16. छुड़ाउणै वाल़ै

यहोशू रै मौरनै बासिऐ इस्राएलिउऐ आज्ञा नाईं मानीं। तिउंए परमेश्वरा रै दैऔ औंदै नियम नाईं मानै, और तिउंऐ तेस वाइदा रै देशा कु बौच़ै औंदै कनानी बाइरै नाईं गाड़ै। इस्राएलिउए आपणै सौच्च़ै परमेश्वर, यहोवा छ़ाडियौ कनानिउ रै देउवा री आराधना शुरु कौरी ऐरी आ। इस्राएलिउ कै कोईयौ भी राज़ौ नाईं थौ, एथीलै ज़ो ज़ासकै ठीक लागौ तिणिऐ सेऊ इ कियौ।

परमेश्वरा री आज्ञा ना मानणै रै ज़ौरिऐ इस्राएलिउऐ एक बुरौ बिच़ार कियौ कि कुछ़ साला झ़ाउं इस्राएली परमेश्वरा री आज्ञा नाईं मानदै, तैबै सेऊ तिउंरै दुशमनु कु हौराउणा रै ज़ौरिऐ डाँड दिया। इयै दुशमन इस्राएलिउ कु तिउंरी च़ीज़ै लुटाई, तिउंरी धन-ज़यदाद नाश कौराई, और तिउं मांझ़िऐ भौरी लोगु झ़ांगाई। तैबै ज़ेबी इस्राएलिउ रै दुशमन तिउं माथी कई बौरशा झ़ाउं ज़ुलम कौराई, तेथ बासिऐ इस्राएली आपणै पाप मानाई और परमेश्वरा कु बौच़णा लै प्राथना कौराई।

सौदा ज़ैबै इस्राएली पाप माना लै ता परमेश्वर तिउं बौच़ाउवा आ। सेऊ छ़ुड़ाउणै वाल़ै रै ज़ौरिऐ इणौ कौरा— एक इणौ आदमी ज़ो तिउंरै दुशमनु आइलै लौड़ा लौ और तिउं हौरावा सा। तैबै देशा दी शान्ती हुआ। और सेउ छ़ुड़ाउणै वाल़ौ तिउं माथी ठीक राज़ कौरा सा। परमेश्वरै तिउं लोगु बौच़ाउणा लै भौरीका छ़ुड़ाउणै वाल़ै भेज़ै। परमेश्वरै नज़दीका री एक दुशमण ज़ाती, मिध्यानिउ कौरिए इस्राएलिउ हौराउणा रै ज़ौरिऐ तौइं इणौ कियौ।

मिध्यानिउऐ साता बौरशा झ़ाउं इस्राएलिउ रौ नाज़ लूटौ। इस्राएली लोग भोरी डौरी गौऐ थै, और सै ओडाच़िउ दी च़ोरुई गौए ताकी मिध्यानी लोग तिउं लोड़ी ना बौल़ा। आखिरकार, तिउंए बौच़णा लै परमेश्वर लोड़ौ।

गिदोन नावां रौ एक इस्राएली आदमी थौ, सेऊ एक गुप्त ज़ागाह दी गीऊँ झ़ाड़दै थौ लागौ औंदौ ताकी मिध्यानी लोग गिउँ च़ोरा नाईं। यहोवा रै दूतै गिदोना काए डेइयौ बोलौ, “ओ बीर सूरमा, परमेश्वर ताउं आइलै आ। डेउ इस्राएलिउ मिध्यानी रै हाथा कु बौच़ाऊ।”

गिदोना रै बाबै एक मूरती कालै एक बेदी थी चाणी औंदी। सौबी कु पैहलै परमेश्वरै गिदोना कै तिआं मूरती चोड़ना लै बोलौ। पर गिदोन लोगु कु डौरा थौ, एथीलै तिणिए राच पौखी। ज़ेबी राच पौड़ी ता तिणिए तिआं बेदी चोड़ियौ टुकड़ै-टुकड़ै किऐ। तिणिए परमेश्वरा कालै एक नौई बेदी चाणी और तिआं बेदी माथी परमेश्वरा लै बौल़ी च़ौड़ाई

दुजी दोउती लोगुए देखौ कि इऐ बेदी चोड़ियौ टुकड़ै-टुकड़ै कौरी औली, ऐथीलै तिउंरै रोश आशै। सै गिदोना झ़ांगणा लै तेसरै घौरा कै आशै, पर गिदोना रै बाबै बोलौ, “तुमै कैलै आपणै देउवा री मज़त कौरणा री कोशीश कौरदै लागै औंदै? अगर सेऊ देऊ आ ता तेस आपणी रौक्षा आपु इ कौरणै दैयौ!” कैलैकि तिणिऐ इणौ बोलौ तैबै तिउंए गिदोन नाईं झ़ांगौ।

तैबै इस्राएलिउ लुटदै मिध्यानी लोग तौइं आशी गौए। सै सारै ऐती भीरी थै कि गौणिया भी नाईं थै। गिदोने तिउं आइलै लौड़ाई कौरणा लै इस्राएली लोग कौठै औटाऐ। गिदौने परमेश्वरा कु दुई निशाण माँगै कि ताकी विश्वास हुआ की परमेश्वर सौच्च़ी इ तेसलै इस्राएली बौच़ाउणा लै आ बोलदै लागौ औंदौ।

