19. भविष्यद्वक्ता

परमेश्वर रोज़ इस्राएलिउ काए भविष्यद्वक्ता भेज़दै थाका थौ लागी। भविष्यद्वक्ता परमेश्वरा कु संदेश शुणा थै और लोगु कै बोला थै।

ज़ेबी आहाब इस्राएला रौ राज़ौ थौ ता सेज़ै बौगतै एलिय्याह भविष्यद्वक्ता थौ। अहाब एक बुरौ आदमी थौ। तिणिए झ़ूठै बाल देउवा री पूज़ा कौरणा लै लोग मज़बूर किए थै।। एलिय्याहे आहाबा कु बोलौ कि परमेश्वर तिउं लोगु डाँडणै वाल़ौ थौ। तिणिए बोलौ, “ ज़ेबी झ़ाउं हाउं दुजी बारै पाणी लागणा लै ना बोलु तेबी झ़ाउं इस्राएला रै राज़्या दी पाणी नाईं लागदौ और ना इ ओश पौड़दै।” एज़ी बुशै आहाबा रै एती रोश आशै कि तिणिए एलिय्याह झ़ांगणै रौ फैसलौ कियौ।

एथीलै परमेश्वरै एलिय्याह लै बोलौ कि ज़ांगला दी डेइयौ आहबा कु च़ोरुइ। एलिय्याह ज़ांगला दी तेस सोते काए डियौ ज़िऐ परमेश्वरै बोलौ थौ। रोज़ दोउती और ब्याल़ी, कवागै एलिय्याह लै रोटी और मास आणा थै। एस पुरै बौगतै, आहाब और तेसरी सैना एलिय्या लोड़दै थाकै लागी, पर सै तेस लोड़ी नाईं बौल़ै।

पाणी ना लागणै कु कुछ़ बौगता बासिए पाणी रौ सोतौ शुकी गौ आ। एथीळै एलिय्याह एक नज़दिका रै देशा दी डेई गौ आ। तेस देशा दी एक गरीब बिदुआ थी ज़ासरौ एक छ़ोहरु थौ। तियांकै राशण तकरीबन खातम हुई गौ थौ कैलै कि तिऐ कोई फौसल नाईं हुई थी। पर तैबै भी तियां छ़ेउड़िए तेसरी देखभाल़ की, एथीलै परमेश्वरै तियांरी और तियांरै छ़ोहरु री देखभाल़ की और तिउंरी ज़रुरत पुरी की, एज़ै कारणै तियांरै पिठै रौ ओखर और तेला री कुपी केबी भी खातम नाईं हुई। तेस पूरै काल़ा रै बौगतै तिउंकै नाज़ थौ। एलिय्याह कुछ़ बौरशा झ़ाउं तिए रौ।

साढ़ै चिआ साला बासिए, परमेश्वरै एलियाह कु बोलौ कि हाउं तौइंए पाणी ला ऊ। तिणिए एलिय्याह कु वापिस इस्राएला रै राज़्या दी डेइयौ आहाबा कु बुशै लाइणा लै बोलौ। एथीलै एलिय्याह वापिस डियौ। ज़ैबै आहाबै सेऊ देखौ ता तिणिए बोलौ, “आच्छ़ा तू ई, मुसिबत पैदौ कौरणै वाल़ौ!” एलिय्याहे ज़वाब दियौ, “ मुसिबत पैदौ कौरणै वाल़ौ ता तू ई! ताइंए यहोवा पोरु छ़ाड़ी गो आ। सेऊ सौच्च़ौ परमेश्वर आ, पर तू बाल देउवा री पूज़ा कौरदै लागौ औंदौ। ऐबै ताइंए इस्राएल राज़्या रै सारै लोग कर्मेल पर्वता माथी आशणौ आ।”

और सारै लोग कर्मेल पर्वता माथी डेवै। सै मौरद भौ आशै ज़ो बोला थै कि सै लोग बाल देउवा री बुशै बोला थै। इयै बाल देउवा रै भविष्यद्वक्ता थै। सै सारै च़ार शौ दुई बिए दस थै। एलिय्याहे लोगु आइलै बोलौ, “केबी झ़ाउं तुमै आपणौ मन बौदल़ी छ़ाड़ाई? अगर यहोवा परमेश्वर आ ता तेसरी आराधना कौरौ! अगर बाल परमेश्वर आ ता तेसरी आराधना कौरौ!”

