3. नुह नावा रै आदमी री काहणी

भौरी बौगता बासिऐ दुनिया दी भौरी लोग रौआ थै। सै भौरी दुष्ट और पापी हुई गोऐ थै। एउ एती बूरौ थौ कि परमेश्वरै एक भौरी बौड़ै काल़ा कौरी इएं पुरी दुनिया खातम कौरणै रौ फैसलौ कियौ।

पर परमेश्वर नूह नांवा रै आदमी कु खुश थौ। और सेउ बुरै आदमी मांझ़ी रौइणै वाल़ौ एक धौरमी आदमी थौ। परमेश्वरै नूहा लै बोलौ कि हाऊं भौरी बौड़ौ पाणी रौ काल़ आणनै वाल़ौ आ। ऐथीलै तिणिऐ, नूहा कू एक भौरी बौड़ी किस्ती चाणना लै बोलौ।

परमेश्वरै नूहा लै बोलौ तकरीबन एक शौ दुई बिऐ मीटर लांबी, एक बिऐ चिन मीटर बिली और साढ़ै तेरह मीटर ऊँच़ी किस्ती चाणनै लै बोलौ। और बोलौ ताईं सै किस्ती ज़ूखड़ै री और तेथादी चीन मंज़िलै और भौरी का कौमरै और एक छ़ापर और एक खिड़की चाणनी आ। सै किस्ती नूह, तेसरै टौबर, और धौतरी रै सारै जआनवरु पाणी रै काल़ा कु बौच़ाई छ़ाड़ा सा।

नूहै परमेश्वरा री बूश मानी। तिणिऐ और तेसरै छ़ोहरुऐ तीणी इ किस्ती चाणी ज़िणी परमेश्वरै बोली थौ। कैलैकि सै किस्ती भौरी बौड़ी थी ऐथीलै तियां चाणना लै कई साल लागै। नूहै लोगु लै आशणै वाल़ै पाणी रै काल़ा रै बारै दी खौबरदार किऐ और तिउंलै परमेश्वरा री भीलै बौदलिणा लै बोलौ, पर तिउंऐ तेस माथी विश्वास नाईं कियौ।

परमेश्वरै नूह और तेसरै टौबर आपुलै और जानवरु लै खाणा री च़ीज़ै कौठै कौरणै रौ हुकम दियौ। ज़ैबै सब कुछ़ तैयार थौ, ता परमेश्वरै नूहा लै बोलौ कि एज़ौ बौगत तेसरी बोउटी रै, तेसरै चिएऊ छ़ोहरु रै, और तिउंरी बोउटी रै कुल मिलाइयौ आठ ज़ौणै किस्ती दी डेउणै रौ थौ।

परमेश्वरै हर जानवर और पक्षी रै नर और मादा नुहा काऐ भेज़े, ताकि सै बौड़ी किश्ती भितै डेई सौका। और पाणी लागणै रै दौरान बौच़ी रौई सौका। परमेश्वरै हर ज़ाती रै जानवरा रै सात नर और सात मादा भेज़ै ज़ो बौल़ी चढ़ाउणा लै इस्तेमाल कौरी सौका। ज़ैबै सै सारै बौड़ी किश्ती दी पौउंच़ी गौऐ ता परमेश्वरै आपु तिऐं बौड़ी किश्ती रौ दार बंद कियौ।

तैबै पाणी लागणौ शुरु हुऔ, और पाणी लगातार लागदै थाकौ लागी, बिणा टेकी पाणी दुई बिऐ दिना और दुई बिऐ राची झ़ाउं लागदै थाकौ लागी। सारी दुनिया री हर च़ीज़, इदरा झ़ाउं कि ऊँच़ै-ऊँच़ै पर्वत भी पाणी दी डूबी गोऐ।

शुकी धौतरी माथी रौइणै वाल़ी हर एक च़ीज़ मौरी गोई, तिउं लोगु और ज़ानवरु छ़ाडियौ, ज़ो किस्ती दी थै। सै किस्ती पाणी मांझ़ी तैरदै थी लागी औंदी और किस्ती भितै ज़ो थै सै सारै सही-सलामत छ़ाड़ै।

पाणी रुकणै बासिऐ, पांज़ा मिहनै झ़ाउं सै किस्ती पाणी माथी तैहरदै थाकी लागी, सेज़ै बौगता दी पाणी कम थौ औंदै लागौ औंदौ। तैबै एकी दिनै सै किस्ती एकी परवता री च़ोटी माथी डेइयौ टेकी, पर दुनिया इबी भी पाणी दी ढुबी औंदी थी। चीआ मिना बासिऐ, परबतु री च़ोटी दिशदै लागी थी।

तैबै तौइंऐ दुई बिऐ दिना बासिए, नूहै एक कवागौ इणै देखणा लै बाइरै भेजौ कि का पाणी शुकी गो लौ। सेउ कवागौ शुकी ज़ागा लोड़दै लोड़दै ओरु-पोरु उड़दै थाकौ लागी। पर तेसकै शुकी ज़ागा नाईं मिली।

तैबै बासिए नूहै एक कबुतरी बाइरै भेज़ी। पर तिआंकै भी शूकी ज़ौबीन नाईं मिली, ऐथीलै सै नूहा काऐ वापिस आशी गोई। साता दिना बासिऐ सै कबुतरी तौइं भेज़ी, और तिआंए आपणी छूँजा दी जैतूना री एक शाउंटी आणियौ वापिस आशी। पाणी घौटदै थौ लागौ औंदौ, और पौधै तौइं दुजी बारै ज़ौमदै लागै थै,

नूहै साता दिना झ़ाउं पौखौ तैबै चीजी बारी सै कबुतरी बाइरै भेज़ी। ऐज़ै फेरा दी तिआंकै रुकणा री ज़ागा मिली और से वापिस नाईं आशी।पाणी शुकदै थौ लागौ औंदौ।

दुई मिना बासिऐ परमेश्वरै नूहा लै बोलौ, “ऐबै तू और तैरौ टौबर और सारै जानवर बाइरै गाड़ियौ आणौ। भौरी सारै लोल़डै और कौई-कौनाल़डु पैदै कौरौ और धौतरी माथी भौरियौ। तैबै नूह और तेसरौ टौबर किस्ती कु बाइरै आशै।

नूहै बाइरै आशियौ एक बेदी वाणी, और बौल़ी लै इस्तैमाला रै लायक धौणु मांझ़िऐ कुछ़ धौण नीइंयौ बौल़ी च़ौड़ाई। परमेश्वर तिआं बौल़ी कु खुश हुऔ और नूह और तेसरै टौबरा लै आशिष देई

परमेश्वरै बोलौ, “हाऊं वायदौ कौराऊ कि आदमीऊ रै ज़ौरिऐ किऐ औन्दै बुरै कामु रै कारण हाऊं तौइंऐ केभी भी धौतरी लै श्राप नाईं दैंदौ या पाणी-बाड़ा दी दुजी बारै नाईं बौआउंदौ, हालांकी आदमी ज़न्मा कु पापी आ।

तैबै परमेश्वरै आपणै निशाणा रै रुपा दी पैहली पौणीयार चाणी। ज़ैबै केभी भी सौरगा दी पौणीयार दिशा ली, ता परमेश्वर याद कौरा कि तिणिऐ का वाइदौ कियौ आ और इणी इ तेसरै लोग भी याद कौराई।