34. यीशु दुजी काहणी री शिक्षा दैआ सा

यीशुऐ परमेश्वरा रै राज़्य रै बारै दी ओर भौरी का काहणी शुणाई। तिणीऐ बोलौ, “परमेश्वरा रौ राज़ एकी राई रै बीजा रै ज़िणौ आ ज़ो कुणिऐ आपणै डोखरा दी बौई गौ। तुमै ज़ाणाई कि राई रौ बीज सारै बीजा दी सारेउकु छ़ोटौ औआ सा।”

“पर ज़ेबी राई रौ बीज बौड़ा सा ता सेऊ बौगीच़ा रै सारै पेड़ा दी सारेउकु बौड़ौ औआ सा, ऐती बौड़ौ कि च़ौड़की आशीऔ तेसरी डाल़िऊ दी आराम कौरा इ।”

यीशुऐ एक ओर काहणी बोली, “परमेश्वरा रौ राज़ संज़ेड़ै रै ज़िणौ आ ज़ास निईऔं एक छ़ेउड़ी पिठा मांझ़िऐ मुच्छ़ा सा तैबै सेऊ पिठौ मांझ़ी फौइला सा।”

सौरगा रौ राज़ तेस खौज़ानै ज़िणौ आ ज़ो कुणीऐ डोखरा दी च़ोरी ऐरौ आ। कास ओर आदमी कै सेऊ खौज़ानौ मिली गौ और तिणीऐ तेस निईणै री कोशिश कौरी। एथीलै तिणीऐ सेऊ तौइंऐ दाबी गौ। सेऊ खुशी कौरी एती भौरु औन्दौ थौ कि तिणीऐ डेइऔ आपणौ सारौ कुछ़ बेच़ी ऐरौ ताकि सेऊ तेस डोखरौ खरीदी सौका ज़िऐ सेऊ खौज़ानौ थौ।”

सौरगा रौ राज़ एक भौरी कीमती शुध्द मोती ज़िणौ भी आ। ज़ैबै कुण मोतिऊ रौ बाणी तेस पाआ सा ता सेऊ तेस खरीदणा लै आपणौ सारौ कुछ़ बेच़ी ऐरा सा।”

तिऐ कुछ़ लोग थै ज़ो सुंच़ा थै कि परमेश्वर तिऊं एथीलै अपणाउवा लौ कैलैकि सै भौलै काम कौरदै थै लागै औन्दै। इऐ लोग इणै लोगु निकाम्मै माना थै ज़ो तिऊं भौलै काम नाईं कौरा थै। एथीलै यीशुऐ तिउंकै इऐ काहणी बोली: “दूई मौरद थै और दूइया प्राथना कौरदै मंदिरा दी डै। तिऊं मांझा कु एक मामलै निंणै वाल़ौ थौ, और दूजौ एक धार्मिक गुरू थौ।”

“तिणी धार्मिक गुरुऐ इणै तरीका कौरी प्राथना कौरी, “ओ परमेश्वर, तैरौ धन्यावाद कि हाऊं ओर लोगु ज़िणौ – ज़िणै कि डाकू, ज़ुलम कौरणै वाल़ौ आदमी, गांदै काम कौरणै वाल़ौ, या इदरा झ़ाऊं कि इदै एस मामलै नींणै वाल़ै ज़िणौ नाईं ऊ।”

“मतलब की, हाऊं हर हौप्तै दी दूई बारै ब्रौत छ़ाड़ा ऊ, और हाऊं आपणै पैसै और समाना रौ दौसुऔ हिस्सौ ताउंकै दिआ ऊ।”

“पर सेऊ मामलै निंणै वाल़ौ आदमी तेस धार्मिक गुरू कु भौरी दूर खौड़ौ हूई गौ। तिणीऐ सौरगा भिलै आखी भी नाईं लाई। एथरै बज़ाऐ, तिणीऐ आपणी मुट्ठी कु आपणी छ़ाती पीटी-पिटियौ प्राथना की, ओ परमेश्वर, छ़ौअंटीं मुं माथै दया कर कैलैकि हाऊं एक पापी आदमी ऊ।”

तैबै यीशुऐ बोलौ, “हाऊं तुमू कू सौच्चौ बोलाऊ, परमेश्वरै तेस मामलै निंणै री प्राथना शुणी और सेऊ धौरमी घोषित कौरी ऐरौ। पर तिणीऐ तेस धार्मिक अगुवै री प्राथना पसंद नाईं कौरी। परमेश्वर हर एक घमंडी रौ मूंड धौनी कौरा, पर सेऊ हर तेस ज़ौणा लै इज्जत दिआ ज़ुण आपु निउलौ कौरा सा।”