14. ज़ांगला दी भौटकुणौ

परमेश्वरै इस्राएलिउ कै सै नियम बोलनै बंद की गौऐ ज़ेथ माथी आंडणा लै तिउंकै बोलौ थौ। तैबै तिणिऐ सीनै पर्वता कु औगाऊं तिउंरी अगुवाई की। सेऊ तिउं वाइदा रै देशा दी निणौ च़हा थौ। तेस देशा लै कनान बोला थै परमेश्वर बादला रै खांबै दी तिउंरै औगाड़ी-औगाड़ी आंड़ा थौ, और सै पिछ़ाड़ी-पिछ़ाड़ी आंड़ा थै।

परमेश्वरै अब्राहम, इसहाक और याकूबा कु वाइदौ कियौ थौ कि सेऊ वाईदा रौ देश तिउंरै वंशा लै दिया, पर ऐसै बौगतै तिऐ भौरी का ज़ाती रौआ थी। तिउंलै कनानी बोला थै। सै कनानी लोग परमेश्चरा री आराधना नाईं कौरा थै। और तेसरी आज्ञा नाईं माना थै। सै झ़ूठै देवा री आराधना कौरा थै। और भौरी बुरै काम कौरा थै।

परमेश्वरै इस्राएलिउ लै बोलौ, “ज़ैबै तुमै तेस वाइदा रै देशा दी डेआलै ता सारै कनानिउ कु छ़ुटकारौ पाइणौ। तिउं आइलै सुलौ नाईं कौरणौ और तिउं आइलै शादी नाईं कौरणी। तुमुए तिउंरी सारी मूरतिउ आच्छ़ा कौरी नाश कौरणी आ। अगर तुमे मेरी आज्ञा नाईं माना लै ता, ता तुमै मैरै बज़ाए तिउंरै देउवा री आराधना कौरदै लागालै।”

ज़ेबी इस्राएली कनाना रै बानै खाऐ पहुंच़ै, मूसै इस्राएलिउ रै हर एक गोत्रा मांझ़िया कु एकी एकी कौरियौ बारह पुरुष छ़ाँटै। तिणीए सै कनान देशा रै भेद निणा लै भैज़ै कि सेउ देश किणौ देश आ। तिउंए तिउं कनानिउ रौ भैद भी नीणौ थौ कि देखुलै कि सै तागती वाल़ै थै या कमज़ोर थै।

तिऊं बारहा मौरदुऐ पुरै कनान देशा बाटिऐ डेइयौ चालिस दिना रौ सफर कियौ और तैबै सै वापिस आशै। तिउंऐ लोगु लै बोलौ, “सेऊ देश भौरी नौमी वाल़ौ आ तिऐ भौरी फसल आ लागी ऐन्दी!” पर दस भेदिउऐ बोलौ, “तिउंरै इलाकै भौरी मज़बूत ई और तिदलै आदमी लाम्बे-च़ौअड़ै ई! अगर आमै तिऊं माथै हामलौ कौरुलै, ता सै पाकौ आमु हरावा ई, और आमु झ़ांगा ई।”

तेबी ई कालेब और यहोशू तौइं दुई भेदिउऐ बोलौ, “इयै बूश सौच्च़ी आ कि कनाना रै लोग लांबै और ताकती वाल़ै ई, पर आमे तिऊं पाकै ई हौराई! कैलैकि परमेश्वर आमुलै लौड़ाई कौरा सा!”

पर लोगुऐ कालेब और यहोशू री नाईं शूणी। सै मूसा और हारूना लै रोशुई गौऐ और बोलौ, “तुमुए आमै इणै खौतरनाक ज़ागा दी कैलै आणै ई? आमु मिस्रा दी इ रौइणौ च़ाईं थौ। अगर आमे तेस देशा दी डेउलै ता आमे लौड़ाई दी पोरु मौरी आ, और कनाना रै लोग आमारी बोउटी और छ़ोहरु नुकुर चाणाई।” सै लोग मिस्रा लै वापिस डेउणा लै आपु कालै एक स्याणौ छ़ाँटणौ च़ाहा थै।

ज़ैबै लोगुऐ इणौ बोलौ ता परमेश्वर भौरी रोशुऔ। सेउ मिलाप वाल़ै लांबु दी आशौ और बोलौ, तुमुऐ मैरै बिरोधाई पाप कियौ आ, तुमु सौभी ऐस ज़ांगला दी भौटकुणौ जा सा। हर एक आदमी ज़ो बीश बौरशा और तेथकु ज़ादी उमरी रौ आ तिए मौरा सा और केबी भी तेस देशा दी डेई ना बौल़ा लौ ज़ो तुमकै दिआऊ। सिर्फ कालेब औ यहोशू इ तेथा दी डेई बौल़ाई।

