11. फसह रौ साज़ौ

परमेश्वरै मूसा और हारून फिरौना काऐ इणै बोलणा लै भेज़ै कि इस्राएलिउ डेऊणै दै। तिउंऐ सेऊ च़ितलाऔ कि अगर सेऊ डेऊणै नाईं देआ लौ, ता परमेश्वर मिस्रा रै लोगु रै धौण और पैहलकै छ़ोहरु झ़ांगा सा। फिरौनै इणौ शुणियौ परमेश्वरा माथी विश्वास कौरणै और तिउंरी बूश मानणा लै इन्कार कौरी गोई।

परमेश्वरै तेस माथी विश्वास कौरणै वाल़ै सौबी रै पैहलकै छ़ोहरु बौच़ाउणा लै एक तरीकै रौ इन्तज़ाम कियौ। हर टौबर एक शानौ गाबड़ू नीइंयौ काटणौ थौ।

परमेश्वरै इस्राएलिउ कु तेस गाबड़ु रौ लोऊ नीइंयौ आपणै घौरा रै दारा माथी लाइणा लै बोलौ। तिउंऐ तेसरौ मास भुज़णौ थौ और रोटी आइलै फेटी फेटी खाणौ थौ। तेथ बासीऐ तिऊं एकदम मिस्र देशा कु निकुल़ना लै तैयार हुणा लै बोलौ।

ज़ो हुकम परमेश्वरै इस्राएली लोगु लै कौरणा लै बोलौ थौ तिउंऐ तिणी ई सब कुछ़ कियौ। आधी राचिऐ परमेश्वर मिस्रिउ रै हर टौबरा रै पैहलै छ़ोहरु झ़ांगियौ मिस्र देशा रै बीच़ा दी आशौ।

इस्राएलिउ रै हर एकी रै धरा रै दारा माथी लोऊ लागौ औंदौ थौ, एथीलै परमेश्वरै तिउंरै घौर छ़ाड़ी ऐरै। तिउंरै घौरा दी सारै लोग सुखी थै। सै गाबड़ु रै लोऊ रै कारणै बौच़ी ऐरै।

पर मिस्रिउऐ परमेश्वरा माथी विश्वास नाईं कियौ थौ और तेसरौ हुकम नाईं मानौ थौ। ऐथीलै परमेश्वरै तिउंरै घौर नाईं छ़ाड़ै। परमेश्वरै मिस्रिउ रै हर एक पैहलकै छ़ोहरू झांगी ऐरै।

ज़ेला दी पाऐ औंदै कैदिउ कु नीइंयौ फिरौन राज़ै रै पैहलकै छ़ोहरु झ़ाऊं सारै झ़ांगी गोऐ। आपणै बौड़ै दुखा रै कारण मिस्रा रै भौरी लोग लेरदै थै लागै औंदै और दुख मौनाउंदै थै लागै औंदै।

सेज़ी राचिऐ, फिरौनै मूसा और हारून औटाऐ और बोलौ। “इस्राएलिउ नीइंयौ एकदम मिस्रा कु पोरु निकल़ौ!” मिस्रा रै लोगुऐ भी इस्राएलिउ कु निकुल़नै री औरज़ की।