28. सेठ ज़वान आफसर

एकी दिनै, एकी ज़वान आफसरै यीशु काऐ नौज़दीक आशिऔ तेसकु पूछ़ौ, “ओ सारेउकु आच्छ़ौ गुरु, सौदा री ज़िन्दगी पाइणा लै मुइंऐ का कौरनौ च़ाईं?” यीशुऐ तेसलै बोलौ, “तू मु्लै सारेउकु आच्छ़ौ कैलै बोलाई? सिरफ एक ही सारेउकु आच्छ़ौ परमेश्वर आ। पर अगर तू सौदा री ज़िन्दगी पाइणौ च़ाह ई ता परमेश्वरा रै हुकम मान।”

तिणिऐ पूछ़ौ, मु्इंऐ केज़ै-केज़ै हुकम जा ई मानणै?” यीशुऐ ज़वाब दैऔ, खून न कौरणौ। गान्दै काम ना कौरणै। च़ोरी ना कौरणी। झ़ुठ ना बोलणौ। आपणै मां और बाबा री इज़्ज़त कौरणी, और आपणै पड़ोसी आइलै आपु ज़िणौ प्यार कौरणौ।”

पर तिणी ज़वान मौरदै बोलौ, “हाऊं आपणै बचपना कू ईऊं सारै हुकूम मानदै लागौ औन्दौ। मु्इंऐ सौदा लै ज़िउंदौ रौइणा लै औज़ौ भी का कौरणै री ज़रुरत आ?” यीशुऐ तेस माथै नौज़र लाई और तेस आइलै प्यार किऔ।

यीशुऐ ज़वाब दैऔ, “अगर तु बिणा दोषा रौ हुणौ च़ाह ई ता डेइऔ आपणौ सारौ कुछ़ पोरु बेच़ और धन गरीबु दी बाँट, और ताऊंलै सौरगा दी धन मिला। तैबै आशै मुंअ पिछ़ु।

ज़ो यीशुऐ बोलौ ज़ेबी तिणी ज़वान मौरदै शुणौ ता सेऊ भौरी निराश हुई गौ, कैलैकि सेऊ भौरी सेठ थौ और सेऊ आपणौ सारौ धन-ज़यदाद नाईं देणौ च़ाह थौ। सेऊ मुड़ियौ यीशु काऐ कु डेई गौ।

तैबै यीशुऐ आपणै च़ेलेऊ लै बोलौ, “परमेश्वरा रै राज़ा दी सेठ लोगु रौ आशणौ भौरी मुश्किल आ! एक सेठ आदमी रौ परमेश्वरा रै राज़्य दी आशणै कु आसान आ ऊँटा रै सिउणी रै शेड़ै बाटिऐ कु डेउणौ।”

ज़ो यीशुऐ बोलौ ज़ेबी च़ेलेउऐ शुणौ ता सै हैरान थै। तिउंऐ बोलौ, “अगर एऊ ईणौ आ ता परमेश्वर कास बौच़ावा?”

यीशुऐ च़ेलेऊ भिलै नौदर लाइऔ बोलौ, “लोगु लै आपणौ छ़ुटकारौ कौरणौ मुश्किल आ। पर परमेश्वरा लै कुछ़ भी कौरणौ मुश्किल नाईं आ।”

पतरसै यीशु लै बोलौ, “आमै च़ेलै आपणौ सारौ कुछ़ छ़ाड़ियौ ताऊं पिछ़ु हुई गौऐ आ: ता आमुरौ ईनाम का हुआ लौ?”

यीशुऐ ज़वाब दैऔ, “हर एक ज़ौणौ ज़ुणिऐ मैरै कारण घौर, भाई-बौइण, मां-बाब, लोल़डै या धन-ज़यदाद छ़ाड़ौ आ, सेऊ तेसकै शौ गुणा ज़ादौ मिला और सेऊ सौदा री ज़िन्दगी भी पा लौ। पर भौरी का ज़ुण पैहलै ई सै पिछ़ाऊं हुआ ई, और भौरी का ज़ुण पिछ़ाड़िऐ ई सै औगाड़िऐ हुणे ई।