ज़ेबी लोगुऐ इणौ शुणौ, ता सै दुखी हुई गौए कैलै कि तिउंऐ पाप कियौ थौ। ऐथीलै तिउंऐ कनान देशा माथी लौड़ाई कौरणा रौ फैसलौ निंऔ। मूसै सै नाईं डेउणा लै खौबरदार किऐ कैलैकि परमेश्वर तिउं आइलै नाईं डेउंदौ, पर तिउंऐ तेसरी नाईं शुणी।

परमेश्वर तिउं आइलै लौड़ाई दी साथाई नाईं डिऔ थौ, एथलै कनानिउए सै हौराई गौए और तिउं मांझ़िऐ भौरीका झ़ांगी भी गौए। तैबै इस्राएली लोग कनाना कु वापिस मुड़ी गौए। तेथ बासी दुई बिऐ बौरशा झ़ाउं, सै ओरु-पोरु भौटकदै लागै।

इस्राएली लोगु रै ज़ौरिए ज़ांगला दी दुई बिऐ बौरशा दी भौटकुणा रै बौगतै, परमेश्वरै तिउंरी ज़रुरत पूरी की। तिणिऐ तिउंलै सौरगा कु “मन्ना” बोलणै वाल़ी रोटी देई। और बटेरु रै झ़ुंड ज़ेथलै बाडै बोलाई तिउंरै डेरै दी भेज़ै ताकी तिउंलै खाणा लै मास हुआ। तेस पूरै बौगतै, परमेश्वरै तिउंरै जूड़कै और बूट च़िरिणै कु बौच़ाई छ़ाड़ै।

इदरा झ़ाउं कि परमेश्वरै तिउंलै पिणा लै ज़ादुई रूपा कौरी डोका कु पाणी भी गाड़ौ। पर इणौ सारौ कुछ़ कौरियौ भी, इस्राएली लोगुए परमेश्वरा रै बिरोधा इ और मूसा रै बिरोधाई च़ुगली पाई और कुड़कुड़ाए तैबै भी परमेश्वर विश्वास वाल़ौ थौ। तिणिऐ वाइदौ कियौ थौ कि सेऊ अब्राहम, इसहाक, और याकूबा रै वंशा लै कौरा तिणिऐ सेऊ कियौ।

तौइं एकी बौगतै तिउंकै पीणा लै पाणी नाईं थौ, परमेश्वरै मूसा लै बोलौ, “डोका आइलै बुशै ला, और तेथाकु पाणी निकल़ा सा।” पर मूसै डोका कु बुशै नाईं लाई। तेथारै बौदलै, डोका दी दुई बारै डोकै दी डिंगै री लाई। इणै कौरी मूसै परमेश्वरा री बेईज़ती की। सारैउ लै पिणा लै डोका कु पाणी ता निकल़ौ, पर परमेश्वर मूसा आइलै रोशुऔ। तिणी बोलौ, कैलै कि ताइंए इणौ कियौ आ, एथीलै तु वाइदै वाल़ै देशा दी नाईं डेई बौल़दौ।

ज़ैबै इस्राएली दुई बिऐ बौरशा झ़ाऊं ज़ांगला दी भौटकी ऐरै थै, तेबी तिउंऐ परमेश्वरा रै बिरोधाई पाप कियौ थौ। सै सारै मौरी गौऐ थै। तैबै परमेश्वरै सै लोग तौइंए वाइदा रै देशा रै बानै झ़ाउं नी गौए। ऐबै मूसा बूढ़ौ हुई गो थौ, एथीलै परमेश्वरै लोगु री अगुवाई कौरणै दी तेसरी मज़त कौरणै लै यहोशू छ़ाँटौ। परमेश्वरै मूसा लै वाइदौ भी कियौ थौ एकी दिनै सेऊ लोगु काऐ एक मूसा ज़िणौ भविष्यद्वक्ता भेज़ा सा।

तैबै परमेश्वरै मूसा लै पर्वता री च़ोटी माथी डेउणा लै बोलौ ताकी सेउ वाइदा रौ देश देखी सौका। मूसै वाइदा रौ देश देखौ पर परमेशवरै तेसलै तिए डेउणा री आज्ञा नाईं देई थी। तैबै मूसा मौरी गौ, इस्राएलिउऐ एक बिऐ दौसा दिना झ़ाउं शोक मौनाऔ। तेथ बासिऐ यहोशू तिउंरौ नौवौ अगुवौ बौणी गौ। यहोशू एक आच्छ़ौ अगुवौ थौ कैलैकि तिणिऐ परमेश्वरा माथी भोरौसौ कियौ और तेसरी बुशै मानी।