50. यीशु बापस आणों

तकरीबन दिया हज़ार बर्षा कै, संसारै सब ज़ागा दी ज्यादे कै ज्यादे लोग मसीह यीशुये बारै दी शुभ संदेशा लै शुंणंदे लागे दै आ। मड़ले बणंदे लागे दै आ। यीशुये वाईदो कियो द आ कि स संसारे अंता दी वापस आणों। बैशक स हाल वापस ना आओ, तैवी स आपणैं वादै लै पूरो करा।

ज़ैबी हामा यीशुये बापस आणां लै पोखेयो रोये दै आ, परमेश्वर हामा कै ऐणी ज़िंदगी ज़िंवणें इच्छा थौआ ज़ुंण पवित्र आ अज़ौ ज़ुंण तैवुओ आदर करा। स ऐऊ वी चा कि हामा दुज़ै लै बी तैवे राज़ा बारै दी बोली। ज़ैबी यीशु धरती दी रोंदो त लागो द तेबी तैवुये बोलो, “ज़ैबी मेरे चैले संसारा दी सोबी ज़ागे लोगा लै परमेश्वरे राज़ा बारै दी शुभ संदेशो प्रचार करा, अज़ौ तेवी संसार खत्म होंणों।”

खास्सी ज़ातिये ऐबी सेके यीशुये बारै दी नेईं शुंणों द। स्वर्गा लै वापिस भागणैं कै पैहले, यीशुये आपणैं मानणें वाड़ै लै तिन्ना लोगा लै शुभ संदेश सुनावणां लै बोलो ज़ौरे ऐथा लै केवी नेईया शुंणों द। तैवे बोलो, “भागौ अज़ौ सब ज़ातिये लोगा लै चैले बणांवो!” अज़ौ काटणां लै फसल पाकै गै!”

यीशुये ऐणों बी बोलो, “कोये बी आदमीयो सेवा करने वाड़ो तैवे मालका कै बड़ो ना होआ। ऐवु संसारे बढ़े खासे आदमीये मुंईं कै नफरत कीये, अज़ौ मुंईं तैईं सें तुमा लै सतावा अज़ौ ज़ानै मारा। ऐवु संसारा दी तुमा दुख ऊठावा, पर हिम्मत थौ, किल्हैकि मेरे शैताना लै हराऊवो द आ ज़ुंण ऐऊ संसारा दी राज़ करा। ज़ै तुमै अंता तैईं मुंईं सीथी विश्वास योग्य रोहा, तै परमेश्वर तुमा लै बचावा!”

यीशुये आपणैं चैले लै ऐणों समझाऊंणां लै एक कांणें सुनावे कि ज़ैबी संसारो अंत होआ तेबी लोगा सीथी खै होआ। तैवे बोलो, “कोई आदमीये आपणैं ढ़ोखरै दी बांक्को बियु बोओ। ज़ैबी स सुत्तो द त तेवी तिन्नो दुश्मन आऔ अज़ौ गिंहूं मांझी ज़ंगली पौधेय बियु बोओ, अज़ौ तेखो स भागो।”

“ज़ैबी पौधे दी अंकुर फूटे तेबी सेवा करने वाड़ेये तैवु आदमी लै बोलो, ‘औ मालिक, तेरे ता आपणैं ढोखरा दी बांको बीयु बोऔ त। तै फैर ऐथा दी ज़ांगली पौधे किल्है आ। तैवु आदमीये ज़वाब देनो, ‘सिर्फ मेरे दुशमन ही ऐथा लै बोणों चा। ज़ौ मेरो कोये दुश्मन आ ज़ौरे ऐणों काम कियो द आ।’”

“तिन्ना सेवा करने वाड़े आपणें मालिका लै ज़वाब देनो, ‘खै हामा इन्ना ज़ांगली पौधे लै पोटी? तैवु मालिके बोलो, ‘ना’। ज़ै तुमा ऐणों करा तै तुमा कुछ गिंहूऐ पौधे बी पोटा। लौणें वक्ता सेके पौखेय रोओ। तेबी ज़ंगली पौधे लै बंड़ण बड़ाऊणों ताकी तुमा तिन्ना लै ढ़ोऐ सका। पर गिंहू लै मेरे कठारा दी आणों।’”

चैले ऐया कांणींयो मतलब ना समझे, तैई तिन्ने यीशु कै ऐया कांणीं लै समझावणे विनतै किये। यीशुये बोलो, “बाक्कैं बीयु बोणें वाड़ो आदमे मसीहा लै खजोआ। ढोखरो संसारा लै खजोआ। बांक्को बीयु परमेश्वरे राज़े लोगा लै खज़ोआ।”

