30. यीशु पांज़ हज़ार लोगु लै रोटी खिलावा सा

यीशुऐ आपणै खास च़ेलै परचार कौरना लै और लोगु लै शिक्षा देणा लै भौरी का अलग-अलग गाँवा दी भेज़ै। ज़ेबी सै वापिस आशै ता तिऊंऐ यीशु लै बोलौ कि तिऊंऐ का किऔ थौ। तैबै यीशुऐ सै झ़िला री दूजी भिलै एक शान्त ज़ागाह दी डेइऔ कुछ़ बौगता इ आराम कौरणा लै औटाऐ। एथीलै सै एकी किश्ती दी च़ौड़ै और झ़िला रै दूजी भिलै दी डेई गौऐ।

पर तिऐ भौरी ईणै लोग थै ज़ुणिऐ यीशु और च़ेलै किश्ती दी डेउंदै देखै थै। इऐ लोग तिउंकु औगाड़िऐ झ़िला री दूज़ी भिलै डेउणा लै झ़िला री कुनियारै-कुनियारै दी भागै। एथीलै ज़ेबी यीशु और च़ेलै पौंउचै ता लोगु री एक बौड़ी भीड़ तिऊं ज़ागदै पैहला कु तिऐ पौउंच़ी गोऐ।

तिऐं भिड़ा दी छ़ेउड़ी और लोल़डै री गिणती छ़ाड़ियौ पांज़ हज़ार मौरद थै। यीशुऐ तिऊं लोगु माथै बौड़ौ तरस खाऔ। यीशु लै सै लोग बिणा भेराल़डु री भेरी ज़िणै थै। एथीलै तिणीऐ तिउंलै शिक्षा देई और तिऊं माझ़ै ज़ो लोग बीमार थै सै च़ागै किऐ।

ब्याल़ हुणै रै बौगतै, च़ेलेउऐ यीशु लै बोलौ, “आबै बेर हुई गौई आ और नौज़दिका दी केज़ौ इलाकौ नाईं आ। ईऊं लोगु डेउणै दै ताकि सै डेइयौ खाणा लै कुछ़ नीं बौल़ा।

पर यीशुऐ च़ेलेऊ लै बोलौ, “तुमै तिउंलै कुछ़ खाणै लै दैऔ!” तिउंऐ ज़वाब दैऔ, “आमै ईणौ किणै कौरी सौकी आ? आमुकै सिरफ पांज़ रोटी और दूई छ़ोटी माच्छ़ी ई।”

यीशुऐ आपणै च़ेलेऊ लै बोलौ कि सै भिड़ा रै लोगु घासा माथै पचास-पचासा री पांगती दी बोशणा लै बोलौ।

तैबै यीशुऐ पांज़ रोटी और दूई माच्छ़ी निंइयौ सौरगा भिलै देखौ, और तींऐ रोटी लै परमेश्वरा रौ धन्याबाद दैऔ।

तैबै यीशुऐ रोटी और माच्छ़ी टुकड़ै दी चोड़ै। तिणीऐ लोगु लै देणा लै आपणै च़ेलेऊ कै सै टुकड़ै दै। च़ेले तिंऐ रोटी बांटदै लागै, और सै केबी खातम नाईं हुई! सै सारै लोग खाइयौ भरपूर हुई गौऐ।

तेथ बासिऐ, च़ेलेउऐ सै बौच़ी औन्दी रोटी कौठै कौरी ज़ो खाउई नाईं थी तेथ कौरी बाराह छ़ाबड़ै भौरुऐ! सै सारी रोटी तिऊं पांज़ ऱोटी और दुई माच्छ़ी कु आशी थी।