23. यीशु रौ जौनम

यूसुफ नावां रौ एक धौरमी आदमी आइलै मरियमा री मांगणी हुई गोई थी। ज़ैबै तिणिए शुणौ कि मरियम गौरकड़ी आ ता सेऊ ज़ाणा थौ कि तेसरौ छ़ोहरु नाईं आसतौ, पर, सेऊ मरियम बदनाम नाईं कौरणौ च़ाहा थौ, एथीलै तिणिए तियं माथी दया की और च़ुटा-च़ुटी छ़ाड़नै रै बारै दी सुंच़ौ। पर एथकु पेहलै सेऊ इणौ कौरा, एक स्वर्गदूतै तेसरै सुइणा दी आशियौ तेस आइलै बुशै लाई।

तिणी स्वर्गदूतै बोलौ, “ओ यूसुफ, मरियम आपणी छ़ेउड़ी चाणना लै नाईं डौर। तियांरै पेटा दी ज़ो छ़ोहरु आ सेऊ पवित्र आत्मा रै ज़ौरिया आ। सै एक छ़ोहरु पैदौ कौरा सा। तेसरौ नाउं यीशु छ़ाड़ै (ज़ेथारौ मतलब आ, ‘यहोवा बौच़ाउणै वाल़ौ आ’), कैलै कि सेऊ लोगु तिउंरै पापा कु बौच़ावा सा।

और यूसुफै मरियमा आइलै शादी कौरी गोई और सै आपणी छ़ेउड़ी रै रूपा दी घौरै आणी गोई, पर ज़ेबी झ़ाउं तियांरै छ़ोहरु नाईं हुऔ तेबी झ़ाउं सेऊ तियां काए नाईं सुतौ।

ज़ेबी मरियमा रै औल़खिणा रौ बौगत नज़दीक आशौ, ता तिएं और यूसुफै बैतलहमा डेउणा लै एक लांबौ सफर कियौ। तिउं तिदै डेउणौ जा थौ कैलैकि रोमी अधिकारी इस्राएला दी रौइणै वाल़ै सौभी लोगु गौणनै च़ाहा थौ। सै च़ाहा थै कि सौभी लोग तिए डेआ ज़िए तिउंरै बुज़ुर्ग रौआ थै। राज़ा दाऊदा रौ ज़ौनम भी बैललहमा दी हुऔ थौ, और सेउ मरियम और यूसुफ दुइया रौ बुज़ुर्ग थौ।

मरियम और यूसुफ बैतलहमा लै डेवै। पर तिए गुशाल़ी री ज़ागा रै रै अलावा रौइणै लै कोई ज़ागा नाईं थी। सेई ज़ागा थी ज़िए मरियमै आपणौ छ़ोहरु पैदौ कियौ। तिउंएं सेऊ खुरली दी छ़ाड़ौ कैलैकि तिए तेस कालै छ़ाड़नै री ज़ागा नाई थी। और तिउंए तेसरौ नाऊं यीशु छ़ाड़ौ।

सेज़ी राची, नज़दिका रै एकी डोखरै दी कुछ़ गवाल़ै आपणी भेरी री च़ोकसी थै कौरदै लागै औंदै। तेबी ई, एक स्वर्गदूत तिउं काए परगट हुऔ, और सै डौरी गोऐ। तिणी स्वर्गदूतै बोलौ, “नाईं डौरौ, कैलैकि मुकै तुमु कालै एक खुशी री खौबर आ। बैतलहमा दी मसीह, मालीका रौ ज़ौनम हुई गो आ!”

तुमै डेइयौ तेस छ़हरु लोड़ौ, और तुमुकै सेऊ जुड़कै दी मेटाओ औंदौ और एकी खुरली दी मिला सा।” खौरकच़ार सौरग स्वर्गदूता कौरी भौरुइ गौ। सै परमेश्वरा री स्तुति कौरदै थै लागै औंदै। तिउंए बोलौ, “ सारी महिमा सौरगा दी रौइणा वाल़ै परमेश्वरा लै मिला। धौतरी माथै तिउं लोगु लै शांति हुआ ज़ासरी सेऊ फिकर कौरा सा!”

तैबै स्वर्गदूत डेई गौए। सै गवाल़ै भी आपणी भेरी छ़ाड़ियौ माऊं देखदै च़ाली पौड़ै। सै सेज़ी ज़ागा दी पहुंच़ी गोऐ ज़िऐ यीशु थौ और तिउंए सेऊ खुरली दी मेटाऔ औंदौ देखौ, ज़िणौ कि तीणी स्वर्गदूतै बोलौ थौ। सै बौड़ै खुश थै। तैबै सै भेराल़डु वापिस डेई गोऐ ज़िए तिउंरी भेरी थी। तिउंए ज़ो भी शुणौ और देखौ थौ तिउं सौभी लै सै परमेश्वरा री स्तुति थै कौरदै लागै औंदै।

पूर्वा री भीला रै एक दूर देशा दी कुछ़ आदमी थै। ज़ुणिए तारेऊ रै बारै दी थौ शिखौ औंदौ और सै भौरी बुध्दी वाल़ै थै। तिउंए एक बौड़ौ तारौ सौरगा दी देखौ। तिउंए बोलौ रथारौ मतलब आ कि यहूदीउ रै एक नौऐ राज़ै रौ ज़ौनम हुऔ आ। एथीलै तिउंए तेस छ़ोहरु देखणा लै आपणै देशा कु एक लांबौ सौफर कौरणै रौ फैसलौ कियौ। लांबै सौफरा बासिए, सै बैतलहमा दी आशै और सेऊ घौर देखौ ज़िऐ यीशु और तेरै तेसरै मा-बाप थै रौऐ औंदै।

तिउं मौरदुए यीशु आपणी मा आइलै देखौ ता तिउंऐ तेस काऐ झुकियौ तेसरी आराधना की। तिउंए यीशु लै किमती भेटा देई। तैबै सै तिदरु आपणै घौरै वापिस डेई गौऐ।