7. परमेश्वर याकुबा लै आशीष दिया सा

ज़ैबै सै छ़ोहरु बौड़ै हुऐ ता याकूबा कै घौरा कै रौइणौ आच्छ़ौ लागौ, पर एसाबा कै ज़ांगली ज़ानबरू रौ शिकार कौरणौ आच्छ़ौ लागौ। रिबकै याकूबा आइलै प्यार कियौ, पर इसाहाकै एसाबा आइलै प्यार छ़ाड़ौ।

एकी दिनै ज़ैबै एसाब शिकारा कौरियौ वापिस आशौ ता सेउ भौरी भोखौ थौ। एसावै याकूबा लै बोलौ, “ज़ो ताइंऐ चाणौ औन्दौ आ तेथ मांझ़िया कु थोड़ी रोटी मुलै दै।” याकूबै ज़वाब दियौ, “मु आइलै वाइदौ कर कि पेहलै छ़ोहरु हुणै रै कारण ज़ो सारी च़ीज ज़ो ताउंकै मिलनौ च़ाइं, तेस सारौ तू मुकै दिआलौ। और एसावै सै सारी च़ीज़ै याकूबा कै देणै रौ वाइदौ की एरौ। तैबै याकूबै तेसलै कुछ़ रोटी देई।

इसहाक एसाबा लै आशीष दैणौ च़ाहा थौ। पर एथकु पैहलै रिबकै इणौ कियौ, कि याकूबा रौ भेश बौदल़ियौ एसाव चाणौ और इसहाका आईलै धोखौ कियौ। इसहाक बुढ़ौ थौ और तेसकै नाईं दिशा थौ। ऐथीलै याकूबै एसाबा रै जूड़कै भिड़ै और बाकरी रौ खाल़डौ आपणै गौल़ै और बाई दी लौपेटौ।

याकूब इसहाका काए आशौ और बोलौ, “हाउं एसाव उ। हाउं ऐथीलै आशौ उ कि तू मुलै आशिष दिया।” ज़ैबै इसहाकै बाकरी रै बाल़ तोपै और जुड़कै शिंगै, तिणिए सुंच़ौ, कि एउ एसाब आ और तेसलै आशिष देई।

एसावै याकूबा कु मीश की कैलैकि याकुबै तेसरै पेहलकै छ़ोहरु रौ हक और साथाई आशिष भी च़ोरी ऐरी थी। एथीलै तिणिए याकूबा झ़ांगणै रौ बिच़ार कियौ।

पर रिबकै एसावा रौ बिच़ार शुणी ऐरौ। ऐथीलै तियांए याकूब आपणै रिश्तैदारा रै काए रौइणा लै दूर भेज़ौ।

याकूब कई बौरशा झ़ाउं रिबका रै रिश्तैदारु आइलै रौ। सेज़ै बौगतै तिणिए शादी की और तेसरै बारह छ़ोहरु एक छ़ोटूड़ पैदी हुई। परमेश्वरै सेउ भौरी सेठ चाणी ऐरौ आ।

एक बिए बौरशा झ़ाउं कनाना दी आपणै घौरा कु दूर रौइणै बासिए, याकूब आपणै टौबरा, आपणै नुकरु, और आपणै धौणु री टोली आइलै वापिस आशौ।

याकूब एथलै डौरौ औंदौ थौ कैलैकि तिणिए सुंच़ौ एसाव औज़ौ भी तेस झ़ांगणौ च़हा सा। एथीलै तिणिए भेटा रै रुपा दी धौणु री टोली एसावा काए भेज़ी। ज़ो नुकुर धौनु री टोली आणियौ आशै थै तिउंए बोलौ, “तैरौ नुकुर याकूब, इउं धौण ताउंकै दिआ सा। सेउ शीग्री आ आशदै लागौ औंदौ।”

पर एसाव ऐबै याकूबा लै नुकसान नाइं देणौ च़ाहा थौ। ऐथारै बौदल़ै, सेउ तेस एकी बारी तौइं देखियौ भौरी खुश थौ। तेथ बासी याकूब कनाना दी आरामा कौरी रौ। तैबै इसहाक मौरी गौ और याकूब और एसावै सेउ दाबौ। ज़ो वाइदै परमेश्वरै अब्राहम कु थै किऐ औन्दै सै ऐबै इसहाका कु याकूबा माथै आशी गोऐ।