6. परमेश्वर इसहाका लै इंतज़ाम कौरा सा

ज़ेबी अब्राहम भौरी बूढ़ौ हुई गौ तेबी तेसरौ छ़ोहरु, इसहाक, एक मौरदा री उमरी रौ हुई गौ थौ। ऐथीलै अब्राहमे आपणौ एक नुकुर आपणै छ़ोहरु इसाहका लै सेज़ै देशा कु बोउटी आणना लै भेज़ौ ज़िऐ तेसरै रिश्तैदार रौआ थै।

ज़िऐ अब्राहमा रै रिश्तै दार रौआ थै तेस देशा दी डेउणा लै एक लांबै सौफरा बासिए तेस नुकरा री मुलाकात रिबका कु कौराई सै अब्राहमा रै भाई री कौनाल़डी थी।

रिबका आपणै टौबरा छ़ाड़ियौ तेस नुकरा आइलै मानी गोई। ज़ीणी इ सै पहुंच़ै इसहाकै तियां आइलै शादी कौरी गोई।

एक लांबै बौगता बासिऐ, अब्राहम मौरी गौ आ। तैबै परमेश्वरै अब्राहमा रै छ़ोहरु इसहाका लै, अब्राहमा आइलै बानी औंदौ वाइदै री वज़ाह कु आशीष देई। तेस वचना दी परमेश्वरा रौ एक वाइदौ थौ कि अब्राहमा रै अनगिणत वंश हुआई। पर रिबका रै कोई भी लोल़डै नाईं हुऐ।

इसाहकै रिबका लै प्राथना की, और परमेश्वरै तिआंरौ गौर्ब ज़ुड़ुवा लोल़डै हुणै रै लायक कियौ। ज़ेज़ै बौगतै सै छ़ोहरु तिआंरै गौर्बा दी इ थै सै आपु मांझ़ी पिटिंदै लागै, ऐथीलै ज़ो कुछ़ औंदै थौ लागौ औंदौ रिबकै परमेश्वरा आइलै बोली ऐरौ।

परमेश्वरै रिबका लै बोलौ, “ तू दुई लोल़डै पैदै कौराई और तिउंरै वंश दुई औलग-औलग ज़ाती बौणाई। पर बौड़ै छ़ोहरु कु पैदी हुणै वाल़ी ज़ाती छ़ोटै छ़ोहरु रै लोल़डै री आज्ञा जा मानणी।”

ज़ेबी रिबका रै लोल़डै हुऐ, ता बौड़ौ छ़ोहरु रातौ और बाल़ा वाल़ौ थौ, और तिउंऐ तेसरौ नाउं एसाव छ़ाड़ौ। पर छ़ोटौ छ़ोहरु एसावा रै फाइनै पाकड़ियौ पैदौ हुऔ, और तिउंऐ तेसरौ नाउं याकूब छ़ाड़ौ।