“ज़ांगली पौधे तैवु दुष्ट शैताने लोगा लै खज़ोआ। तैवु आदमीयो दुश्मन शैतानो लै खज़ोआ, ज़ौरे ज़ंगली पौधे लै बोओ द त। लौणो ऐवु संसारे अंता लै खज़ोआ, अज़ौ लौंणें वाड़ै परमेश्वरे स्वर्गदूता लै खज़ोआ।”

“ज़ैबी संसारो अंत होआ तैवी स्वर्ग दूत इन्ना सोबी लोगा लै एकी सीथी कठ्ठै करा ज़ुंण शैताने आ। सें स्वर्ग दूत इन्ना लै खास्से ताती आगी दी फैंका। तिदै ज़ै आदमी भयंकर सतावा दी रोहा अज़ौ आपणें दांत किला। पर ज़ुंण लोग धर्मी आ, ज़ौरे यीशुये बाते शुंणीं, सें आपणें परमेश्वर बाप्पूये राज़ा दी सुरज़ा साही चमका।”

यीशुये ऐणों बी बोलो कि स संसारो अंत होणें कै पैहले धरती दी वापिस आ। स तैणें करे ही बापस आणों ज़ैणों स भागो द त। मतलब, तैवु आगे असली शरीर होआ, अज़ौ स सरगा दी बादड़ा मैंथे आ। ज़ैबी यीशु आ, तैवी यीशुये मानणें वाड़े ज़ुंण मरी गेये, मरेदे मांझी कै ज़िंवदे होआ अज़ौ तैवु कै सरगा दी मिला।

तेवी ज़ुंण यीशु लै मानड़े वाड़े ऐवी बी ज़िंवदे होआ तिन्ना लै स सरगा लै निंया अज़ौ तिन्ना दुज़ै यीशुये मानणें वाड़े सीथी कठ्ठै होआ ज़ुंण मरे दै मांझी कै ज़िंवदे होआ। सें सब तिदै यीशु सीथी होणें। तेथा बाद, यीशु आपणैं लोगा सीथी रोहा। ज़ैबी सें एकी सीथी रोहा तेवी तिन्ना आगे सदा लै पूरै शांते होणें।

यीशुये तैवु मैंथे विश्वास करने वाड़े हर एक ज़णां लै ताज़ देणे सौह किये दै आ। सें सदा लै परमेश्वरे सीथी हर एक चिज़ा दी राज़ करा। तिन्ना आगे सिद्ध शांते होणें।

पर परमेश्वर तिन्ना सोबीयो न्याय करा ज़ुंण यीशु मैंथे विश्वास ना करा। स तिन्ना लै नरका दी फैंका। तिदै सें रोहा अज़ौ आपणैं दांत किला, अज़ौ सें सदा दुख सेंहंदे रोहा लागे। केबी ना ईशणें वाड़े आग तिन्ना लै लागा तार ढ़ोंदे रोहा लागे, अज़ौ किड़े तिन्ना लै खांणां कै पिछे ना हटणें।

ज़ैबी यीशु आ, तैवी स पूरी रीति कै शैतान अज़ौ तैवे राज़ा लै नाश करा। स शैताना लै नरका दी पाआ। तिदै शैतान सदा लै ढ़ोहंदो रोहा, तिन्ना सोबी सीथी ज़ौरे परमेश्वरे बाते मानणे ज़ागा शैताने पिछै हांढणों चुनो त।

किल्हैकि आदम अज़ौ हव्वे परमेश्वरे हुक्म ना माने अज़ौ पापा लै ऐवु संसारा दी आंणों त, परमेश्वरे ऐवु संसारा लै शराप देनो अज़ौ ऐवु लै नाश करनेओ फैसलो कियो। पर कोये दिन परमेश्वर एक नौवे स्वर्ग अज़ौ नौवी धरती लै बणांवा ज़ुंण सिद्ध होआ।

यीशु अज़ौ तैवे लोग तेया नौवी धरती दी रोणें, अज़ौ स सदा लै सबी चिज़ा मैंथे राज़ करा। स लोगे आखी कै हर एक आशू लै कुषा। ऐबे कोये बी बिमार या दुखी ना होआ। सें रोंआ ना आती। सें बिमार ना पोड़ा या मरने ना। अज़ौ तिदै किये बी गलत काम ना होणें। यीशु आपणैं राज़ा दी न्याय सीथी, अज़ौ शांति सीथी राज़ करा। स सदा लै आपणैं लोगा सीथी रोहा।