8. परमेश्वर यूसुफ और तेसरै टौबर बौच़ावा सा

कई बौरशा बासिऐ, ज़ैबै याकूब बुढ़ौ हुई गौ थौ, ता तिणिए आपणै प्यारै छ़ोहरु यूसुफ तेसरै भाईउ री देखभाल़ कौरना लै भेज़ौ ज़ो धौणु रै शाल़ा री देखभाल़ कौरदै थै लागै औंदै।

यूसुफा रै भाई तेस आइलै मीश कौरा थै कैलै कि तेसरौ बाब तेस आइलै भौरी प्यार छ़ाड़ा थौ और एथलै भी कि यूसुफै सुइणौ देखौ कि सेउ तिउंरौ अधिकारी हुआ सा। ज़ेबी यूसुफ आपणै भाइउ काए आशौ ता तिउंए सेउ पाकड़ी ऐरौ आ और सेउ नुकरु रै बेच़णै वाल़ेउ रै हाथाई बेच़ी ऐरौ आ।

घौरै आशणै कु पेहलै यूसुफा रै भाईउए यूसुफा रै जुड़कै बाकरी रै लोउ दी भिज़ाई ऐरै। और तिउंए सै जुड़कै आपणै बाबा कै देखाए ताकी सेउ ज़ाणा लौ कि यूसुफ ज़ांगली ज़ानवरुए झ़ागीं ऐरौ आ। याकूब भौरी उदास थौ।

नुकरु बेच़णै वाल़ैउऐ यूसुफ मिस्रा लै नीं गौ आ नील नौइ काए बौसौ औंदौ मिस्र एक बौड़ौ और ताकती वाल़ौ देश थौ। तिउं नुकरु बेच़णै वाल़ैउऐ सेउ यूसुफ एकी सेठा कै नुकरा रै रूपा दी बेच़ी ऐरौ आ। युसुफै आपणै मालिका री बौड़िया सेवा की, और परमेश्वरै यूसुफा लै आशीष देई।

यूसुफा रै मालिका री बोउटिए यूसुफा काए सुतणा री कोशिश की, पर यूसुफै इणै कौरी परमेश्वरा रै खिलाफ पाप कौरना लै इनकार की। तिंआरै रोश आशी गौऐ और यूसुफा माथै झ़ूठौ आरोप लाई ऐरौ, ऐथीलै सेउ पाकड़ियौ ज़ेलखानै लै भेज़ी गौ। इदरा झ़ाउं कि ज़ेलखानै दी भी यूसुफ परमेश्वरा आइलै सौच़्च़ाई दी रौ, परमेश्वरै यूसुफा लै आशीष देई।

दुई बौरशा बासिऐ, यूसुफ इबी भी ज़ेलखानै दी थौ, भलै इ सेउ सौच्च़ौ थौ। एकी राचिए, फिरौन राज़ै दुई सुइणै देखै ज़िणै कौरी सेउ राज़ौ भौरी परेशान हुई गौ। तेस सुइणै रौ मतलब कोई भी बिदुवान नाईं बोली बौल़ौ।

परमेश्वरै यूसुफा कै सुइणा रै मतलब बोलणा री ताकत देई थी, एथीलै फिरौनै यूसुफ ज़ेलखानै कु आपु कँए औटाऔ। यूसुफै तेसकै तिउं सुइणै रौ मतलब बोलौ, “ परमेश्वर भरपूरा री फौसला वाल़ै साता बौरशा बासिऐ काल़ा रै सात बौरिश भेज़णै वाल़ौ आ।”

फिरौन यूसुफा कु एती खुश हुऔ कि तिणिए सेउ मिस्र देशा रौ दूजौ ताकती वाल़ौ आदमी छ़ाँटी ऐरौ आ।

यूसुफै लोगु कु आच्छ़ी फौसला वाल़ै सात बौरशा दी भौरीका नाज़ कौठै कौरना लै बोलौ। ज़ैबै साता बौरशा रौ काल़ आशौ तैबै यूसुफै लोगु लै नाज़ बेच़ौ ताकी तिउं कै खाणा लै पूरौ हुआ।

सेउ काल़ सिर्फ मिस्रा देशा दी नाईं पर कनाना दी भी पौड़ौ थौ। ज़िऐ याकूब और तेसरै टौबरा रै रौआ थै।

एथीलै याकूबै सौबी कु बौड़ै छ़ोहरु नाज़ा खरीदणा लै मिस्रा लै भेज़ै। ज़ैबै सै नाज़ा खरीदणा लै यूसुफा काए खौड़ै हुऐ ता तिउं भाईउए यूसफ नाईं प्राणौ। पर यूसुफै सै प्राणी गौए।

इणौ पौतौ कौरणा लै की सै बौदल़ुई गौए आ तिउं परखुणै बासिऐ, यूसुफै बोलौ, हाउं तुमारौ भाई यूसफ उ! डौरौ नाईं ज़ेबी तुमुए हाउं नुकरा रै रुपा दी बेच़ौ थौ तेबी तुमुए बुरै कौरणै री ठाणी थी, पर परमेश्वरै सै बुराई भौलाई लै इस्तैमाल की आ! आशौ मिस्रा दी रौ ताकी हाउं तुमुलै और तुमारै टौबरा लै नाज़ा रौ इंतज़ाम कौरी बौल़ू।”

ज़ेबी यूसुफा रै भाई घौरै वापिस आशै ता तिउंऐ आपणै बाबा याकूबा लै बोलौ की आमारौ भाई यूसुफ इबी भी ज़िउंदौ आ ता सेउ भौरी खुश हुऔ।

हालाँकि याकूब बुढ़ौ आदमी थौ तैबै भी सेउ आपणै पूरै टौबरा आइलै मिस्रा लै डिऔ, और सै तिऐ बौसी गौऐ। याकूबा रै मौरणै कु पैहलै, तिणिए आपणै सारै छ़ोहरु लै आशिष देई।

ज़ो वाइदै परमेश्वरै अब्राहमा आइलै किए थै सै इसहाका माथी, और तेथ बासिऐ याकूब, तेथ बासिऐ तेसरै बारह छ़ोहरु और तेसरै टौबरा माथी आशी गौई थी। तिउं बारह छ़ोहरु रै वंश इस्राएला रै बारह गोत्र बौणी गौऐ।