13. इस्राएला आइलै परमेश्वरा रौ वाइदौ
ज़ेबी परमेश्वरै इस्राएली लोग रातै समुंदरा पारभिलै निंऐ तेथ बासिऐ, परमेश्वरै सै ज़ांगला बाटिऐ सीनै नावां रै पर्वता री भिलै नींऐ। एउ सेउ इ पर्वत थौ ज़िऐ मूसै ज़ौल़दी झ़ाड़ी देखी थी। तिऊं लोगुऐ तेस पर्वता थालिऐ आपणै तांबु पाऐ।
परमेश्वरै मूसा और इस्राएला लोगु लै बोलौ, “तुमुए सौदा मेरी बुशै मानणी आ और ज़ो वाइदौ हाउं तुमु आइलै बानुलौ तेथारै अनुसार आंड़ा लै, “ता तुमे मैरौ ईनाम भौरी किमती धन, और याजकु रौ राज़, और पवित्र ज़ाती ठहराई।”
परमेश्वरा रै ज़ौरिऐ तिऊं काऐ आशणा लै चिआ दिना झ़ाउं आपणौ ज़िऊ तैयार कियौ। तैबै परमेश्वर सीनै पर्वता री च़ोटी माथा कु तौल़ै उतरौ। ज़ेबी सेउ आशौ ता भुइंच़ल आशौ, बिज़ल़ी च़ौमकी, धूँऔ उठौ, और तुरही री ज़ोरै आवाज़ आशी। तैबै मूसा आपु पर्वता माथी च़ौड़ी गौ।
तैबै परमेश्वरै लोगु आइलै वाइदौ बानौ। तिणिए बोलौ, “हाउं तुमारौ परमेश्वर यहोवा उ। हाउं इ उ ज़ुणिए तुमै मिस्रा री गुलामी कु छ़ुड़ाऐ आ। कासी भी दुजै देवा री भौगती नाईं कौरियौ।”
“मूरती नाईं चाणियौ और तिउं नाईं पुज़ीयौ, कैलैकि हाउं, यहोवा, तुमारौ एक इ परमेश्वर उ। बुरै कामा लै मैरौ इस्तैमाल नाईं कौरियौ। सब्ता रौ दिन पवित्र मानणा लै याद छ़ाड़नौ। दुजी बुशु दी छ़ौ दिना दी आपणै सारै काम कौरणी, सातवौ दिन तुमुलै आराम कौरणै और मूँ याद कौरणै रौ दिन आ।”
“आपणै मा-बापा रौ आदर कौरणौ। खून नाईं कौरणौ। गांदै काम नाईं कौरणै। आपणै पड़ोसी री छ़ेउड़ी, तेसरै घौर, या तेसरी केज़ी भी च़ीज़ा निणा री आश नाईं कौरणी।”
तैबै परमेश्वरै इऐ दस हुकम दुई ज़ानटै दी लिखियौ मूसा कै दै। परमेश्वरै मानणा लै दस हुकम दै। अगर सै इउं हुकम माना लै ता परमेश्वरै आशिष देणै और बौच़ाउणै रौ वाइदौ कौरा सा। इणौ भी बोलौ कि अगर सै इउं हुकम नाईं माना लै ता तिउंलै डाँड देआ सा।
परमेश्वरै इस्राएलिउ लै एक बौड़ौ तांबु चाणना लै बोलौ— मिलाप वाल़ौ तांबु। परमेश्वरै तिउंकै ठीक बोलौ कि एऊ तांबु किणौ चाणनौ आ, और तेथ भितै का का च़ीज़ै छ़ाड़नी आ। तिणिए तिउंलै सेउ तांबु दुई कौमरै दी बाँटणा लै बोलौ और एक बौड़ौ पौर्दौ चाणना लै भी बोलौ। परमेश्वर तेस पौर्दै भीतरी भीलै वाल़ै कौमरै दी आशा सा और तिऐ रौआ सा। ज़िए परमेश्वर थौ तेस कौमरै दी डेउणा री ज़ाज़त सिरफ बौड़ै याजका लै थी।
