5. वाइदै रौ छ़ोहरु

अब्राम और सारै रै कनान देशा दी पहुंच़णै रै दौस बौरशा बासिऐ, भी इबी झ़ाउं तिउंरै कोई औलाद नाईं थी। ऐथीलै, अब्रामा री बोउटी सारै तेसलै बोलौ, “ परमेश्वरै इबी झ़ाऊं हाऊं लोल़डै पैदै कौरणै रै लायक नाईं कियौ ऊ और ऐबै हाऊं लोल़डै पैदै कौरणा लै भौरी स्याणी ऊ, देख, मेरी नुकराण हाजिरा इदै आ। इआं आइलै शादी कौर कि मुकालै एक लोल़डौ पैदौ कौरी सौका”

अब्रामै हाजिरा आइलै शादी कौरी गोई और हाजिरा रौ एक छ़ोहरु पैदौ हुऔ, और अब्रामै तेसरौ नाऊं इश्माएल छ़ाड़ौ। पर सारा, हाजिरा कु मीश कौरदै लागी। ज़ेबी इश्माएल तेरह बौरशा रौ थौ, परमेश्वरै तौइंऐ अब्रामा आइलै बुशै लाई।

परमेश्वरै बोलौ, “हाउं सौभी कु बौड़ौ ताकती वाल़ौ परमेश्वर उ। हाऊं ताऊं आइलै एक वाइदौ बानाउं।” तैबै अब्रामे ज़ौबिना माथी पौड़ियौ ढाल की परमेश्वरै अब्रामा लै इणौ भी बोलौ, “तू भौरीका ज़ातिऊ रौ बाब हुआई। हाऊं ताऊं और तैरै वंशा कै आपणी ज़ौबीन हुणा लै कनान देश दिआउ और हाऊं सौदा लै तिउंरौ परमेश्वर हुआउ। ताऊं आपणै टौबरा रै सारै मौरदू रौ खौतनौ जा कौरणौ।

“तेरी बोउटी सारै रौ एक लोल़डौ हुआ—सेउ वाइदै रौ छ़ोहरु हुआ। तेसरौ नाउं इसहाक छ़ाड़नौ। हाऊं तिआं आइलै आपणौ वाइदौ बानी छ़ाड़ाउ और सै एक बौड़ी ज़ाती बौणा सा। हाउं इश्माएला कु भी बौड़ी ज़ाती चाणाऊ, पर मैरौ वाइदौ इसाहका आइलै रौआ सा।” तैबै परमेश्वरै अब्रामा रौ नाऊं बौदलियौ अब्राहम छ़ाड़ौ। ज़ेथरौ मतलब आ “भौरी सारेउ रौ बाब”। परमेश्वरै सारै रौ नाउं भी बौदलियौ सारा छ़ाड़ौ ज़ेथारौ मतलब आ “पैहल की मा”।

सेज़ै दिनै अब्राहमे आपणै सारै घौरा रै मौरदू रौ खौतनौ कियौ। तकरीबन एकी साला बासिऐ, ज़ेबी अब्राहम एक शौ बौरशा रौ थौ और सारा च़ार बिए दस बौरशा री थी तैबै सारै अब्राहमा लै एक लोल़डौ पैदौ कियौ। ज़िणौ परमेश्वरै तिउं आइलै बोलौ थौ तिउंऐ तेसरौ नाउं इसहाक छ़ाड़ौ।

ज़ैबै इसहाक ज़वान हुऔ त परमेश्वरै इणै बोलियौ अब्राहमा रौ इम्तहान नियौं, “आपणौ एकलौतौ छ़ोहरू निउं, और मुकालै बौल़ी रै रूपाई च़ौड़ाऊ” तैबै तौइंऐ अब्राहमै परमेश्वरा री बूश मानी और आपणौ छ़ोहरु बौल़ी कौरना लै तैयार कियौ।

ज़ेबी अब्राहम और इसहाक बौल़ी च़ौडाउणै री ज़ागाह भिलै डेउंदै लागै ता इसहाकै पूछ़ौ, “ओ बाब, आमुकै बौल़ी लै ज़ुखड़ै ता आसती आ, पर खाड़ु किदै आ?” अब्राहमे ज़वाब दियौ, “ओ मैरौ छ़ोहरु, परमेश्वर बौल़ी कौरना लै खाड़ू रौ इंतज़ाम आपु कौरा सा।”

ज़ैबै सै बौल़ी कौरणै री ज़ागा दी पहुच़ै, ता अब्राहमै इसहाक बानियौ बेदी माथै पाई गो आ। सेउ आपणौ छ़ोहरु झ़ांगणै इ वाल़ौ थौ कि परमेश्वरै बोलौ, “ टेक आपणै छ़ोहरु रौ नुकसान नाईं कौर, मंइऐ ज़ाणी ऐरौ आ कि तू मैरौ डौर मानाई कैलैकि ताइंऐ आपणौ एकलौतौ छ़ोहरु भी मुकु बौचाइयौ नाई छ़ाडौ।”

तेबी ई अब्राहमै बेदी रै नज़दीक एक खाड़ु देखौ ज़ो झ़ाड़िउ दी थौ फौसौ औंदौ। परमेश्वरै इसहाका रै बौदलै बौल़ी लै खाड़ु रौ इंतजाम कियौ थौ अब्राहमे खुशी कौरियै खाड़ु री बौल़ी कौरी।

तैबै परमेश्वरै अब्राहमा लै बोलौ, “कैलैकि तू मुलै सब कुछ़ देणै वाल़ौ थौ, इदरा झ़ाउं कि आपणौ एकलौतौ छ़ोहरु भी। ऐथीलै हाउं ताउंलै आशीष देणै रौ वाइदौ कौराऊ। तैरौ वंश सौरगा रै तारै कु भी ज़ादौ हुआ कैलै कि ताऐं मैरौ हुकम मानौ आ ऐथीलै हाउं तैरै टौबरा रै ज़ौरिऐ दुनिया रै सारै लोगु लै आशीष दियाऊ।”