12. निर्गमन मतलब डेउणौ

इस्राएली लोग मिस्रा कु निकल़ियौ भोरी खुश थै। सै ऐबै गुलाम नाईं थै, और सै वाइदै वाल़ै देशा लै थै डेउंदै लागै औंदै! ज़ो कुछ़ भी इस्राएलिउऐ मांगौ, मिस्रिउऐ तिउंकै सेऊ सब कुछ़ देऔ, इदरा झ़ांउ की सुनौ और च़ाँदी तौइं ओर किमती वाल़ी च़ीज़ै भी पोरु देई। दुजै देशा रै कुछ़ लोगुऐ परमेश्वरा माथी विश्वास कियौ और ज़ेबी इस्राएली लोग मिस्रा कु निकल़ै ता सै भी तिऊं आइलै हुई गोऐ।

दुसै रै बौगतै बादला रौ एक बौड़ौ खांबौ तिउंरै औगाड़ी-औगाड़ी आंडौ। और राची रै बौगतै आगी रौ खांबौ बौणी गौ। परमेश्वर ज़ो कि तेस बादला रै खाँबै और आगी रै खाँबै दी थौ। सौदा तिउं आइलै थौ और तिणिऐ आंडदी बारी तिउंरी अगुवाई की। तिऊं सिरफ एती जा थौ कौरणौ कि तेस पिछ़ाड़ी आंड़ा।

थोड़ै बौगता बासिऐ, फिरौन और तेसरै लोगुऐ आपणौ मन बौदल़ी गौ। सै इस्राएलिउ दुजी बारै आपणै गुलाम चाणनै च़ाहा थै। एथीलै तिउंऐ इस्राएलिउ रौ पिछ़ौ कियौ। सेऊ पेमेश्वर इ थौ ज़ुणिऐ तिउंरौ मन बौदल़ी गौ थौ। तिणीऐ इणौ एथलै कियौ कैलैकि सेऊ च़ाहा थौ कि सारै इणौ ज़ाणा लै कि फिरौना कु और मिस्रिउ रै सारै देवा कु सेऊ, यहोवा परमेश्वर, भौरी तागती वाल़ौ आ।

ज़ेबी इस्राएलिउए मिस्रा री फौज़ आशदै देखी ता तिउंकै पौतौ लागौ कि सै फिरौना री फौज़ और रातै समुंदरा रै बीच़ा दी फौसी गौऐ। सै भौरी डौरै और लेरदै लागी गोऐ, “आमुऐ मिस्र कैलै छ़ाड़ौ? आमै मौरणै वाल़ै ई!”

मूसै इस्राएलिउ लै बोलौ, “डौरौ नाईं! परमेश्वर आज़ तुमारै बौदल़ै लौड़ाई कौरा सा और तुमु बौच़ाउवा सा।” तैबै परमेश्वरै मुसा कै बोलौ, इउं लोगु लै रातै समुंदरा भिलै बौड़ना लै बोल।”

तैबै परमेश्वरै सेऊ बादला रौ खाँबौ नीइंयौ इस्राएली और मिसी रै बीच़ा दी छ़ाड़ी गौ आ ताकी मिस्री लोग इस्राएली लोगु देखी ना बौल़ा।

परमेश्वरै मूसा लै समुंदरा भिलै हाथा बौड़ाउना लै बोलौ। तैबै परमेश्वरै बागुरा कौरी रातै समुंदरा रौ पाणी उल़टी और सुल़टी भिलै कौराई ऐरौ, ज़िणै कौरी समुंदरा दी बाट बौणी गोई।

इस्राएली लोग आपणी दुइया भिला रौ पाणी दवाली आइले शुकी ज़ौबीना माथी समुंदरा रै बिचा दी डेउंदै लागै।

तैबै परमेश्वरै सेऊ बादला रौ खाम्बौ तिऐं बाटा कु पोरु च़ुंगौ ताकी मिसी लोग इस्राइली लोगु बौच़ियौ डेउन्दै देखी सौका। मिस्री लोगुऐ तिऊं पाकुड़ना रौ विच़ार कियौ।

और तिउंऐ समुंदरा रै ज़ौरिऐ तियां बाटा दी इस्राएलिउ रौ पिछ़ौ कियौ, पर परमेश्वरै मिस्री डौराई गौऐ तिउंरै रथ फौसाई गौऐ। सै च़िलांदै लागै, “भागौ! इस्राएलिउ री तौरफा कु परमेश्वर थौ लौड़दै लागौ औंदौ!”

सारै इस्राएली समुंदरा पारभिलै पहुंच़ी गोऐ। तैबै परमेश्वरै मूसा लै बोलौ कि समुंदरा भिलै तौइं हाथ बौड़ाउ। ज़ेबी मूसै इणौ कियौ, ता पाणी मिस्रिउ रै फौज़ी माथी आशी गौ और पाणी पैहलकौ ज़िणौ हुई गौ। सारी मिस्री फौउज़ डूबी गोई।

ज़ेबी इस्राएलिउऐ देखौ कि मिस्री मौरी गोऐ थै ता तिउंऐ परमेश्वरा माथी विश्वास कियौ। तिउंऐ विश्वास कियौ कि मूसा परमेश्वरा री तौरफा कु भविष्यद्वक्ता सा।

इस्राएली लोग एथलै भी खुश थै कि परमेश्वरै से मौरनै कु और गुलाम हुणै कु बौच़ाऐ आ। ऐबै सै परमेश्वरा री आराधना कौरदै और तेसरै हुकम मानणा लै आज़ाद थै। इस्राएलिउऐ आपणी आज़ादी रौ साज़ौ मानणा लै और परमेश्वरा री तारीफ कौरणा लै कई गीत गाऐ कैलैकि तिणिऐ सै मिस्रिउ री फौउज़ा कु बौच़ाऐ थै।

परमेश्वरै इस्राएलिउ कै हर बौरशै एक साज़ौ मौनाउणा रौ हुकम दैयौ इणौ याद कौरणा लै कि परमेश्वरै मिस्रि लोग किणै हौराऐ और इस्राइली लोग गुलाम हुणा कु आज़ाद किऐ। एसलै फसह रौ साज़ौ बोलौ थै। एस साज़ै लै तिउं च़ांगौ और शानौ गाबड़ु बौल़ी कौरणौ थौ, सेउ भुज़णौ थौ, और तेस बिण सौंज़ेड़े री रोटी आइलै खाणौ थौ।