तिउं लोगुऐ तेस मिलाप वाल़ै तांबु रै सामनै एक बेदी चाणनी जा सा। कोई भी ज़ो परमेश्वरा रै कानून नाईं माना लौ सेउ तियां बेदी माथी एक धौण आणा लौ। तैबै याजक तेस बौल़ी कौरा और बेदी माथी परमेश्वरा लै बौल़ी रै रुपा दी जाल़ा। परमेश्वरै बोलौ कि तेस धौणा रौ लोउ तेस आदमी रै पाप दुमा लौ। इणी रीती कु, ऐबै परमेश्वर तेस पाप नाईं देखदौ। सेउ आदमी परमेश्वरा री नौदरी दी “ शुध्द” ठहरा। परमेश्वरै मूसा रै भाई हारून और हारूना रौ वंश आपणै याजक हुणा लै छ़ाँटौ।
परमेश्वरै तिउं लोगु कै ज़ो हुकम दै थै सै तिउं मानणा लै तैयार हुऐ। सै सिरफ परमेश्वरा रै लोग हुणा लै और सिरफ तेसरी आराधना कौरणै लै तैयार हुए।
कई दिना झ़ाउं, मूसा सीनै पर्वता माथी रौ। सेऊ परमेश्वरा आइलै बुशै लाइंदै थाकौ लागी। पर लोग तेस पौखदै-पौखदै खौड़ी गौए। एथीलै तिउंए हारूना काए सुनौ आणौ और तेसकु एक मूरती चाणना लै बोलौ ताकी सै परमेश्वरा छ़ाड़ियौ तियां मूरती री आराधना कौरा। इणी रीती कु, तिउंए परमेश्वरा रै खिलाफ पाप कियौ।
हारूनै बाशटु रै रूपा दी सुनै री एक मूरती चाणी। तिउं लोगुए तियां मूरती री आराधना कौरणी शुरु की और बौल़ी च़ौड़ाई। तिउंरै पापा री वज़ाह कु परमेश्वर तिउंकु भौरी रोशुऔ। सेउ तिउं नाश कौरणौ च़ाहा थौ। पर मूसै तिउं नाईं झ़ांगणै री औरज़ की। परमेश्वरै तेसरी औरज़ शुणी और सै नाश नाईं किऐ।
तैबै मूसा सीनै पर्वता कु तौल़ै उतरौ। सेउ तिउं दुई ज़ांटी आणियौ आशौ ज़ेथ माथी परमेश्वरै दस आज्ञा लिखी थी। तैबै तिणिए सै मूरती देखी। तेसरै एती रोश आशै तिणिए सै ज़ांटी भानियौ च़ूर-च़ूर किऐ।
तैबै मूसै सै मूरती पिशियौ नांदी कौरी गौई, और पाणी दी मिलाइयौ सेउ पाणी लोगु लै पिलाऔ। परमेश्वरै तिउं लोगु माथी एक मुश्किल भेज़ीयौ तेथादी भौरी लोग मौरी गौऐ।
ज़ो ज़ांटै मूसै भानी गौऐ थै तिउंरी ज़ागा दी निणा लै मूसै तिउं दस आज्ञाउ री पाथरा री नौई ज़ांटी चाणी। तैबै सेउ तौइंऐ पर्वता माथी डेई गौ और प्राथना की परमेश्वर तिउं लोगु माफ कौरा। परमेश्वरै मूसा री प्राथना शुणी और सै माफ कौरी ऐरै। नौई ज़ांटी माथी दस आज्ञाउ आणियौ मूसा पर्वता कु तौल़ै उतरौ। तैबै परमेश्वरै सीनै पर्वता कु नीईंयौ वाइदा रै देशा झ़ाउं इस्राएलिउ री अगुवाई की।
निर्गमन अध्याय 19-34 कु बाइबला री एक काहणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।