ दी माच्छली पांज़ हज़ार लोगा लै खिलाऊंणां लै ढटेय रोटी दी बदली।

यीशु एक सोवी कै बढ़िया गुरू त। ज़ौ कुछ बी तेवे शकैऊव, स तेवे सिद्धता कै शकैऊव। ज़ौ स लोगा लै करना लै बोला स तिन्ना लै करनो चैईं, किल्हैकि स परमेश्वरो भाऊ आ। उदाहरणा लै, तैवे शकैऊव कि तुमा लै दुज़ै लोगा लै ऐणों ही प्यार करने ज़रूरत आ ज़ेणों तुमा आप्पू लै प्यार करा।

तैवुये ऐणों वी शकैऊव कि तुमा लै सोबी चिज़ा कै ज्यादो आपणीं ज़ैदादा कै बी ज्यादो परमेश्वरा लै प्यार करनो चैईं।

यीशुये बोलो कि संसारा दी कोये बी च़िज़ा लै पाणैं के बढ़िया आ परमेश्वरे राज़ा दी हंणों। तैवुये राज़ा दी भागणां लै ज़रूरी आ कि परमेश्वर तुमा लै थारै पापा कै बचाऊवा।

यीशुये बोलो कि कुछ लोग तैवु लै स्वीकारा। परमेश्वर तिन्ना लोगा लै बचावा। पर दुज़ै लोग तैवु लै ना माना। तैवुये ऐणों बी बोलो कि कुछ लोग बाक्कैं माट्टै साही आ, किल्हैकि सें यीशुये बारै दी शुभ संदेशे लै माना, अज़ौ परमेश्वर तिन्ना लै बचावा। पर कुछ लोग पैंढ़े काठ्ठे माट्टे ज़ैं आ। परमेश्वरो वचन बियुये साही पैंढ़े दी पौढ़ा, पर तिदै कुछ बी ना लुंगा। ज़ैं लोग यीशुये बारै दी संदेशा लै ना माना। सें तैवुये राज़ा दी भागणां लै मुखरिया।

यीशुये शकैऊव की परमेश्वर पापी कै खास्सो प्यार करा। स तिन्ना लै माफ करनो चा अज़ौ तिन्ना लै आपणैं लआद बड़ाऊणो चा।

यीशुये ऐणों बी बोलो कि परमेश्वर पापा कै नफरत करा। किल्हैकि आदम अज़ौ हव्वे पाप कियो, तैईं तिन्नै सारे वशंज़ पापे आ। ऐवु संसारा दी रोणें वाड़ो हर एक ज़ण पाप करा अज़ौ परमेश्वरे कै दूर आ। हर एक ज़ंण परमेश्वरो दुश्मन आ।

पर परमेश्वर ऐवु संसारा दी रोणें वाड़े हर एक ज़णां कै ऐणों प्यार कियो कि तैवुये आपणों एकलौतो भाऊ देनो ताकी परमेश्वर तिन्ना लै सज़ा ना देया ज़ुंण यीशु मैंथे विश्वास थोआ। ऐथी ज़ागा, दी सें तैवु सीथी सदा लै रोहा।

तुमा मरने लायक आ, किल्हैकि थारै पाप कियो द आ। परमेश्वरा लै ज़ौ ठीक होणों कि स तुमा लै सज़ा देया। पर यीशुये म्हारी जागा दी पापे सज़ा लेये। परमेश्वरे यीशु लै क्रुसे मौत देनेय सज़ा देने।

यीशुये केबीये बी पाप नेई त कियो द, पर तैवुये पापे सज़ा लै मानो, ऐण करे तेयु भयानक मृत्यु दण्ड को स्वीकार किये। ऐणें करे थारै पापा लै अज़ौ ऐवु संसारा दी रोणें वाड़े हर एक ज़ंणें पापा लै चुंगणां लै स एक सिद्ध बलिदान त। यीशुये आप्पु लै परमेश्वरा लै बलिदान कियो, तैईं परमेश्वरे तिन्ना लोगे कोये बी पापा लै, इदै सेके कि भयंकर पापा लै बी माफ करा, ज़ुंण यीशु मैंथे विश्वास करा।

