26. यीशु आपणी सेवा शुरु कौरा सा

शैताना री परिक्षा रौ इनकार कौरने बासीऐ, यीशु वापिस गलीला रै इलाकै दी आशौ। इऐ सै ज़ागाह सा ज़िऐ सेऊ रौआ थौ। पवित्र आत्मा तेसलै भौरी शक्ति दैन्दै थौ लागौ औन्दौ, और यीशु एकी ज़ागाह कु दूजी ज़ागाह दी डैऔ और लोगु ले शिक्षा देई। सारेऊऐ तेसरै बारै दी आच्छी बुशै बोली।

यीशु नासरत इलाकै दी डैऔ। ऐऊ सेऊ गांऊ थौ ज़िऐ सेऊ पौल़ौ-बौल़ौ थौ। आरामा रै दीनै, सेऊ आराधना कौरना री ज़ागाह दी डैऔ। एकी अगुऐ तेसकै यशायाह भविष्यद्वक्ता रै संदेशा री एक कीताब देई। सै च़ाह थै की सेऊ तेथकु पौड़ा। एथीलै यीशुऐ तिंऐ कीताब खोलिऔ तेसरौ एक भाग लोगु लै पौड़ौ।

यीशुऐ पौड़ौ, “परमेश्वरै मुक्कै एक आत्मा दैऔ आ ताकी हाऊं गरीबु लै खुश-खबरी रौ परचार कौरी सौकू। तिणीऐ हाऊं एथीलै भेज़ौ ऊ कि कैदिऊ आज़ाद कौरु, शेड़ेऊ लै तौइंऐ प्याशौ देऊ, और तिउंलै छ़ुटकारौ देऊ जास दूजै लोग दबाउंदै ई लागै औन्दै। एऊ एज़ौ बौगत आ ज़ेबी परमेश्वर आमु माथै दयालु हौआ लौ और आमारी मौज़द कौरालौ।”

तैबै यीशु बोशी गौ। सारे लोग तेस भौरी ध्याना कौरी देखदै थै लागै औन्दै। सै ज़ाणा थै कि पवित्रशास्त्रा रौ ज़ो भाग तिणीऐ ईबी पौड़ौ थौ सेऊ मसीह रै बारै दी थौ। यीशुऐ बोलौ, “ज़ो बूश मुइंऐ ईबी तुमुलै पौड़ी आ, सै एज़ै बौगतै पुरी औन्दै लागी ऐन्दी।” सारै लोग हैरान हुऐ। सै आपु मांझ़िऐ बोलदै लागै, “का एऊ यूसुफा रौ छ़ोहरू नाईं आसतौ?”

तैबै यीशुऐ बोलौ, “एऊ सौच़ आ कि लोग केज़ै इणै भविष्यद्वक्ता केबी नाईं अपणाउंदै ज़ो तिउंरै इलाकै दी पौल़ौ-बौड़ौ औलौ। एलिय्याह भविष्यद्वक्ता रै बौगता दी, इस्राएला दी भौरी का विधवाऐ थी। पर ज़ेबी साढ़ै चीन साला झ़ाऊं पाणी नाईं लागौ ता परमेश्वरै एलिय्याह लै इस्राएला दी केज़ी विधवा री मौज़द कौरना लै नाईं भेज़ौ। एथरै बज़ाऐ, तिणीऐ एलिय्याह केज़ै ओर देशा री विधवा काऐ भेज़ौ।”

यीशुऐ बोलदै थाकौ लागी, “और एलिय्याह भविष्यद्वक्ता रै बौकता दी, इस्राएला दी भौरी का लोग च़ांबड़ी री बिमारी कु दु:खी थै। पर एलीशै तिऊं मांझ़ा कु केज़ै भी च़ांगै नाईं किऐ। तिणीऐ सिर्फ इस्राएला रै दुश्मणु रौ सिपाई नामान चांगौ कियौ।” पर ज़ो लोग यीशु शुणदै थै लागै औन्दै सै यहूदी थै। एथीलै ज़ेबी तिउंऐ सेऊ इणौ बौलदै शुणौ ता सै तेसलै रोशुऐ।

नासरता रै लोगुऐ यीशु पाकड़ी ऐरौ और सेऊ आराधना री ज़ागाह कु झिड़िऔ बाइरै नीं गौ। तिउंऐ सेऊ तौल़ै शोटीयौ झ़ांगणा लै एकी डोकै माथै निंयौ। पर यीशु भीड़ा कु निकल़ी गौ और नासरत इलाकै छ़ाड़िऔ डेइ गौ।

तैबै यीशु सारै गलीला रै इलाकै दी डैऔ, और लोगु री बौड़ी भीड़ तेस काऐ आशी। तिउंऐ इणै भौरी का लोग आणै ज़ो बिमार और अपंग थै। तिऊं मांझ़ा कु केज़ै शेड़ै, केज़ै लौंगड़ै, केज़ै टौणै और केज़ै लाटै थै, और यीशुऐ सै सारै चांगै किऐ।

एथरै अलावा, भौरी का इणै लोग यीशु काऐ आणै ज़ासदी बुरी आत्माएँ थीं। यीशुऐ बुरी आत्मा लै तिऊं मांझ़ा कु निकुल़ने रौ हुकुम दैऔ। सै दुष्टात्माएँ बार-बार च़िल्लाई, “तु परमेश्वरा रौ छ़ोहरु ई!” भीड़ा रै लोग हैरान थै, और तिऊंऐ परमेश्वरा री बौड़ाई कौरी।

तैबै यीशुऐ बाराह मौरद छ़ांटै ज़ासलै तिणीऐ आपणै खास च़ेलै बोलौ। तिऊं च़ेलेउऐ तेस आईलै सफर कियौ और तेसरी शिक्षा अपणाई।