24. यूहन्ना यीशु लै बपतिस्मौ दिआ सा

एलीशिबा और जकर्याह रौ छ़ोहरु युहन्ना, बौड़ौ हुइयौ एक भविष्यद्वक्ता बौणी गौ आ। सेऊ ज़ांगला दी रौआ थौ और ज़ांगली मौ और थाड़ै खा थौ, और ऊँटा रै बाल़ा रै बौणै औंदै जुड़कै भीड़ा थौ।

भौरीका लोग यूहन्ना री बुशै शुणदै ज़ांगला लै निकल़ै। तिणिए इणौ बोलियौ तिउंलै परचार कियौ, “आपणै पापा री माफी मांगौ, कैलैकि सौरगा रौ राज़ नज़दीक आ!”

ज़ैबै लोगुए यूहन्ना री खुशखौबरी शुणी, ता तिउं मांझ़ा कु भौरिउए आपणै पाप कु माफी मांगी, यूहन्ना कु बपतिस्मौ निंऔ। यूहन्ना देखदै भौरीका धौरमा रै गुरू भी आशै, पर तिउंए आपणै पापा कु माफी नाईं मांगी और ना मानै।

यूहन्नै धौरमा रै गुरू लै बोलौ, “ओ बिषलै सापा ज़िणै लोगुओ! आपणै पापा री माफी मांगौ और आपणौ च़ाल-च़लण बौदल़ौ। परमेश्वर सारै पेड़ काटा ज़ो आच्छ़ै फौल़ नाईं आणदौ, और तिउं आगी दी पा सा।” ज़ो भविष्यद्वक्तुए बोलौ थौ यूहन्नै पूरौ कियौ, देख हाउं शीघ्री ताउं काए खौबरी देणै वाल़ौ भेज़ाऊ ज़ो ताऊं कालै बाट तैयार कौरा सा।”

कुछ़ धौरमा रै गुरुऐ यूहन्ना कु पुछ़ौ का तू मसीहा ई? यूहन्नै ज़वाब दैयौ, “हाउं मसीह नाईं उ, पर सेऊ एती बौड़ौ आ कि हाउं तेसरै बूटा रै तौसमै खोलणै रै लायक भी नाईं आसतौ।”

आगलै दिनै, यीशु बपतिस्मा निंदै युहन्ना काए आशौ। ज़ेबी यूहन्नै सेऊ देखौ, ता तिणिए बोलौ, “देखौ! एऊ परमेश्वरा रौ गाबड़ु ज़ो दुनिया रै पाप उठाइयौ निंया सा।”

यूहन्नै यीशु लै बोलौ, “हाउं ताउंलै बपतिस्मा दैणै रै लायक नाईं आसतौ। एथकु आच्छ़ौ इणौ आ कि तू मुलै बपतिस्मौ दै।” पर यीशुए बोलौ, “ताइंए मुलै बपतिस्मौ देणौ च़ाईं, कैलैकि इणौ ठीक आ।” और यूहन्नै तेसलै बपतिस्मौ देऔ, ज़ैबै कि यीशुए कोई भी पाप नाईं कियौ थौ

बपतिस्मा देणै बासिऐ ज़ेबी यीशु पाणी मांझ़ा कु बाइरै आशौ, ता सौरग खुली गौ और परमेश्वरा रौ आत्मा कबुतरा रै रूपा दी तौल़ै आशियौ तेस माथी बोशौ। तेबी ई, परमेश्वरै सौरगा कु बुशै लाई। और बोलौ, तू मैरौ छ़ोहरु ई। हाउं ताउं आइलै प्यार कौराऊ, और हाउं ताउंकु भौरी खुश उ।”

इऐ बूश पैहलै परमेश्वरै यूहन्ना कु बोली थी, “कि पवित्र आत्मा तौल़ै आशियौ कास माथी बोशा ज़ासलै तू बपतिस्मौ देआई।” सेऊ इ परमेश्वरा रौ छ़ोहरु आ परमेश्वर एक इ आ। पर ज़ेबी यूहन्नै यीशु लै बपतिस्मौ देऔ, ता तिणिए परमेश्वर बाब बुशै लाइंदै शुणौ, छ़ोहरु परमेश्वर देखौ, ज़ो कि यीशु आ, और तिणीए पवित्र आत्मा देखी।