17. दाउदा आइलै परमेश्वरा रौ वाइदौ

शाऊल इस्राएला रौ पैहलौ राज़ौ थौ। सेऊ लांबौ और बांठणौ थौ, ज़िणौ लोग च़हा थै सेऊ बिल्कुल तिणौ इ थौ। इस्राएला माथी आपणै राज़ कौरणै कु पैहलै शाऊल एक आच्छ़ौ राज़ौ थौ। पर बासिए सेऊ बुरौ आदमी बौणौ ज़ुणिए परमेश्वरारी बुशै नाईं मानी, एथीलै परमेश्वरै दुजौ आदमी छ़ाँटौ ज़ो कि तेसरै ज़ागा दी राज़ौ बौणा लौ।

परमेशवरै दाऊद नावां रै एक ज़वान इस्राएली आदमी छ़ाँटियौ एकी दिनै शाऊला री ज़ागा दी राज़ै हुणै लै तैयार कौरणौ शुरू कौरी ऐरौ। दाऊद बैतलहम इलाकै रौ एक गवाल़ौ थौ। कई बारै दाऊदै, रीख ब्राग दुईया झ़ाँगै थै। कैलै कि तिउंए दाऊदा रै ज़ौरिए च़ोकीदारी कौरदी बारै तेसरै बाबा री भेरी माथी हमलौ कियौ थौ। दाऊद एक निउंलौ और धौरमी आदमी थौ। तिणिए परमेश्वरा माथी भोरोसौ कियौ और तेसरी बुशै मानी।

दाऊद इबी ज़वान इ आदमी थौ, तिणिए लांबै मोटै आदमी गोलियता आइलै लौड़ाई की। गोलियत एक भौरी आच्छ़ौ फौज़ी थौ। सेऊ भौरी मज़बूत और तकरीबन दस फुट लांबौ थौ! पर परमेश्वरै गोलियत झ़ांगणै और इस्राएली बौच़ाउणै लै दाऊदा री मज़त की। तेथ बासिए दाऊदै इस्राएला रै कई दुशमन हौराऐ। दाऊद एक बौड़ौ फौज़ी बौणियौ, सेऊ भौरी लौड़ाई दी इस्राएलिउ फौज़ी रौ मुख्यौ रौ। लोगुए तेसरी भौरी तारीफ की।

लोगुए दाऊदा कु एती प्यार कियौ कि शाऊल तेसकु मीश कौरदै लागी गौ आ। आखिरकार शाऊल तेस झ़ांगणौ च़ाहा थौ, एथीलै दाऊद तेसकु और तेसरै फौज़ी कु च़ोरिदै ज़ांगला दी भागी गो। एकी दिनै, ज़ेबी शाऊल और फौज़ी तेस लोड़दै थै लागै औंदै ता शाऊल एकी ओडाच़ी दी डियौ। सै सेज़ी ओडाच़ी थी ज़ेथादी दाऊद च़ोरुऔ औंदौ थौ, पर शाऊलै सेऊ नाईं देखौ। दाऊद शाऊला पिछ़ाड़ी-पिछ़ाड़ी भौरी नौज़दीक डेई गौ आ और तेसरै जुड़कै कु टालकौ काटी गौ । बासिए, ज़ेबी शाऊल तियां ओडाच़ी कु निकल़ौ ता दाऊदै तेसलै औटाइयौ तेस पाकड़ै औंदै जुड़कै रौ टालकौ देखाल़ौ, इणै सुंच़ियौ, शाऊलै ज़ाणी गो आ कि दाऊदै राज़ै बौणना री ताइंए तेस झ़ाँगणा लै मौना कौरी गोई

कुछ़ बौगता बासिए, शाऊल लौड़ाई दी मौरी गौ आ, और दाऊद इस्राएला रौ राज़ौ बौणी गो आ। सेउ एक आच्छ़ौई राज़ौ थौ, और लोगुऐ तेस आइलै प्यार छ़ाड़ौ। परमेश्वरै दाऊदा लै आशीष देई और सेऊ कामयाब चाणौ। दाऊदै भौरी लौड़ाई लौड़ी, और परमेश्वरै इस्राएला रै दुशमनु हौराऊणा लै दाऊदा री मज़त की। दाऊदै यरूश्लेम इलाकै ज़ितियौ तिदै आपणी राज़धानी चाणी, ज़िए सेऊ रौ और राज़ कियौ। दाऊदै दुई बिए बौरशा झ़ाउं राज़ौ रौ। तेसरै राज़ा रै बौगतै इस्राएली तागती वाल़ै और सेठ बौणी गौए।

दाऊद एक परमेश्वरा रौ भवन चाणनौ च़हा थौ ज़िए सारै इस्राएली परमेश्वरा री आराधना कौरी बौल़ा और तेसलै बौल़ी भी च़ौड़ाई बौल़ा। तकरीबन च़ार शौ बौरशा ओउलै, सै लोग मूसा रै चाणै औंदै मिलाप वाल़ै ताबूं दी परमेश्वरा री आराधना कौरा थै और तेसलै बौल़ी च़ौड़ावा थै।

