27. दयालु सामरी री कहाऩी

एकी दिनै, यहूदी धार्मिक गुरु यीशु काऐ आशौ। सेऊ सारेऊ के इणौ दैखाल़नौ च़ाह थौ कि यीशु गलत रीति कौरी शिक्षा दैन्दै आ लागौ औन्दौ। एथीलै तिणीऐ यीशु लै बोलौ, “ओ गुरु, सौदा री ज़िन्दगी पाइणा लै हाऊं का कौरु?” यीशुऐ ज़वाब दैऔ, “परमेश्वरा रै वचना दी का सा लिखौ औन्दौ?”

तिणी आदमीऐ बोलौ, “इणौ बोला सा कि, तू आपणै सारै ज़िवा कौरी, प्राणा कौरी, सामर्थ और बुध्दि कौरी परमेश्वरा कु प्यार कौर। और आपणै पड़ोसी कु आपु ज़िणौ प्यार कौर।” यीशुऐ ज़वाब दैऔ, “तु एकदम ठिक बोलाई! अगर तु ईणौ कौरा लौ, ता ताऊं लै सौदा री ज़िन्दगी मिला सा।

पर सेऊ यहूदी धार्मिक गुरु लोगु कै देखाल़नौ च़ाह थौ कि तेसरी ज़िन्दगी ज़िउणै रौ तरीकौ ठीक थौ। एथीलै तिणीऐ यीशु कु पुछ़ौ, “ठीक आ, ता मैरौ पड़ौसी कूण आ?”

यीशुऐ तेस यहूदी धार्मिक गुरु लै एक काहणी बोलिऔ ज़वाब दैऔ। “एक यहूदी आदमी थौ ज़ो बाटा दी यरूशलेमा कु यरीहो लै थौ लागौ औन्दौ डेउंदै।”

“पर कुछ़ डाकुऐ सेऊ देखौ और तेस माथै हौमलौ कियौ। तिउंऐ तेसरौ सारौ कुछ़ नीं गौ और सेऊ पीटियौ औदमौरौ कियौ, और आपु तिदरु डेई गौऐ।

कुछ़ बौगता बासिऐ, एक यहुदी याजक सेज़ी बाटा दी आशौ तिणी याजकै सेऊ औदमौरौ आदमी बाटा दी पौड़ौ औन्दौ देखौ। पर सेऊ देखियौ बाटा रै दुजै धुरै बाटिऐ औगाऊं बौड़ी गौ। तिणीऐ सेऊ आदमी अनदेखौ कियौ।”

“तेथ बासिऐ कुछ़ बौगत बीतियौ, एक लेवी सेज़ी बाटा दी आशौ। पर सेऊ लेवी भी बाटा रै दुजै धुरै बाटिऐ निकल़ी गौ। तीणिऐ भी सेऊ आदमी अनदेखौ कियौ।”

“तेथ बासिऐ तिऐं बाटा दी एक आदमी आशौ ज़ो सामरिया रौ थौ। (सामरी और यहूदी एकी दूजा कू नौफरत कौरा थै।) तिणी सामरी आदमीऐ बाटा दी सेऊ औदमौरौ आदमी देखौ। तिणीऐ देखौ कि सेऊ यहूदी थौ, पर तैबै भी तिणीऐ तेस माथै बौड़ी दया कौरी। एथीलै सेऊ तेस काऐ डैऔ और तेसरै ज़खमा दी पाट्टी बानी।”

“तैबै तिणी सामरिऐ सेऊ आदमी आपणै गादै माथै पाइयौ आपु आइलै एकी रौइणै री ज़ागाह दी निंयौ, और तिऐ तिणीऐ तेसरी देखबाल़ कौरी।”

आगल़ै दिनै, तेस सामरी आदमी रै आपणै सफरा दी डेउणै री ज़रूरत थी। तिणीऐ तेस घौरा री देखभाल कौरनै वाल़ै आदमी कै कुछ़ पैसै दै। और तेसलै बोलौ, “ऐस आदमी री देखभाल़ कौरै। अगर इऊं पैसै रै अलावा तैरै कुछ़ ओर पैसै खौरच हुआ लै ता वापिस आशिऔ हाऊं तैरै तिऊं खौरच़ै औन्दै पैसेऊ रौ भुगतान पोरु कौराऊ।”

तैबै यीशुऐ तेस यहुदी धार्मिक अगुऐ कु पूछ़ौ, “तू का सुंचा ई? ईऊं चीन लोगू मांझ़ा कु तेस लुटै और पिटै औन्दै आदमी रौ पड़ोसी कुण आ?” तिणीऐ ज़वाब दैऔ, “सेऊ ज़ो तेस माथै दयालु थौ।” यीशुऐ तेसलै बोलौ, “तु डेऊ और ईणी ई कौर।”