2. पापा रौ दुनिया दी आशणौ

आदम और तेसरी बोउटी परमेश्वरा रै ज़ौरिऐ तिउंलै चाणै औंदै बौड़िया बौगीच़ै दी रौइंदी बारै खुश थै। तिउं मांज़िए कोइयौ भी जूड़कै नाईं भीड़ा थौ, तैबै भी एज़ी बुशुए तिउं मांझ़िया कु कोइयौ बेईज़त नाईं कियौ थौ, कैलैकि दुनिया दी पाप नाईं थौ। सै रोज़ तेस बौगीच़ै दी गुमा फिरा थै और परमेश्वरा आइलै बुशै ला थै।

पर तेस बौगीच़ा दी एक साप थौ सेउ भौरी मुरुख थौ। तिणिऐ तियां छ़ेउड़ी कु पूछ़ौ, “का परमेश्वरै तुमुलै एस बौगीच़ा रै केज़ै भी पेड़ा रै फौल़ा खाणा लै मौना की आ?”

तियां छ़ेउड़ीऐ ज़वाब दियौ, “परमेश्वरै आमु आइलै बोलौ आ कि आमै एस भौलै बुरै रै ज्ञाना रै पेड़ा रै फौल़ा रै इलावा केज़ैभी पेड़ा रै फौल़ खाई बौल़ा ई। परमेश्वरै आमु आइलै बोलौ आ कि अगर तुमुऐ एउ फौल़ खाऔ या सेउ छ़ूंऔ भी, ता तुमै पोरु मौराई।”

तिणी सापै छ़ेउड़ी लै ज़वाब दियौ, “इयै बूश सौच़ी नाईं आसती! तुमै नाईं मौरदै। परमेश्वर ज़ाणा कि ज़िणौ इ तुमै तेस फौल़ खा लै, तुमै परमेश्वरा री बराबरी दी हुआई और तेस भाशिऐ भौलौ और बुरौ सौमुझ़दै लागाई।”

तियां छ़ेउड़िऐ देखौ कि सेउ फौल़ मौना लोभाउणै वाल़ौ थौ और स्वादा वाल़ौ दिशा थौ। सै भी सौमझ़दार बौणनौ च़ाहा थी, एथिलै तिऐं सेउ फौल़ चोड़ियौ खाई ऐरौ। तैबै तिएं आपणै बोउटा लै ज़ो तिआं आइलै थौ सेउ फौल़ दियौ और तिणिऐ भी खाऔ।

फेटी ई, तिउंरी आखी खुली गौई, तिउंकै पौतौ लागौ कि सै नांगै थै। तिउंऐ पाच ज़ोड़ियौ, जुड़कै चाणियौ आपणै ज़िवा दुमणा री कोशिश की।

तैबै तिणी मौरदै और तेसरी छ़ेउड़िऐ तेस बौगिच़ा दी घुमदै बारै परमेश्वरा री आक शुणी। सै दुईया परमेश्वरा कु च़ोरुई गौए। तैबै परमेश्वरै मौरदा लै आक देई, “तू किऐ ई?” आदमै ज़वाब दियौ, “मुइंऐ तुमै बौगिच़ा दी घुमदी बारै शूणै, और हाऊं डौरी गौ थौ, कैलैकि हाऊं नांगौ थौ ऐथीलै हाऊं च़ोरुई गौ आ।”

तैबै परमेश्वरै पुछ़ौ, “ताउंलै कुणिऐ बोलौ कि तू नांगौ आ? का ताइंऐ सेउ फौल़ ता ना खाऔ, ज़ेथलै मुइंऐ मौना की थी?” मौरदै ज़वाब दियौ, ” तुमुऐ मुकै ज़ो इयै छ़ेउड़ी देई आ इयांऐ एऊ फौल़ मुलै दियौ। तैबै परमेश्वरै छ़ेउड़ी कु पुछ़ौ, “ताईंऐ ऐऊ का कियौ आ?” तिएं छ़ेउड़िए बोलौ, “सापै मुलै धोखौ दैऔ आ।”

परमेश्वरै सापा लै बोलौ, तू शापित आ! तू आपणै पेटा कौरी आंडा लौ और माटौ च़ाटा लौ और तू और इयै छ़ेउड़ी एकी दूजै कु नौफरत कौराई, तेरी औलाद और इंआरी औलाद भी एकी दूजै कु नौफरत कौराई। इआं छ़ेउड़ी रौ वंश तैरौ मूंड फेच़ा लौ, और तू तेसरौ फाइनौ टुकाई।”

तैबै परमेश्वरै छ़ेउड़ी लै बोलौ, “हाऊं ताउंलै औल़खिंदै बारी भौरी दुख दिआऊ। तू आपनै बोउटै माथी आश छ़ाड़ाई, और सेउ ताउं माथी राज़ कौरा सा।”

परमेश्वरै मौरदा लै बोलौ, “ताइंऐ आपणी बोउटी री शुणी और मेरी आज्ञा नाईं मानी। ऐथीलै धौतरी शापित हुई आ, और ताउं नाज़ ज़ौमाउणा लै भौरी काठी मैहनत कौरना री ज़रुरत आ। तैबै तू मौराई, और तैरौ शरीर माटै दी मिला सा।” तिणी मौरदै आपणी बोउटी रौ नाउं हव्वा छ़ाड़ौ, ज़ेथारौ मतलब आ “ज़िंदगी देणै वाल़ी”, कैलैकि सै सारी ज़ातिउ री आम्मा हुई सा, और परमेश्वरै आदम और हव्वा कालै जानवरू रै खाल़डै रै चाणै औंदै जूड़कै भीड़ाऐ।

तैबै परमेश्वरै बोलौ, “ऐबै भौलै बुरै ज़ाणियौ आदमी आमु ज़िणौ हुई गौ आ। ऐथीलै तिउं ऐबै तेस ज़िंदगी रौ फौल़ तिउंलै नाईं च़ाईं खाणै देणौ कि सै सौदा ज़िउंदै रौआ।” ऐथीलै परमेश्वरै आदम और हव्वा तेस बीगिच़ै कु बाइरै गाड़ी गौऐ। और परमेश्वरै कोइयौ भी तेस ज़िंदगी रै पेड़ा रै फौल़ खाणै कु रोकणा लै बौगौच़ै काऐ ताकती वाल़ै सौरगा रै दूत बोशाल़ी गौऐ।