18. राज़्य बांटणौ

दाऊद राज़ै दुई बिए बौरशा झ़ाउं राज़ कियौ। तैबै सेऊ मौरी गो आ, और तेसरै छ़ोहरु सुलैमाने इस्राएला माथी राज़ कौरणौ शुरु कियौ। परमेश्वरै सुलैमाना आइलै बुशै लाई और तेसकु पुछ़ौ कि सौभी कु ज़ादौ तू का च़ाहा सा कि परमेश्वर ताउंलै कौरा। सुलैमानै मांगौ कि सेऊ तेस बुध्दीमान चाणा। एज़ी बुशै परमेश्वर खुश कियौ, एथीलै परमेश्वरै सुलैमान दुनिया रौ सौभी कु बुध्दी वाल़ौ आदमी चाणी गौ आ। सुलैमानै भौरी बुशै शिखी और सेऊ एक बुध्दी वाल़ौ राज़ौ थौ।

यरूशलेमा दी सुलैमानै एक परमेश्वरा रौ भवन चाणौ ज़ेथालै तेसरै बाबै योजना चाणी थी और सामान कौठै भी कियौ थौ। ऐबै लोग मिलाप वाल़ै तांबु री बज़ाय भवना दी आराधना कौरा थै और बौल़ी च़ौड़ावा थै। परमेश्वर आशियौ तिउं मांझ़िए रौआ थौ, और तिए सेउ आपणै लोगु आइलै रौआ थौ।

पर सुलैमानै दुजै देशा री छ़ेउड़ी आइलै प्यार कियौ। तिणिए भौरीका, तकरीबन एक हौज़ार छ़ेउड़ी आइलै शादी कौरियौ परमेश्वरा री आज्ञा चोड़ी! इउं मांझ़िया रौ भौरीका छ़ेउड़ी बिगानै देशा कु आशी और आपु आइलै आपणै देऊ आणै और तिउंरी आराधना कौरदै थाकी लागी। ज़ेबी सुलेमान बुढ़ौ हुऔ ता तिणिए भी तिउंरै देउआ री आराधना की।

एज़ी बज़ाए कु परमेश्वरा रै तेसलै भौरी रोश थै आशै औंदै। तिणिए बोलौ सेऊ इस्राएल देश बाँटणा रै ज़ौरिए तेसलै डाँड दिआ। सेउ सुलैमाना रै मौरणै बासिए इणौ कौरा सा।

सुलैमाना रै मौरणै बासिए, रहबाम राज़ौ बौणौ। इसराएला देशा रै सारै लोग तेस आपणै राज़ै रै रूपा दी मानणा लै कौठै हुए। सै रहबामा आइलै शिखाउऐ कि सुलैमानै तिउंकु भौरी काठौ काम कौरावा थौ और भौरीका मामलौ निंआ थौ। तिउंए रहबामा आइलै औरज़ की कि तिउं कु कामती काम कौरावा।

पर रहबामै तिउंलै भौरी मूर्खता कौरी ज़वाब दियौ, “ तुमै बोलाई कि मैरै बाबै सुलमानै तुमकु काठौ काम कौराऔ आ, पर हाऊ तुमकु तेसकु भी काठौ काम कौरावाउ, और हाउं तुमु तेसकु भी ज़ादौ दुखी कौराऊ।”

ज़ैबै लोगुए सेउ इणौ बोलदै शुणौ ता तिउं मांझ़िया कु कई लोगुऐ तेसरौ साथ छ़ाड़ी गौ आ। दस गोत्रुऐ सेऊ छ़ाड़ी गो आ; तेस आइलै ऐबै दुई इ गोत्र बौच़ै। इउं दुई गोत्रुए आपुलै यहूदा रौ राज़्य बोलौ।

बाकी दस गोत्रुए यारोबाम नावां रै एक आदमी आपणौ राज़ौ चाणी ऐरौ। ऐ गोत्र उत्तर और पुर्वा री भीलै रै हिस्सै दी थै। तिउंए आपुलै इस्राएला रौ राज़ौ बोलौ।

पर यारोबामै परमेश्वरारै बिरोधा ई पाप कियौ और लोगु कु भी पाप कौराऔ। तिणिए आपणै लोगु रै ज़ौरिए आराधना कौरना लै मूरती चौणाई। सै ऐबै यहूदा रै राज़्या दी यरूशलेमा दी परमेश्वरा रै भवना रै भवना दी तेसरी आराधना कौरना ता नाईं डेवै।

यहूदा और इस्राएला रै राज़्य आपु मांझ़िए दुशमन बौणी गौऐ और रोज़ एकी दुजै आइलै पिटिदै लागै।

इस्राएला रै नौए राज़्या दी, सारै इ राज़ै दुष्ट थै इउं मांझ़िया कई राज़ै तिउंरी ज़ागा दी आश छ़ाड़नै वाल़ै ओरी इस्राएलिउ रै ज़ौरिए झ़ांगी गोऐ थै।

इस्राएला रै सारै भौरी राज़ेउए मुरतिऊ री पूज़ा की आ। ज़ेबी तिउंए इणौ कियौ ता से रोज़ गांदी छ़ेउड़ी आइलै सुतै और इदरा झ़ाउं कि लोल़डै भी मुरती काए बौल़ी भी किए।

यहूदा रै राज़्या रै राज़ै, दाऊदा रै वंशारै थै। इउं राज़ेऊ मांझ़िए कई भौलै आदमी थै ज़ुणिए परमेश्वरा रै अनुसार राज़ कियौ और परमेश्वरा री आराधना की। पर यहूदा रै भौरी राज़ै दुष्ट थै। तिउंए बुराई कौरी राज़ कियौ, और मुरतिउ री आराधना की। इदरा झ़ाउं कि कुछ़ राज़ेउए झूठै देउवा काए आपणै लोल़डेउ री बौल़ी की। यहूदा रै भौरी लोगुए भी परमेश्वरा रै बिरोधाई पाप कियौ और दुजै देउवा री पूज़ा की।