31. यीशु पाणी माथै हाण्डा सा

पांज़ हज़ार लोगु लै रोटी खिलाउणै बासिऐ, यीशुऐ आपणै च़ेलेऊ लै किश्ती दी डेउणा लै बोलौ। तिणीऐ तिउंलै झ़िला री दुजी आंगै डेउणा लै बोलौ ज़ैबैकि सेऊ थोड़े बौगता लै तिदै रुकी गौ। एथीलै च़ेले डेई गौऐ और यीशुऐ सै भीड़ ज़ो तिऐ थी विदा कौरी कि सै आपणै घौरै डेई बौल़ा। एथ बासिऐ, यीशु प्राथना कौरना लै एकी डोकै माथै डेई गौ। सेऊ एखुली थौ, और तिणीऐ आधी राच़ी झ़ाऊं प्राथना कौरी।

सेज़ै बौगतै, च़ेले आपणी किश्ती दी बौच़ी-बौच़ीयौ थै आण्डदै लागै औन्दै, पर बागुर तिऊं भिलै भौरी तेज़ी कौरी थौ बौइंदै लागौ औन्दौ। भौरी राच हुइयौ भी सै सिरफ झ़िला रै माझ़ा दी पौंउच़ै थै।

सेज़ै बौगतै यीशुऐ प्राथना कौरणौ बन्द किऔ और आपणै च़ेलेऊ काऐ वापिस डैऔ। सेऊ किश्ती भिलै डेउणा लै पाणी माथै हाण्डदै लागौ।

तैबै च़ेलै तेस देखियौ भौरी डौरी गौऐ कैलैकि तिउंऐ सुंच़ौ थौ कि एऊ भूत आ। यीशु ज़ाणा थौ कि सै डौरी गौऐ ई, एथीलै तिणीऐ तिउंलै हाका देइऔ बोलौ, “डौरौ नाईं ऐऊ हाऊं ऊ।”

तैबै पतरसै यीशु लै बोलौ, “ओ प्रभु, अगर ऐऊ तु ई ता मु्लै पाणी माथै आण्डिऔ ताऊं काऐ आशणै रौ हुकुम दै।” यीशुऐ पतरसा लै बोलौ, “आश बा!

एथीलै पतरस किश्ती कु उतरी गौ और यीशु काऐ डेउणा लै पाणी री माथै आण्डणौ शुरु किऔ। पर थोड़ौ दूर डेइऔ, तिणीऐ आपणी आखी यीशु कु फेरी गोई और पाणी री छ़ालै देखणी और तेज़ बागुर महसूस कौरणौ शुरू कौरी ऐरौ।

तैबै पतरस डौरी गौ और पाणी दी डूबदै लागौ। सेऊ च़िलांदै लागौ, “ओ प्रभु, मुं बौच़ाऊ!” यीशुऐ तेभी हाथ बौड़ाइऔ सेऊ पाकड़ी ऐरौ और तेसलै बोलौ, “तैरौ विश्वास भौरी कम आ! ताइंऐ मुं माथै विश्वास कैलै नाईं किऔ कि हाऊं ताऊं डुबणै नाईं दैंदौ?

तैबै यीशु और पतरस किश्ती दी च़ौड़ी गौऐ, और फेटी बागुरा रौ बौइणौ बन्द हुई गौ। पाणी शान्त हुई गौ। च़ेलै हैरान हुइऔ यीशु काऐ धौनी झुकी गौऐ। तिउंऐ तेसरी आराधना कौरी और तेसलै बोलौ, “सौच्ची तुमै परमेश्वरा रै छ़ोहरु ई।”