4. अब्राहमा आइलै परमेश्वरा रौ वायदौ

पाणी रै काल़ा रै भौरी बौरशा बासिऐ, भौरी लोग रौआ थै, और तिउंए तौइंऐ दुजी बारै परमेश्वरा और एकी दुजै रै बारै दी पाप कियौ। कैलैकि सै सब एक ही बोली बोला थै, ऐथीलै सै एकी साथाई कौठै हुऐ, और ज़ो आज्ञा परमेश्वरै थी देई औंदी कि दुनिया दी भौरियौ, पर तिउंए इलाकौ चाणौ।

सै भौरी घौमंडी थे, और तिउं किणौ ज़िउणौ च़ाइं तेथारै बारै दी परमेश्वरारी आज्ञा नाईं मानणै च़ाहा थै। इदरा झ़ाउं कि तिउंए एक इणौ मिनार चाणनौ शुरु कियौ ज़ो सौरगा झ़ाउं पहुंच़ा सा। परमेश्वरै देखौ कि अगर सै एकी साथाई बुराई कौरदै थाका लै लागी, ता शायद सै भौरी पाप वाल़ै काम कौराई।

एथीलै परमेश्वरै तिउंरी बोली भौरी अलग-अलग बोली दी बौदल़ी ऐरी और सै लोग सारी दुनिया दी फौईलाई गोऐ। ज़ो इलाकौ तिउंऐ चाणनौ शुरु कियौ थौ तेथालै बाबेल बोलौ, ज़ेथारौ मतलब आ “गड़बड़ी”।

कई साला बासिऐ, परमेश्वरै अब्रामा नांवा रै एकी आदमी आइलै बुशै लाई। परमेश्वरै तेस लै बोलौ, “आपणै देश और टौबरा छ़ाड़ियौ सेज़ै देशा लै डेउ ज़ो हाउं ताउंकै देखाल़ु लौ। हाउं ताउंलै आशिष दिआऊ, और ताउंकु एक बौड़ी ज़ाती चाणाऊ। हाउं तैरौ नाउं बौड़ौ कौराऊ। ज़ो ताउंलै आशिष दिआई तेसलै हाउं आशिष देआऊ, और ज़ो ताउंलै शाप देआलौ तेसलै हाउं शाप दिआऊ। तैरै कारणै दुनिया रै कुल़ आशिष पा आ ई।

और अब्रामे परमेश्वरा री बूश मानी। तिणिऐ आपणै सारै नुकुर आपणी सारी धन-ज़यदादा आइलै आपणी बोउटी सारै आइलै तेस कनान देशा लै डियौ ज़ो परमेश्वरै अब्रामा के देखाल़ौ थौ

ज़ैबै अब्राहम कनान देशा दी पहुंच़ौ ता परमेश्वरै तेसलै बोलौ, “आपणै च़ारौ तौरफै देख। हाउं ताउंलै एस सारौ देश दिआऊ तैरौ वंश सौदा लै एस देशा माथी हक छ़ाड़ाई।” तैबै अब्राहम सेज़ै देशा दी बौसौ।

मलिकिसिदक नावां रौ एक आदमी थौ ज़ो परमेश्वरा रौ सौबी कु बौड़ो याजक थौ। एकी दिनै अब्राहम ज़ैबै लौड़ाई कौरियौ थौ वापिस आशदै लागौ औंदौ ता मलिकिसिदक और अब्राहमा री मुलाकात हुई। मलिकिसिदकै अब्राहमा लै आशिष देई और बोलौ, सौभी कु बौड़ै परमेश्वर ज़ो सौरग और धौतरी रौ मालिक आ सेउ तांउलै आशिष दिआ।” तैबै अब्राहमे लौड़ाई दी ज़ीती औंदी सारी च़ीज़ू रौ दशवांस मलिकिसिदका कै दैयौ।

कई बौरिश बीती गोऐ, पर इबी भी अब्राहम और तेसरी बोउटी सारै रै कोई भी लोल़डै नाईं हुऐ थै। परमेश्वरै अब्रामा आइलै बुशै लाई और तैबै वाइदौ कियौ कि तेसरौ एक छ़ोहरु पैदौ हुआ और ज़िणै सौरगा दी तारै तिणौ इ तैरौ वंश हुआ। अब्रामे परमेश्वरा रै वाइदै माथी विश्वास कियौ। परमेश्वरै बोलौ कि अब्राहम एक धौरमी आदमी आ कैलैकि तिणिऐ परमेश्वरा रै वइदै माथी विश्वास कियौ आ।

तैबै परमेश्वरै अब्राहम कु एक वाइदौ बानौ। एक वाइदौ दुई गुटा रै बीच़ा दी एकी दुजा लै कामा कौरनै रौ समझ़ौतौ हुआ सा। परमेश्वरै अब्रामा आइलै सेउ वाइदौ तेबी कियौ थौ ज़ेबी सेउ सुतौ औंदौ थौ, पर सेउ तेबी भी परमेश्वरा री बुशै शुणी बौल़ा थौ। परमेश्वरै रै बोलौ, हाउं ताउंकै एक तैरौ आपणौ छ़ोहरु दिआउ। हाउं तैरै वंशा लै एक कनान देश दिआउ। पर इबी झांऊ अब्रामा रै कोई भी छ़ोहरु नाईं हुऐ थौ।