20. गुलामी और वापिस आशणौ

इस्राएला रै राज़्य और यहूदा रै राज़्य दुइएउऐ परमेश्वरा रै बिरोधाई पाप कियौ। तिउंए सेऊ वाइदौ चोड़ी ऐरौ ज़ो सीनै पर्वता माथी परमेश्वरा आइलै बानौ थौ। परमेश्वरै सै पापा कु माफी मांगणै और आराधना रै बारै दी खौबरदार कौरणा लै आपणै भविष्यद्वक्ता भेज़ै, पर लोगुऐ तिउंरी बुशै मानणा लै मौना कौरी गोई।

और परमेश्वरै तिउंरै दशमनु तिउं नाश कौरणा लै तैयार किए और तिउंलै डाँड देऔ। अश्शूर एक दूजौ देश थौ ज़ो भौरी ताकती वाल़ौ हुई गौ थौ। सै एकी दुजै रै खिलाप पापी भी थै। तिउंए आशियौ इस्राएला रौ राज़्य नाश कौरी गौ। आश्शूरिउए आशियौ इस्राएला रै राज़्या दी भौरी लोग झ़ांगै, और सब कुछ लूटी गौ और देशा रै कई हिस्सै ज़ाल़ी गौऐ।

अश्शूरिउए इस्राइला रै सारै सयाणै, सेठ लोग, और इणै लोग ज़ो कीमती च़ीज़ै चाणी बौल़ा थै, कौठै किऐ और सै आपणै देशालै निंऐ। इस्राएल दी सिर्फ गरीब लोग इ बौच़ै।

तैबै अश्शूरी लोगुऐ सेज़ै देशा दी रौइणा लै बाइलै देशा रै लोग आणै। तिउं बाइलै देशा रै लोगुए तौइंए इलाकै चाणै। ज़ो इस्राएली तिए बौच़ै थै तिउं आइलै तिउंए शादी कौरी। तिउं लोगु रै वंशा लै सामरी लोग बोला थै।

यहूदा रै राज़्या रै लोगुऐ देखौ कि किणौ परमेश्वरै तेस माथी विश्वास ना कौरणै और ना मानणै री बज़ाए इस्राएला रै राज़्य बरबाद किए थै। पर तैबै भी तिउंए कनानिउ रै देउवा री पूज़ा की आ। परमेश्वरै तिउंलै खौबरदार कौरणा लै भविष्यद्वकता भेज़ै, पर तिउंए भी शुणना लै इनकार कियौ।

तकरीबन शौ बौरशा बासिए अश्शूरिउए इस्राएला रौ नाश कौरी ऐरौ। परमेश्वरै बेबीलोना रौ राज़ौ, नबूकदनेस्सर यहूदा रै देशा माथी हामलै कौरणा लै भेज़ौ। बेबीलोन एक तागती वाल़ौ देश थौ। यहूदा रौ राज़ौ नबूकदनेस्सरा रौ नुकुर बौणने और भौरी सारी ज़यदाद दैणा लै राज़ी हुई गौ।

पर कुछ़ साला बासिए, यहूदा रै राज़ै बेबीलोना रै खिलाफ पाप कियौ। और बेबीलोनै वापिस आशियौ यहूदा रै राज़्या माथी हामलौ कियौ। तिउंए यरूशलेम इलाकै माथी कौबज़ौ कियौ, परमेश्वरा रौ भवन नाश कियौ, इलाकै और भवना रौ खौज़ानौ लुटी ऐरौ।

पाप कौरणै रै कारणै यहूदा रौ राज़ौ डाँडणा लै, नबूकदनेस्सरा रै फौज़िउए तेस राज़ै रौ छ़ोहरु तेसी रै सामनै झ़ांगौ और तैबै सेउ शेड़ौ कौरी ऐरौ। तेथ बासिए, तिउंए राज़ौ आपु आइलै नीं ऐरौ ताकी सेऊ बेबीलोना रै ज़ेलखानै दी पोरु मौरा।

नबूकदनेस्सर और तेसरै सिपाइउऐ यहूदा राज़्य रै तकरीबन सारै लोग बेबीलोना लै नीं गोए, सिरफ सौभी कु गरीब लोग पिछ़ाड़ी छ़ाड़ै ताकी सै डोखरै दी नाज़ पैदौ कौरा। ऐज़ै बौगता लै गुलामी रौ बौगत बोलौ एथादी परमेश्वरा रै लोगु वाइदा रै देशा कु निकुल़ना लै मज़बूर की गोऐ थै।

भलै इ परमेश्वरै आपणै लोगु लै गुलामी दी डेउणा रै ज़ौरिए डाँडा रै भागी चाणै, तैबै भी तिउं और तिउं आइलै कियौ औंदौ आपणौ वाइदौ नाइं बिसरौ । परमेश्वर आपणै लोगु री देखभाल़ कौरदै थाकौ लागी और आपणै भविष्यद्वक्ता रै ज़ौरिए तिउं आइलै बुशै लाइंदै थाकौ लागी। तिणिए वाइदौ कियौ कि चिन बिए दस बौरशा बासिए, सै तौइंए वाइदा रै देशा दी डियाई।

तकरीबन चिन बिए दस बौरशा बासिए, फरसा रै राज़ै कुस्रुए बेबीलोन राज़्य हौराऔ, एथीलै बेबीलोना राज़्या री बज़ाए फरसा रै राजै कई देशा माथी राज़ कियौ। इस्राएली लोगु लै यहूदी बोला थै। तिउं मांझ़िए भौरी लोगुए आपणी ज़िंदगी बेबीलोना दी बिताई गोई। सिरफ थोड़ै इ लोग बुढ़ै थै तिउंकै यहूदा देश याद थौ।

फारसी लोग भौरी ताकती वाल़ै थै, पर तिउंए ज़ीतै औंदै लोगु माथी दया की थी। फारसी राज़ा बौणनै रै थोड़ै बौगता बासिए, कुस्रु राज़ै एक हुकम दैयौ कि केज़ौ भी यहूदी ज़ो यहूदा लै डेउणौ च़ाहा सा, सेऊ फारसा कु निकल़ियौ यहूदा लै डेई बौल़ा सा। इदरा झ़ाउं कि तिणिए परमेश्वरा रौ भवन तौइं चाणना लै धन-ज़यदाद भी देई। और गुलामी रै चिन बिए दस बौरशा बासिए, यहूदिउ रौ एक छ़ोटौ झ़ुंड यहूदा दी यरूशलेमा रै इलाकै दी डैऔ।

ज़ैबै सै लोग यरूशलेमा दी पहुंच़ै ता तिउंए भवन और इलाकै री च़ारौ तौरफा री दवाल दुजी बारै चाणी गोई। फारसी लोग औज़ौ भी तिउं माथी राज़ कौरा थै पर एकी बारै तौइंऐ वाइदा रै देशा दी रौइंदै थै लागै औंदै और भवना दी परमेश्वरा री आराधना कौरा थै।