पैहलै निशाणा लै, गिदोने भेरी री ऊन ज़ौबिना माथी छ़ाड़ियौ परमेश्वरा लै बोलौ दोतकी ओश सिरफ ऊना माथी पौड़ा और ज़ौबिना माथी ना पौड़ा। परमेश्वरै इणौ इ कियौ। दुजी राचिऐ, परमेश्वरा कु बोलौ ओशा कौरी ज़ौबीन सीनी हुआ पर ऊन शुकी रौआ। परमेश्वरै इणौ इ कियौ। इउं दुई निशाणा रै कारणै, गिदौने विश्वास कियौ कि परमेश्वर सौच्च़ी इ च़ाहा सा कि सेऊ इस्राएलिउ मिध्यानिउ रै हाथा कु बौच़ावा।

तैबै गिदोने फौज़ी आपु काए औटाऐ और एक बिए बारह हौज़ार मौरद आशै। पर परमेश्वरै तेस आइलै बोलौ कि इयै भौरी का सा। और गिदोने सै सब एक बिए दुई हौज़ार वापिस भेज़ी ऐरै। परमेश्वरै गिदोना आइलै बोलौ इयै मौरद तौइं भी भौरीका सा। एथीलै गिदोने चिन शौ फौज़ी आपुकाए छ़ाड़ै बाकी सारै घौरै भेज़ै।

सेज़ी राची परमेश्वरै गिदोना लै बोलौ, “मिध्यानिउ रै डेरे दी डेउ और तिउं बुशै लाइंदी बारै शुण। ज़ैबै तू शुणा लौ कि सै का बोलाई ता तू तिउं माथी हमलै कौरणा लै नाईं डौरै।” एथीलै सेज़ी राची गिदोन तौल़ै तिउंरै डेरै भिलै डिया और तिणिए एक मिध्यानी फौज़ी इणै बोलदै शुणौ कि शुणाउ ज़ो ताइंए सुईणै दी देखौ थौ। ता तिणी मौरदै बोलौ, “ एस सुइणा मतलब आ कि गिदोना री फौउज़ आमारी फौउज़ हौरावा सा!” ज़ैबै गिदोनै इणौ शुणा ता तिणिए परमेश्वरा री स्तूती कौरी।

तैबै गिदोन आपणै फौज़िउ काए वापिस आशौ और तिउं मांझ़िए एकी एकी कै रौणशींग, एक माटै रौ ओखर, और एक ज़ोकटी रौ मौसालौ दियौ। तिउंए सेऊ डेरौ घेरी गो। ज़िऐ मिध्यानी फोज़ी सुतै औंदै थै। गिदोना रै चिन शौ फौज़ी आपणै मौसालै ओखरा कौरी थै दुमै औंदै थै एथीलै मिध्यानी लोग तिउं मौसालै रौ प्याशौ नाईं देखी बौल़ै।

तैबै गिदोना रै सारै फौज़िउए आपणै सारै माटै रै ओखर मौसालै माथै कु चोड़ियौ एकदम प्याशौ देखाल़ी गौ आ। तिउंए आपणै रौणशींग फुकरै और ज़ोरै-ज़ोरै आकै मारी, “यहोवा री और गिदोना री तलवार!”

परमेश्वरै मिध्यानी डौराई गौऐ, एथीलै सै आपु मांझ़ी काटिंदै-पिटिंदै लागै। तेबी इ, गिदोने इस्राएलिउ काए खोबरी देणै वाल़ै भेज़ै कि सै मिध्यनिउ रौ पिछ़ौ कौरा। तिउंए तिउं मांझ़ा रौ भौरीका झ़ांगै बाकी लोगु रौ पिछ़ौ कौरियौ सै देशा कु बाइरै गाड़ी गौऐ। सेज़ै दिनै एक लाख बिश हौज़ार झ़ांगै। इणै कौरी परमेश्वरै इस्राएली लोग बौच़ाऐ

सै लोग गिदोन आपणौ राज़ौ चाणनौ च़हा थै, पर गिदोनै इणौ कौरणै नाईं दियौ, पर तिणिए तिउंकु सै सुनै रै चाण मांगै ज़ो तिउं मांझ़िए हर एकिए लुटै थै। तिउं लोगुए भौरीका सुनौ गिदोना कै दैयौ।

तैबै गिदोने तेस सुनै कौरी एक खास जुड़कै चाणै ज़िणै कि बौड़ै याजक भिड़ा थै। पर लोगुए तेसरी कौरणी शुरु की ज़िणी की सेउ एक मूरती आ। तैबै परमेश्वरै इस्राएल तौइंऐ दोषी चाणै कैलैकि तिउंए मूरती री आराधना की थी। परमेश्वरै तिउंरै दुशमनु कु सै हौराए। आखिरकार तिउंए तौइंए परमेश्वरा कु मज़ता लै प्राथना की, और परमेश्वरै तिउं काए तिउं बौच़ाउणा लै एक ओर छ़ुड़ाउणै वाल़ौ भेज़ौ।

इणी बुशै कई बारै बीती: इस्राएली लोग पाप कौराई, परमेश्वर तिउंलै सौज़ा दिया, सै पाप मानाई, और परमेश्वर तिउं छ़ुड़ाउणा लै कास भेज़ा सा। कई बौरशा झ़ाउं, परमेश्वरै छ़ुड़ाउणै वाल़ै भेज़ै ज़ुणिए इस्राएली तिउंरै दुशमनु कु बौचाऐ।

आखिरकार, तिउं लोगुए ओरी देशा रै ज़िणौ परमेश्वरा कु आपुलै एक राज़ै री मांग की। सै एक इणौ राज़ौ च़हा थै कि ज़ो लांबौ और ताकती वाल़ौ औलौ, ज़ो लौड़ाई दी तिउंरी अगुवाई कौरा लौ। परमेश्वरा कै तिउंरी मांगौ औंदौ ढौबौ नाईं, पर परमेश्वरै तिउंकै तिणौ इ राज़ौ दियौ ज़िणौ तिउंए मांगौ थौ।