10. दस मुश्किल
परमेश्वरै मूसा और हारून च़ितलाए कि फिरौना रौ ज़िऊ काठौ हुआ सा। ज़ैबै सै फिरौना काए डिए ता तिउंए बोलौ, “इस्राएला रौ परमेश्वर इणौ बोला सा, ‘मैरै लोगु डेउणै दै!” पर फिरौनै तिउंरी नाईं शुणी और इस्राएली डेउणै और आज़ाद कौरणै रै बज़ाय काठै कामा कौरणा लै मज़बूर किए।
फिरौन इस्राएली लोगु छ़ाड़ना लै लगातार मौना थाकौ कौरदै लागी, एथीलै परमेश्वरै मिस्रा माथी दस मुश्किलै भेज़ी। इउं मुश्किला रै ज़ौरिए परमेश्वरै फिरौना कै देखाऔ कि सेउ फिरौन और मिस्रा रै देउ कु भौरी ताकती वाल़ौ आ।
परमेश्वरै नील नौ लोऊ दी बौदली गोई, पर फिरौनै से नाईं डेउनै दै।
परमेश्वरै पूरै मिस्रा दी मानु भेज़ै। फिरौनै मानु दूर कौरना लै मूसा कु औरज़ की। पर सारै मानु मौरनै बासिए, फिरौनै आपणौ ज़िउ काठौ कियौ और इस्राएली नाईं डेऊणै दै।
एथीलै परमेश्वरै धणकुटी री मुश्किल भेज़ी। तेथ बासी तिणिए डाँसेउ री मुश्किल भेज़ी। फिरौनै मूसा और हारून औटाऐ और तिउं आइलै बोलौ कि अगर सै इयां मुश्किल रोका लै ता इस्राएली मिस्रा छ़ाड़ियौ डेइ बौल़ाई। ज़ैबै मूसै प्राथना की ता परमेश्वरै मिस्रा कु डाँस भौगाई गोए। पर फिरौनै आपणौ ज़िउ काठौ कियौ और सिए लोग आज़ाद हुइयौ डेउणै नाईं दिए।
एथ बासी, परमेश्वरै मिस्रिउ रै सारै धाचणै वाल़ै धौण बिमार हुइयौ मौरणै दिए। पर फिरौना रौ ज़िउ काठौ हुई गौ थौ और तिणिए इस्राएली लोग डेउणै नाईं दै।
तैबै परमेश्वरै मूसा कु फिरौना रै सामनै छ़ार फुकुरणा लै बोलौ। ज़ेबी तिणिए इणौ कियौ ता मिस्री लोगु दी दुखणै वाल़ै फालु निकल़ी गोए, पर इस्राएलिउ दी कुछ़ नाईं हुऔ। परमेश्वरै फिरौना रौ ज़िउ काठौ कियौ, और इस्राएली आज़ाद हुईयौ डेउणै नाईं दिए।
एथ बासी, परमेश्वरै शौरु पाऐ मिस्रा री आधै कु ज़ादी फौसल नाश की और ज़ुण-कुण बाईरै निकल़ौ सेउ झ़ांगी ऐरौ। फिरौनै मूसा और हारून औटाए और तिउंलै बोलौ, “ मुइंए पाप कियौ आ। और मूसै प्राथना की सौरगा कु शौरु लागणै रुकी ऐरै।
पर फिरौनै तौइं पाप कियौ और आपणौ मन काठौ कियौ। तिणिए इस्राएली आज़ाद हुईयौ डेउणै नाईं दिए।
और परमेश्वरै मिस्रा माथी थाड़ेऊ रौ झ़ुंड आशणै दियौ। इउं थाड़ेउए सै सारी फौसलै खाई ऐरी ज़ो शौरु कु नाश हुणै कु बौच़ी ऐंदी थी।
तैबै परमेश्वरै राच पाई ऐरी ज़ो चिआ दिना झ़ाउं बौणी रौई। राच ऐती न्यारी थी की लोग आपणै घौरा कु निकल़ी नाईं बौल़ै। पर ज़िए इस्राएली लोग रौआ थै तिऐ प्याशौ थौ।
इउं नौ मुसिबता बासिऐ भी, फिरौनै इस्राएली आज़ाद हुईयौ डेउणै नाईं दिए। कैलै कि फिरौनै नाईं शुणौ थौ। एथीलै परमेश्वरै एक आखरी मुश्किल भेज़णै री तरकीब चाणी। इयै फिरौना रौ ज़िउ बौदल़ा सा।
निर्गमन अध्याय 5-10 कु बाइबला री एक काहणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।