32. यीशु बुरी आत्मा दी फौशौ औन्दौ आदमी और एक बीमार छ़ेउड़ी च़ागौ कौरा सा

यीशु और तेसरै च़ेलै आपणी किश्ती दी सेज़ै इलाकै दी डेई गौऐ ज़िऐ गिरासेनी लोग रौआ थै। सै सेज़ै इलाकै दी पौंउच़िऔ किश्ती कु उतरी गौऐ।

तिऐ एक आदमी थौ ज़ासदी बुरी आत्मा थी लागी ऐन्दी।

ऐऊ आदमी एती शौकतीशाली थौ कि कोई भी तेस नाईं सोभाल़ी बौल़ा थौ। मोकती बारै लोगुऐ तेसरै हाथ और टांगै शांघल़ी कौरी भी पोरु बानै, पर सेऊ तिऊं पोरु च़ोड़ा थौ।

सेऊ आदमी तेस इलाकै दी कौबरा दी रौआ कौरा थौ। सेऊ आदमी पूरै दिनै और पूरी राच़ी राड़ै मारा थौ। सेऊ जुड़कै नाईं भीड़ा थौ और बार-बार आपु दी पात्थरा कौरी ज़ाखम दिआ थौ।

सेऊ आदमी दुड़ियौ यीशु काऐ आशौ और तेस काऐ घुंडै टेकी ऐरै। तैबै यीशुऐ तेस आदमी दी ज़ो बुरी आत्मा थी तिंयालै डांटियौ बोलौ, “ऐस आदमी कु बाइरै निकल़!”

सै बुरी आत्मा ज़ोरै च़िलाई, “ओ यीशु, परम परधान परमेश्वरा रौ छ़ोहरु, तैरौ मु्कू का काम आ? छ़ोंअटी मुं नाईं सौताऊ!” तैबै यीशुऐ तिंऐ बुरी आत्मा कु पुछ़ौ, “तैरौ का नाऊं आ? तिणीऐ ज़वाब दैऔ, “मैरौ नाऊं सेना सा, कैलैकि आमै भौरी का सी।”

तिऊं बुरी आत्माउऐ यीशु कु औरज़ की, “छ़ौअंटी आमु ऐस इलाकै कु बाइरै नाईं भेज़ै!” तिदै नज़दिका रै डोका माथै सुंगरा रौ शाल़ थौ चौरदै लागौ औन्दौ। एथीलै तिऊं बुरी आत्माउऐ यीशु कु औरज़ कौरी, छ़ौअंटी आमु ईऊं सुंगरा दी भेज़!” यीशुऐ बोलौ, “ठीक आ, तिउंदी डैऔ!”

एथीलै सै बुरी आत्माऐ तेस आदमी कु निकल़िऔ तिऊं सुंगरा दी डेई गोई। सै सुंगुर दुड़िऔ टीरा कु झ़िला दी पौड़ी गौऐ और डूबिऔ पोरु मौरै। तेस शाल़ा दी लगभग दूई हज़ार सुंगुर थै।

तिऊं सुंगुरा री देखभाल़ कौरणै वाल़ै लोगुऐ ज़ो कुछ़ हुऔ थौ ज़ेबी तिउंऐ देखौ ता सै इलाकै दी भागी गौऐ। यीशुऐ ज़ो किऔ थौ तिऐ तिउंऐ सारेऊ कै बोलौ। तेस इलाकै रै लोग निकल़िऔ आशै और सेऊ आदमी देखौ ज़ासदी बुरी आत्मा थी। सेऊ शांति कौरी, जुड़कै भिड़ीयौ, और एक आम आदमी ज़िणौ बरताव कौरिऔ बोशौ औन्दौ थौ।

सै लोग भौरी डौरै औन्दै थै और तिउंऐ यीशु लै डेउणा लै बोलौ। एथीलै यीशु किश्ती दी च़ौड़ी गौ। सेऊ आदमी ज़ासदी बुरी आत्मा थी तिणीऐ यीशु आइलै डेउणा लै औरज़ कौरी।

पर यीशुऐ तेसलै बोलौ, “नाईं। हाऊं च़ाह ऊ कि तु घौरै डेइऔ सारेऊ कै बोलै कि परमेश्वरै ताउंलै का किऔ आ। तिउंलै बोल कि परमेश्वरै किणै कौरी ताऊं माथै दया कौरी आ।”

एथीलै सेऊ आदमी डेई गौ और सारेऊ कै ऐज़ै बारै दी बोलौ ज़ो यीशुऐ तेसलै किऔ थौ। और तेसरी काहणी शुणनै वाल़ौ हर एक ज़ौणौ हैरान हुऔ।

यीशु झ़िला रै दूजी तौरफी दी वापिस आशौ। तेस तिऐ पौंउच़णै बासिऐ, एक बौड़ी भीड़ तेस काऐ कौठै हुई और तेस दाबदै लागै। तिंऐ भीड़ा दी एक छ़ेउड़ी थी ज़ो बाराह बौरिषा ओइलै खून बौइणा री बिमारी कु दु:खी थी। तिंऐ आपणै सारै पैसै डाक्टरा कै देई ऐरै थै ताकि सै तिंऐ ठीक कौरी सौका, पर तिंआ रौ रोग तौइंऐ बिगड़ी गौ।

तिंआऐ शुणौ थौ कि यीशुऐ कई बीमार लोग चांगै किऐ थै और तिंऐ सुंच़ौ, “मु्कै पूरौ विश्वास आ कि अगर हाऊं सिरफ यीशु रौ जुड़कौ ई छूं लौ, ता हाऊं भी च़ांगौ हौआ ऊ!” एथीलै सै यीशु रै पिछ़ु आशी और तेसरै जुड़कै रौ धुरौ छ़ूई ऐरौ। ज़िणी ही तिंऐ सेऊ छ़ुऔ, तिणी ई खुना रौ बौइणौ बन्द हुई गौ आ।

फेटी ही, यीशुऐ ज़ाणी ऐरौ कि तेसकु शौकती निकल़ी आ। एथीलै तिणीऐ पिछ़ाऊं मुड़ियौ पुछ़ौ, “हाऊं कुणिऐ छ़ुंऔ उ?” च़ेलेउऐ ज़वाव दैऔ, “इदै ऐती सारै लोगुऐ तुमु फिदियालै भीड़ लाई ऐन्दी, और तुमुदी धाक्कौ लाइंदै लागै औन्दै। ता तुमै कैलै पूछ़ा ई कि हाऊं कुणिऐ छ़ुंऔ ऊ।

सै छ़ेउड़ी यीशु काऐ कांबियौ और भौरी डौरी औन्दी घुंडुं माथै बोशी गोई। तैबै तिंऐ तेसकै बोली ऐरौ कि तिंऐ का किऔ सा, और ईणौ भी की सै चांगी हुई गोई आ। यीशुऐ तिंआलै बोलौ, तैरै विश्वासै तु च़ागी की ऐरी आ, शांति कौरी डेऊ।