25. शैतान यीशु पौरखा सा

यीशु रै बपतिस्मा हुणै बासिऐ फेटी इ, पवित्र आत्मै सेऊ सुनसान ज़ागाह दी नीं गौ। यीशु तिऐ दुई बिऐ दिना झ़ाउं थौ। सेज़ै बौगतै तिणिऐ ब्रौत किए, और शैतानै यीशु काए आशियौ तेसकु पाप कौराउणा लै सेऊ पौरखौ।

पैहलै, शैतानै यीशु लै बोलौ, “अगर तू परमैश्वरा रौ छ़ोहरू ई ता इऊं पात्थरु रोटी चाण ताकी तू खाई बौल़ा!”

पर यीशुऐ शैताना लै बोलौ, “परमेश्वरा रै वचना दी आ लिखौ औंदौ कि, “ज़िउंदै रौइणा लै आदमी लै सिरफ रोटी री ज़रुरत नाईं आ, पर तिउंलै हर तिउं बुशु री ज़रुरत आ ज़ो परमेश्वर तिउं आइलै बोला सा!’”

तैबै शैतानै यीशु भवना रै सौबी कु उंच़ै छ़ाप्परा माथी नीं गौ आ। तिणिऐ तेसलै बोलौ, तू इदरा कु तौल़ै फाल़ दै, कैलैकि परमेश्वरा रै वचना दी आ लिखौ औंदौ, ‘परमेश्वर ताउं बौच़ाउणा लै आपनै स्वर्गदूत भेज़ा सा ताकी तैरै बाँगणै दी च़ोट ना लागा।’”

पर यीशुऐ तीणौ नाईं कियौ ज़ो शैतानै तेस आइलै बोलौ थौ। तेथारै बौदल़ै, तिणिऐ बोलौ, “परमेश्वर सौभी लै बोला सा, ‘कि तू आपणौ परमेश्वर पौरखै नाईं।’”

तैबै शैतानै तेसकै दुनिया रै सारै राज़्य देखाल़ै। तिणिऐ तेसकै देखाल़ै कि सै केती ताकती वाल़ै थै, और सै केती आच़्छै थै। तिणिऐ यीशु लै बोलौ, “हाउं ताउंलै एस सारौ कुछ़ देआऊ अगर तू झुकियौ मेरी आराधना कौरालौ।”

यीशुऐ ज़वाब देऔ, “ओ शैतान मुकाए कु दूर डेऊ! परमेश्वरा रौ वचन लोगु लै इणौ हुकम देआ सा, ‘सिरफ आपणै प्रभु परमेश्वरा री आराधना कौरौ। परमेश्वरा रै रूपा दी सिरफ तेसी री ईज्ज़त कौरौ।’”

यीशुऐ शैताना रै पौरखणै माथी हार नाईं मानी, एथीलै शैतान तेस काए कु पोरु भागी गौ आ। तैबै स्वर्गदूत तेस काए आशियौ तेसरी सेवा-पाणी कौरदै लागै।