पर तिए नातान नावां रौ एक भविष्यद्वक्ता थौ। परमेश्वरै सेउ दाऊदा कै इणौ बोलणा लै भेज़ौ: “ताइंए भौरीका लौड़ाई लौड़ी आ, एथीलै तू मुकालै एस भवन नाईं चाणालौ। तैरौ छ़ोहरु एस चाणा। तैबै भी, हाउं ताउंलै भौरीका आशीष दिआऊ। तैरौ एक वंश सौदा लै मैरै लोगु माथी राज़ै रै रुपा दी राज़ कौरा।” सौदा लै राज़ कौरणै वाल़ौ सेऊ दाऊदा रौ एक वंश मसीह थौ। मसीह परमेश्वरा रौ छ़ाँटौ औंदौ आदमी थौ ज़ो दुनिया रै लोगु तिउं रै पापा कु बौच़ाउवा।

ज़ेबी दाऊदै नाताना रौ संदेश शुणौ ता तिणिए परमेश्वरा रौ धन्यवाद कियौ और तेसरी स्तुति की। परमेश्वर तेसरी प्रतिष्ठा थौ बौड़ाउंदै लागौ औंदौ और तेसलै भौरीका आशीष थौ देंदै लागौ औंदौ। बेशक, दाऊद नाईं ज़ाणा थौ कि परमेश्वर इउं बुशै केबी कौरा सा। एज़ै बौगतै आमै ज़ाणी कि इस्राएली एक लांबै बौगता झ़ाउं, तकरीबन एक हौज़ार बौरषा झ़ाउं मसीह आशणै रौ इन्तज़ार थै कौरदै लागै औन्दै।

दाऊदै कई बौरशा झ़ाउं ईमानदारी आपणै लोगु माथी कौरी राज़ कियौ। तिणिए तौना-मौना कौरी परमेश्वरा री बुशै मानी और परमेश्वरै तेसलै भौरी आशीष देई। हालाँकी, तिणिए ज़िंदगी री आखरी दी परमेअशवरा रै खिलाप बौड़ौ पापा कियौ।

एकी दिनै दाऊदै आपणै मैहला कु बाइरै जाचौ और एक बाँठणी छ़ेउड़ी नाइंदी बारै देखी। सेऊ तियां नाईं ज़ाणा थौ, पर तिणिए पौतौ लाई गो कि तिआंरौ नाउं बैतशेबा थौ।

ज़िए तिणिए आपणी नौदर जा थी टाल़नी, तिणिए तियां छ़ेउड़ी आणना लै एक आदमी भेज़ौ। दाऊद तिआं आइलै सुतौ और सै घौरै वापिस भेज़ी गोई। थोड़ै बौगता बासिए बैतशेबै इणै बोलियौ दाऊदा कै खौबर भेज़ी कि हाऊं तैरै बौच्चै री मां बौणनै वाल़ी ऊ।

बेतशेबा रौ बोउटौ ऊरिय्याह नावां रौ एक आदमी थौ। सेऊ दाऊदा रौ एक बौड़िया फौज़ी मांझ़िया कु एक थौ। सेज़ै बौगतै सेऊ लौड़ाई कौरदै बाइरै थौ डेऔ औंदौ। दाऊदै उरिय्याह लौड़ाई कु वापिस औटाइयौ तेसलै आपणी छ़ेउड़ी आइलै साथाई रौइणा लै बोलौ। पर दुजै फौज़ी लौड़ाई दी थै। एथीलै उरिय्याहै घौरै डेउणा लै इन्कार कौरी गोई। पर दाऊदै उरिय्याह वापिस भेज़ी गौ आ और सेनापति कु लौड़ाई लै सेज़ी ज़ागा दी छ़ाडना लै बोलौ ज़िए दुशमन सौबिकु ताकती वाल़ै थै ताकी तेस पोरु झ़ांगा। ता इणौ हुऔ कि उरिय्याह लौड़ाई दी मौरी गौ।

उरिय्याह मौरणै बासिए दाऊदै बेतशेबा आइलै शादी कौरी गोई, बासिए तिएं दाऊदा रौ छ़ोहरु पैदौ कियौ। तेसकु परमेश्वरा रै भौरी रोश थै आशै औंदै, एथीलै तिणिए नातान भविष्यद्वक्ता दाउदा काए इणौ बोलणा लै भेज़ौ कि तेसरौ पाप केती बुरौ थौ। दाऊदै आपणै पाप मानै और परमेश्वरै सेऊ माफ कियौ। आपणी बाकी ज़िंदगी दी, आपणै काठै बौगता दी भी परमेश्वरा पिछ़ु आंडदै थाकौ लागी और तेसरी बुशै मानी।

पर दाऊदा रौ छ़ोहरु मौरी गौ आ। इणै कौरी परमेश्वरै तेसलै डांड दियौ। एथरै अलावा, दाऊदा रै मौरणै झ़ाउं, तेसरै आपणे टौबरा रै कुछ़ लोगुए तेसरै खिलाफ लौड़ाई की, और दाऊदा री आपणी ताकत खातम हुई गोई थी। पर परमेश्वर विश्वासवाल़ौ थौ और इबी भी तिणिए तिणौ कियौ ज़ो तिणिए दाऊदा आइलै कौएणै रौ वाइदौ थौ दिऔ औंदौ कि सेऊ कौरा, भलै इ तेसरी आज्ञा नाईं मानी थी। और बासिए दाऊद और बेतशेबा री दुजी औलाद पैदी हुई, और तिउंए तेसरौ नाउं सुलैमाण छ़ाड़ौ।