तैबै एलिय्याहे बाल देउवा रै भविष्यद्वक्ता लै बोलौ, “ एक बौल़द बौल़ी कौरियौ तेसरौ मास ज़ाल़ना लै एक बेदी माथी छ़ाड़ौ, पर आग ना लाइयौ। तेथ बासिए हाउं भी तिणौ कौराऊ, और एक अलग बेदी माथी हाउं तेस मास छ़ाड़ाऊ। तैबै अगर परमेश्वर बेदी माथी आग ला लौ ता तुमे ज़ाणा लै कि सेऊ सौच़ौ परमेश्वर आ।” तैबै बाल देउवा रै भविष्यद्वक्तुए एक बौल़ी तैयार की पर आग नाईं लाई।

तैबै बाल देउवा रै भविष्यद्वक्तुए प्राथना की, “ओ बाल देउ आमारी शुण!” पूरै दिना दी तिउंए प्राथना की और आकै मारी और इदरा झ़ाउं आपु दी च़ाकु कौरी काटियौ ज़ाखम पाए, पर बाल देउए ज़वाब नाईं देऔ, तिणिए कोई भी आग नाईं लाई।

बाल देउवा रै भविष्यद्वक्तुए बाल देउवा काऐ प्राथना कौरदै-कौरदै तकरीबन एक दिन बीताई गो आ। तेथ बासिए तिउंए प्राथना कौरनी बंद कौरी गोई। तैबै एलिय्याहे दुजै बौल़दा रौ मास पमेश्वरा री बेदी माथी छ़ाड़ी गौ। तेथ बासिए, तिणिए लोगु कु पाणी रै बौड़ै ओखर तियां बेदी माथी पेरणा लै बोलौ ज़ेबी झ़ाउं कि मास, ज़ुखड़ै, और इदरा झ़ाउं कि बेदी फेदीयालै ज़ौबीन आच्छ़ा कौरी ना रुज़ा।

तैबै एलिय्याहे प्राथना की, “ओ यहोवा, अब्राहम, इसहाक, और आकूबा रै परमेश्वर, आमकै देखाउ कि तुमे इस्राएला रै परमेश्वर ई और इणौ भी कि हाउं ताउं मानणै वाल़ौ उ। मुकै ज़वाब दै ज़िणै कौरी इयै लोग ज़ाणा लै कि तुमै इ सौच्च़ै परमेश्वर ई।”

तेबी फेटी इ सौरगँ कु आग आशी और आगिए मास, ज़ुखड़ै, शाकरौ-माटौ और इदतरा झ़ाउं कि ओरु-पोरु रौ पाणी भी ज़ाल़ी ऐरौ। ज़ैबै लोगुए इणौ देखौ, सै ज़ौबीना माथी धौनी पौड़ी गोऐ और बोलदै लागै, “यहोवा इ परमेश्वर आ! यहोवा इ परमेश्वर आ!”