बेशक तुमा खास्से बढिया काम करा, तेखो बी ऐथा कै परमेश्वर तुमा लै ना बचावा। तैवे दोस्त बणना लै ऐणों कुछ बी नेईया ज़ौ तुमा करे सका। ऐथे अलावा, तुमा लै विश्वास करनो ज़ा कि यीशु परमेश्वरो भाऊ आ, अज़ौ स थारै बदले क्रुसा दी मरो, अज़ौ ऐवु बी की परमेश्वरे तैवु लै दवारा कै ज़िंवन्दो कियो। ज़ै तुमा ऐथा मैंथे विश्वास करा, तै परमेश्वर थारै पापा लै माफ करा।

परमेश्वर हर एक ज़ंणां लै बचावा ज़ुंण यीशु मैंथे विश्वास करा अज़ौ तैवु लै आपणो प्रभु माना। पर स तिन्ना लै ना बचावा ज़ुंण तैवु मैंथे विश्वास ना करा। ऐथा कै कोये मतलब नेईया कि तुमा सेठ आ या फैर गरीब, छैऊड़े आ या मर्द, बुढड़े आ या ज़वान या तुमा कीधे रोहा। परमेश्वरे तुमा कै प्यार कर अज़ौ चा कि तुमा यीशु मैंथे विश्वास करा की स थारौ दोस्त बणैं सका।

यीशु तुमा लै बैददो लागो दआ कि तैवु मैंथे विश्वास थौआ अज़ौ बपतिस्मा लेओ। खै तुमा विश्वास करा कि परमेश्वरो एकलोतो भाऊ यीशु मसीह आ? खै तुमै विश्वास करा कि तुमा पापी आ अज़ौ ऐऊ कि तुमा परमेश्वरा कै सज़ा पाणैं काबिल आ? खै तुमा विश्वास करा कि यीशु थारै पापा लै मिटाऊणां लै क्रूसा दी मरो?

ज़ै तुमै यीशु मैंथे विश्वास थौआ अज़ौ ज़ौ तैवे थारी तैईं कियो द आ तेथो अंगीकार करा, तै तुमा यीशुये मानणें वाड़े आ! शैतान ऐबे आपणैं नैरे राज़ा दी तुमा मैथे राज़ ना करा। ऐबे परमेश्वर आपणैं प्रैशे राज़ा दी तुमा मैंथे राज़ करा। तैवे तुमा लै पाप ना करने काबिल बणांऊदे आ, ज़ौ तुमा पैहले करा तै। तैवे तुमा लै एक नोवे अज़ौ बढ़िया ज़िंदगे देने दे आ।

ज़ै तुमा मानणें वाड़े आ तै ज़ैणों यीशुये कियो द आ तेथी बज़ा कै परमेश्वरे थारै पापा लै माफ कियो द आ। ऐबे, परमेश्वर एक दुश्मनी ज़ागा दी तुमा लै एक करीबी दोस्त माना।

ज़ै तुमा परमेश्वरे दोस्त आ अज़ौ प्रभु यीशुये सेवक आ तै तुमा तिन्ना बाता मानणीं इच्छा थौआ ज़ुंण यीशु तुमा लै शकैऊवा। बेशक तुमा यीशुये मानणे वाड़ै आ, शैतान एवी बी पाप करना लै तुमा लै परखा। पर परमेश्वर सदा तैवु करा ज़ौ स बोला कि स करने वाड़ो आ। स बोला कि ज़ै तुमे आपणैं पापा लै माना, तै सह तुमा लै क्षमा करा। स तुमा लै पापे खलाफ लड़ना लै शक्ते देया।

परमेश्वर तुमा लै प्रार्थना करना लै अज़ौ तैवे वचन पढना लै बोला। स तुमा लै दुज़ै विश्वसी सीथी मिलेय तैवे अराधना करना लै बी बोला। तुमा लै दुज़ै लोगा लै बी बोलणों आ कि तैवे तुमा लै खै कियो द आ। ज़ै तुमा इन्ना सब काम करा, तै तुमा तैवे पाक्के दोस्त बणने।