15. वाइदा रौ देश

आखरी दी, ऐबै सेऊ बौगत आशी गौ थौ कि इस्राएली लोग वाइदा रै देश, कनाना दी डेआ। तेस देशा दी यरीहो नावां रौ एक इलाकौ थौ। तेस बौच़ाउणा लै च़ारौ तौरफै पाकी दवाली थी। यहोशुए तेस इलाकै दी दुई आदमी भेद नीणा लै भेज़ै। तेस इलाकै दी एक राहाब नावां री गांदै काम कौरणै वाल़ी छ़ेउड़ी रौआ थी। तियांए सै भेदी च़ोरै, और बासिए तियांए सै बौच़ाइयौ इलाकै कु बाइरै गाड़ै। तियांए इणौ ऐथलै कियौ कि सै परमेश्वरा माथी विश्वास कौरा थी। ज़ेज़ै बौगतै लोग यरीहो नाश कौरालै तैबै तिउंए राहाब और तेसरै टौबरा री रौक्षा कौरना रौ वाइदौ कियौ थौ।

इस्राएली लोगु वाइदा रै देशा दी डेउणा लै यरदन नौ जा थी टौपणी। परमेश्वरै यहोशू लै बोलौ क, “याजकु पैहलै डेउणै दियौ।” ज़ेबी याजकुए यरदन नौई दी आपणै कौदम पाऐ धारा रौ बौइणौ कम हुई गौ आ, ज़िणै कौरी कि इस्राएली लोग नौई पारभिलै शुकी ज़ौबीना माथी डेई बौल़ा।

तिउं लोगुऐ यरदन नौ टौपी गोई ता यहोशु कु बोलौ कि यरीहौ माथी लौड़ाई कौरणा लै तैयार रौ, सेऊ बौड़ौ पाकौ इलाकौ थौ। परमेश्वरै तिउं लोगु लै बोलौ कि तिउंरै याजकु और फौज़िउ छ़ौ दिना झ़ाउं तेस इलाकै रै फेदियालै घुमणौ आ। और याजकु और फौज़िउए तीणौ इ कियौ।

तैबै सातवै दिनै,इस्राएलिउऐ तेस इलाकै रै च़ारौ तौरफै घुमै तिउंरै इलाकै रै च़ारौ तौरफै सातवी बारै घुमियौ याजकुए आपणी कौरनाल़ फुकरी और फौज़िउए ज़ोरै-ज़ोरै हाकै-हुँगारै मारै।

तैबै यरीहो री च़ारौ तौरफा री दवाली ढौल़ी गोई! ज़ीणी परमेश्वरै आज्ञा देई थी इस्राएलिउ ए इलाकै री हर च़ीज़ नाश की गोई। तिउंए सिरफ राहब और तिउंरै टौबर छ़ाड़ी गौए, ज़ो इस्राएलिउ रै भाग बौणी गोए थै। ज़ैबै कनाना दी रौइणै वाल़ै सारै लोगुऐ शुणौ कि इस्राएलिउए यरीहो नाश की गो आ, ता सै डौरी गौए आ कि इस्राएली लोग तिउं माथी भी हमलौ कौराई।

परमेश्वरै इस्राएलिउ लै आज्ञा देई कि कनाना दी रौइणै वाल़ै केज़ी भी ज़ाती आइलै मेल-मिलाप नाईं कौरणौ आ। पर गिबोनियों नावां री एक ज़ातीए यहोशू कु झ़ूठ बोलौ कि सै कनाना कु दूर एकी ज़ागा रै रौइणै वाल़ै ई। तिउंए यहोशू आइलै मेल-मिलाप कौरणै री औरज़ की। यहोशू और दुजै इस्राएली अगुएउए परमेश्वरा कु नाईं पूछ़ौ कि तिउं का कौरणौ च़ाईं, बिणपुछ़ी तिउंए गिबोनिउ आइलै मेल-मिलाप कियौ।

चीआ दिना बासिए इस्राएलिउ कै पौतौ लागौ कि गिबोनी लोग कनाना दी इ रौआई। ता तिउंरै रोश आशी गोऐ आ कैलैकि गिबोनिउए तिउंलै धोखौ दियौ थौ। पर तिउंए तिउं आइलै मेल-मिलाप चाणी छ़ाड़ौ कैलैकि मेल-मिलाप परमेश्वरा रै सामनै कियौ थौ। तैबै कुछ़ बौगता बासिए कनाना दी रौइणै वाल़ी एक दुजी ज़ाती, एमोरिउ रै राज़ै शुणौ कि गिबोनिउए इस्राएलिउ आइलै मेल-मिलाप की गो आ, एथीलै तिउंए आपणी-आपणी सेना कौठै कौरियौ एक बौड़ी सेना चाणी और गिबोनिउ माथौ हमलौ कियौ। गिबोनिउए आपणी सहायता लै यहोशू काए खौबर भेज़ी।

और यहोशुऐ इस्राएली सेना कौठै की और गिबिनिउ काऐ पहुंच़णा लै पुरी राचिऐ आंडै। दोउतराची तिउंऐ एमिरिउ री सेना हैरान की गोई और तिउं माथी हमलौ की गौ आ।

सैज़ै दिनै परमेश्वर इस्राएलिउ कालै लौड़ौ। तिउंए एमोरी डौराई गौए और परमेश्वरै बौड़ै-बौड़ै शौरु पाईयौ भौरी का एमोरी झ़ांगी गौए।

परमेश्वरै सूरज भी एकी ज़ागै टेकाल़ी गो आ ताकी इस्राएलिउ कै पूरौ बौगत मिला कि एमोरिउ आच्छ़ा कौरी हौरावा। सेज़ै दिनै, परमेश्वरै इस्राएलिउ लै बौड़ी ज़ीत हासिल की।

ज़ैबै परमेश्वरै तिउंरी सेना हौराइयौ, भौरीका कनानी ज़ाती रै लोग इस्राएली माथी लौड़ाई कौरना लै कौठै हुऐ। यहोशू और इस्राएलीउए हमलौ कियौ तिउंरौ सत्यानाश कियौ।

इउं लौड़ाई बासिऐ, परमेश्वरै इस्राएलिउ रै हर एक गोत्रा लै तिउंरौ हिस्सौ दियौ तैबै परमेश्वरै इस्राएली और तिउंरै सारै बानैउ माथी शान्ती देई।

ज़ेबी यहोशू बुढ़ौ हुऔ ता तिणिए बादै इस्राएली अपु काए औटाऐ। तैबै यहोशूए तिउं लोगु कै याद दिलाऔ कि तिउंए तेस वाइदै माथी आंडणा लै बोलौ ज़ो तिणिए सिनै पर्वता माथी बानौ थौ। तिउं लोगुऐ परमेश्वरा आइलै विश्वासा दी रौइणै और तेसरै कानूना माथी आंडणै रौ वाइदौ कियौ।