तैबै एलिय्याहे बोलौ, “बाल देउवा रौ एक भी भविष्यद्वक्ता बौच़ियौ नाईं डेऊणौ च़ाईं!” एथीलै लोगुए बाल देउवा रै भविष्यद्वक्ता पाकड़ी गोऐ और सै तिदरु औलग नीं गोऐ और सै झ़ांगी ऐरै।

तैबै एलिय्याहे अहाब राज़ै लै बोलौ, “शीघ्री आपणै घौरै डेऊ, कैलैकि पाणी लागणै वाल़ौ आ।” शीघ्री इ बादल घौणै हुई गोऐ, और भौरी पाणी लागणौ शुरू हुई गौ आ। यहोवा तेस शुकौ खातम कौरदै थौ लागौ औंदौ। इणै कौरी परगट हुऔ कि यहोवा इ सौच्च़ौ परमेश्वर आ।

ज़ैबै एलिय्याहे आपणौ काम खातम की गौ आ, ता परमेश्वरै एलीशा नावां रै एक मौरद आपणौ भविष्यद्वक्ता छ़ाँटौ। परमेश्वरै एलीशा रै ज़ौरिए भौरी नोखै काम किऐ। एक नोखौ काम नामान आइलै हुऔ। सेऊ एक दुशमना रै फौज़िउ रौ मुखियौ थौ, पर तेसरै ज़िवा दी एक भौरी बुरौ रोग थौ लागौ औंदौ। नामानै एलीशा रै बारै दी शुणौ थौ। एथीलै सेऊ एलीशा काए आशौ और तेसकु तेस रोग ठीक कौरना री औरज़ की। एलीशै नामाना कु बोलौ कि डेइयौ यरदन नौई दी साता बारी डुबकी मार।

नामाना रै रोश आशी गोऐ। तिणिए इणै कौरणा लै मौना कौरी ऐरी, कैलैकि इणौ तेसकै मुरखा वाल़ौ काम लागा थौ। पर बासिए तिणीए आपणौ मौन बौदली गौ आ और डेइयौ यरदन नौई रै पाणी दी साता बारी डुबकी लाई। ज़ैबै सातवी बारै डुबकी लाइयौ पाणी कु बाइरै निकल़ौ ता परमेश्वरै सेऊ च़ांगौ की गौ आ।

परमेश्वरै इस्राएला रै लोगु काऐ ओर भौरीका भविष्यद्वक्ता भेज़ै। तिउं सौभिउए लोगु कु मूरती री पूज़ा कौरना लै मौना की। एथारै बौदल़ै, तिउंलै एकी दुजै आइलै आच्छ़ौ बौरताव और दया कौरणी च़ाईं। तिउं भविष्यद्वक्तुए लोग खौबरदार किए कि तिउं बुरै काम बंद कौरणै ई और ऐथारै बौदल़ै परमेश्वरा री बुशै मानणी आ। अगर तिउं लोगुए इणौ ना कियौ ता परमेश्वर तिउं दोषी चाणियौ तिउंरौ फैसलौ कौरा सा, और डाँड दिया सा।

काफी ज़ादै बौगतै, तिउं लोगुए परमेश्वरा री आज्ञा नाईं मानी। रोज़ तिउंए भविष्यद्वक्तु आइलै बुरौ बर्ताव कियौ और इदरा झ़ाउं कि केबड़ी-केबड़ी सै झ़ाँगै। एकी बारै तिउंए यिर्मयाह भविष्यद्वक्ता शुकै कुऐ दी पाऔ और तिए मौरणै लै छ़ाड़ी गौ आ। सेऊ गारी मांझ़ी कुऐ री पौई झ़ाउं डुबी गौ आ। पर तैबै राज़ै रै तेस माथी दया आशी और तिणिए आपणै फौज़िउ लै हुकम दियौ कि यीर्मयाह मौरनै कु पैहलै कुऐ कु बाइरै गाड़ौ।

भविष्यद्वक्तुए परमेश्वरा री तौरफा कु बोलणौ लगातार छ़ाड़ौ भलै इ लोगुए तिउं आइलै नफरत की। तिउंए लोग खौबरदार किए कि अगरतिउंए पापा री माफी नाईं मांगी ता परमेश्वर तिउं नाश कौरा सा। तिउंए लोगु कु इणी भी आद दिलाई कि परमेश्वरै तिउं काए मसीह भेज़णा रौ वाइदौ कियौ आ।