9. परमेश्वर मूसा औटावा सा

यूसुफा रै मौरणै बासिए तेसरै सारै रिश्तैदार मिस्रा दी बौसी गौए। सै और तेसरै वंश कई बौरशा झ़ाउं मिस्रा दी रौऐ और तिउंए भौरी औलाद पैदी की। तिउंलै इस्राएली बोला थै।

कई शौ साला बासिऐ, इस्राएलिउ री गिनती भौरी बौड़ी गोई थी। यूसुफै ज़ो कुछ़ मिस्रिउ लै कियौ मिस्री सारौ कुछ़ बिसरी गोए थै। सै मिस्रिउ कु डौरी गोए कैलै कि सै गिनती दी भौरी हुई गोए थै। एथीलै सेज़ै बौगतै मिस्रिउ माथी राज़ कौरणै वाल़ै फिरौनै इस्राएली मिस्रिउ रै गुलाम चाणी गोए।

मिस्रिउए इस्राएली भौरीका घौर और इलाकै चाणना लै मज़बूर किए। तेस काठै कामा कौरियौ तिउंरी ज़िदंगी भौरी दुखी हुई गोई, परमेश्वरै तिउं लै आशिष देई और तिउंरै भौरी लोल़डै पैदै हुए।

फिरौनै देखौ कि इस्राएलिउ रै भौरी लोल़डै औंदै लागै औंदै, एथीलै तिणिऐ आपणै लोगु लै इस्राएलिउ रै छ़ोटै छ़ोहरु नील नौई दी शोटिणै और झ़ांगणै रौ हुकम दैयौ।

एकी इस्राएली छ़ेवड़िऐ एक छ़ोहरु पैदौ कियौ। तिआं छ़ेउड़िए बौशा झ़ाउं सेउ छ़ोहरु च़ोरी छ़ाड़ौ।

ज़ैबै तेस छ़ोहरु रै मा-बाबा रै बेबश हुई ता सै च़ोरी ना बौल़ै, ता तिउंए झ़ांगणै कु बौच़ाउणा लैएकी तैहरनै वाल़ी टोकरी दी नील नौई रै डिका दी सरकांडै मांझ़ी छ़ाड़ी गौ। तेसरी बौड़ी बौइण च़ोकसिए रौई कि एस छ़ोहरु आइलै का हुआ सा।

फिरौना री छ़ोटिए तियां टोकरी दी सेऊ छोहरु देखौ। और तिंआऐ सेउ आपणै छ़ोहरु रै रूपा दी अपणाई ऐरौ। और तेस छ़ोहरु लै दूधा प्याउणा लै एक इस्राइली छ़ेउड़ी छ़ाड़ी एरी। तिआंकै इणौ ठेउ नाईं थौ कि ऐ छ़ेउड़ी एस छ़ोहरु री औसली मा सा। ज़ैबै सेउ छ़ोहरु एती बौड़ौ हुऔ कि ऐबै तेसकै आपणी मा रै दूधा पीणा री कोई ज़रुरत नाईं थी। ता तिआंए सेउ छ़ोहरु फिरौना री छ़ोटी कै वापिस देई गो आ, तेसरौ नाउं मूसा थौ।

ज़ेबी मूसा बौड़ौ हुई गौ थौ, ता तिणिऐ देखौ कि एक मिस्री इस्राएली पीटदै थौ लागौ औंदौ। मूसै आपणौ साथी इस्राएली बौच़ाउणा री कोशिष की।

मूसै सुंच़ौ कि तेस कोइयौ नाईं देखदै लागौ औंदौ ता तिणिऐ सेउ मिस्री झ़ांगी ऐरौ और तेसरौ मौड़ौ दाबी गौ। पर मूसै ज़ो कियौ थौ सेउ कुणिऐ देखी ऐरौ थौ।

फीरौना कै पौतौ लागौ कि मूसै का कियौ आ। तिणिऐ तेस झ़ांगणै री कोशिश की, पर मूसा मिस्रा कु ज़ांगला दी भागी गौ और फिरौना रै फौज़ी तेस लोड़ी नाईं बौल़ै।

मुसा मिस्रा कु दूर ज़ांगला दी डेइयौ एक ग्वाल़ौ बौणी गौ। तिऐ तिणिऐ एकी छ़ेउड़ी आइलै शादी की गोई और तेसरै दुई छ़ोहरु हुई गोऐ।

मूसा आपणै शेउरा री भेरी रै शाल़ा री देख-भाल़ कौरा थौ। एकी दिनै, तिणिऐ देखौ कि आग झ़ाड़ी दी लागी ऐन्दी पर झ़ाड़ी नाईं थी ज़ाल़दै लागी औंदी। मूसा आगी देखदै झ़ाड़ी रै नज़दीक डैउंदै लागौ ता तेबी परमेश्वरै मूसा आइलै बुशै लाई और बोलौ, “ओ मूसा, आपणै बूट पोरु गाड़। कैलैकि तू एक पवित्र ज़ागाह दी खौड़ी ई।”

परमेश्वरै बोलौ, मुइंऐ लोगु रै बौड़ै दुख देखै इ। हाउं ताउं फिरौना काऐ भेज़ाउ ताकी तू इस्राएलिउ मिस्रा री गुलामी कु छ़ुड़ावा। हाऊं तिउंकै कनान देश दिआउ, सेज़ौ देश ज़ासरौ वायदौ मुंइऐ अब्राहम, इसहाक और याकूबा आइलै कियौ थौ।”

मूसै पूछ़ौ, “अगर लोग मुंकु तैरौ नाऊं पुछ़ा लै ता हाउं का बोलु लौ?” परमेश्वरै बोलौ, मैरौ नाऊं, “ज़ो हाउं आ सेउ हाउं आ। तिउं आइलै बोलै, ज़ो हाउं आ सेऊ हाऊं आ।” तिणीए हाउं तुमु काऐ भेज़ो उ।’ तिउंकै इणौ भी बोलै, हाउं तुमारै बुज़ुर्ग अब्राहम, इसहाक और याकूबा रौ परमेश्वर यहोवा उ।’ मैरौ एऊ नाउं सौदा रौ आ।”

मूसा डौरा थौ और फिरौना काऐ नाईं डेउणौ च़ाहा थौ कैलैकि तिणिऐ सुंच़ौ कि सेउ आच्छ़ै कौरी नाईं बोली बौल़दौ, एथीलै परमेश्वरै मूसा रौ भाई हारून तेसरी मज़द कौरणा लै भेज़ौ।