29. नीघीणै नुकरा री कहाणी

एकी दिनै, पतरसै यीशु कु पुछ़ौ, “ओ मालिक, ज़ेबी मैरौ भाई मैरै खिलाफ पाप कौरा आ ता, मुंइऐ सेऊ केती बारै माफ कौरणौ चाईं? का साता बारै?” यीशुऐ बोलौ, “सात बारै नाईं पर साता रै सत्तर गुणा बारै!” इणै बौलणै रौ यीशु रौ मतलब आ कि आमुऐ सौदा माफ ही कौरणौ चाईं। तैबै यीशुऐ इऐ कहाणी बोली।

यीशुऐ बोलौ, परमेश्वरा रौ राज़ एकी राज़ै ज़िणौ आ ज़ुंणिऐ कु हिसाब-किताब निणौ च़ाऔ ज़ेबी सेऊ हिसाब-किताब निंदै लागौ, ता तेसरौ एक नुकुर दुई लाख दिना री मज़दूरी रौ एक बौड़ै कौर्ज़े रौ कौरज़दार थौ।

पर सेऊ नुकुर आपणौ कौरज़ौ नाईं देई बौल़ौ, एथीलै राज़ै बोलौ, एसरौ कौरज़ौ दैणा लै एस और एसरौ टौबर नुकुरु रै रूपा दी बेच़ौ।

“तिणी नुकरै राज़ै काऐ धौनी झुकियौ बोलौ, छ़ौंअटी मुं आइलै शांती छ़ाड़, और हाऊं आपणै कौरज़ा री पूरी रौकमा रौ भुगतान कौराऊ। राज़ै नुकुरा माथी दया की, एथीलै तिणीऐ तेसरौ सारौ कौरज़ौ माफ कियौ और सेऊ डेउणै दैऔ।”

“पर ज़ेबी सेऊ नुकुर राज़ा काऐ कु बाइरै डेऔ, ता तेसकै तेसरौ एक गोश्टण नुकुर मिलौ ज़ो तेसरौ च़ार महीनै री मज़दूरी रौ कौरज़दार थौ। तिणी नुकरै आपणौ गोश्टण नुकुर पाकड़ौ और बोलौ, ‘ज़ो ताऊं माथी मैरौ कौरज़ौ आ मु्कै तेसरौ भुगतान कर!”

“तिणी गोश्टण नुकुरै धौनी झुकियौ बोलौ, ‘छ़ौंअटी मुं आइलै शांती छ़ाड़, और हाऊं आपणै कौरज़ा री पूरी रौकमा रौ भुगतान कौराऊ।’ पर एथरै बज़ाऐ, तिणी नुकुरै आपणै गोश्टण नुकुर ज़ेल़ा इ टाली एरौ ज़ेबी झ़ाऊं कि सेऊ तेस कौरज़ा रौ भुगतान ना कौरा।”

ज़ो कुछ़ हुऔ थौ सेऊ कुछ़ ओरी नुकुरेउऐ देखौ और से भौरी परेशान हुऐ। सै राज़ै काऐ डैऐ और तेसकै सारौ कुछ़ बोलौ।”

“राज़ै सेऊ नुकुर औटाऔ और तेसलै बोलौ, ‘ओ पापी नुकुर! मुंइऐ तैरौ कौरज़ौ एथीलै माफ कियौ थौ कैलैकि तांइऐ मुंकु औरज़ कौरी थी। तांइऐ भी तिणी ही कौरणौ चाईं थौ।’ राज़ौ एती रोषा इ थौ कि तिणिऐ सेऊ नुकुर ज़ेला दी टाली ऐरौ ज़ेबी झ़ाऊं कि सेऊ आपणै सारै कौरज़ा रौ भुगतान न कौर।”

तैबै यीशुऐ बोलौ, “मैरौ सौरगा दी विराज़मान बाब तुमु मांझिऊ कु हर एकी आइलै इणी कौरा अगर तुमै आपणौ भाई आपणै ज़िवा कु माफ नाईं कौरालै।”